پاۆلودار قالاسىندا تاعى ءبىر قازاق مەكتەبى اشىلادى

بۇل تۋرلى پاۆلودار قالاسىنىڭ ءبىلىم بەرۋ ءبولىمى حابارلادى.

- ءبىز جەرگىلىكتى تۇرعىنداردىڭ تىلەكتەرىن ەسكەرە وتىرىپ، «دوستىق» شاعىن اۋدانىندا سالىنىپ جاتقان جاڭا «جايلى مەكتەپتە» وقىتۋ قازاق تىلىندە جۇرگىزىلەتىنىن حابارلايمىز. قازىرگى تاڭدا قارقىندى تۇردە دامىپ جاتقان «دوستىق» شاعىن اۋدانىندا مەكتەپ جاسىنداعى 747 بالا تۇرادى. ولاردىڭ %80 دان استامى مەملەكەتتىك تىلدە ءبىلىم الادى، ءبىراق كورشى №21-ورتا مەكتەپتە جانە تاشەنەۆ، مومىش ۇلى مەكتەپتەرىندە، بوكەيحان اتىنداعى ليتسەيدە، سونداي-اق ىقشام اۋداننان تىس جەرلەردە وقۋعا ءماجبۇر. جاڭا «جايلى مەكتەپ» بۇل بالالارعا ءوز ۇيلەرىنە جاقىن جەردە ءبىلىم الۋعا مۇمكىندىك بەرىپ، بولاشاقتا «دوستىقتىڭ» جاس تۇرعىندارى ءۇشىن قولايلى جاعداي جاسايدى (جەلتوقسان ايىنىڭ سوڭىنا دەيىن مۇندا قوسىمشا 96 پاتەر پايدالانۋعا بەرىلەدى، ال كەلەسى جىلى 240 پاتەردەن تۇراتىن تاعى ءۇش تۇرعىن ءۇي سالىنادى).

سونىمەن قاتار، كورشىلەس قازاق سىنىپتارى بار مەكتەپتەردىڭ جۇكتەمەسىن ازايتۋ جوسپارلانىپ وتىر. ماسەلەن، «داچنىي» ىقشام اۋدانىنداعى 1200 ورىنعا ارنالعان №21-مەكتەپتە قازىر 2134 وقۋشى ءبىلىم الۋدا. «دوستىقتان» بالالار كەلىپ وقيتىن كەنجەكول ورتا مەكتەبىندە 1020 ورىننىڭ ورنىنا شامامەن 1500 وقۋشى ءبىلىم الۋدا، ولاردىڭ 917 سى قازاق تىلىندە وقيدى، - مالىمدەدى ءبىلىم بەرۋ بولىمىنەن.

ساراپشىلاردىڭ بولجامىنا سۇيەنسەك، ءوڭىر مەن وبلىس ورتالىعىندا قازاق تىلىندە وقىتۋعا سۇرانىس تۇراقتى تۇردە ارتا بەرمەك. سوڭعى 5 جىلدا 2 جاڭا مەكتەپ پەن 3 قوسىمشا عيمارات سالىنعانىمەن، جاڭا ءبىلىم بەرۋ نىساندارى بۇل تاپشىلىقتى تولىق جويا الماعان. ولاردىڭ ىشىندە تەك ءبىر مەكتەپتە (بوكەيحان اتىنداعى) ءبىلىم بەرۋ مەملەكەتتىك تىلدە جۇرگىزىلەدى. قالاداعى 43 مەكتەپتىڭ تەك 10 ى عانا قازاق تىلىندە وقىتادى. 2018 -جىلدان بەرى پاۆلودارداعى 15 ورىس ءتىلدى مەكتەپتە العاش رەت قازاق سىنىپتارى اشىلدى، ءبىراق بۇل ماسەلەنى شەشۋگە جەتكىلىكسىز بولدى.

«دوستىق» ىقشام اۋدانىندا اشىلعالى وتىرعان 1200 ورىندىق جايلى مەكتەپ تەك تۇرعىنداردىڭ سۇرانىسىن قاناعاتتاندىرىپ قانا قويماي، جاس ۇرپاققا مەملەكەتتىك تىلدە ءبىلىم الۋدى قولجەتىمدى ەتۋدە ماڭىزدى قادام بولعالى تۇر.

اتاپ وتەرلىگى، بىلتىرعى جىلىندا وبلىس بويىنشا مەكتەپ تابالدىرىعىن اتتاعان 23,5 مىڭ وقۋشىنىڭ 43 پايىزى قازاق سىنىبىن تاڭداعان. ال بيىل 11 مىڭعا جۋىق بالانىڭ 45 پايىزىنىڭ تاڭداۋى قازاق مەكتەپتەرىنە ءتۇسىپ وتىر. بۇل ءسال دە بولسا العا جىلجۋدىڭ بار ەكەنىن كورسەتەدى.

ايماقتىڭ ءبىلىم سالاسىنداعى ستاتيستيكالىق دەرەكتەرگە ءسوز سالىپ كورەيىك. 2024- 2025 وقۋ جىلىندا پاۆلودار وبلىسىندا 360 جالپى ءبىلىم بەرۋ مەكتەبى جۇمىس ىستەسە، ونىڭ ىشىندە 137 سى - قازاق تىلىندە وقىتاتىن مەكتەپ (مەكتەپتەردىڭ سانى، اراسالماعى بويىنشا 2022 -جىلعى ستاتيستيكا وزگەرمەگەن). ولاردا جالپى سانى 118 مىڭعا جۋىق وقۋشى وقىسا، 50 مىڭنان استامى نەمەسە 43 پايىزى عانا قازاق تىلىندە ءبىلىم الادى. نەگىزىنەن ايماقتا ارالاس مەكتەپتەرگە قاتىستى ماسەلە بارشىلىق. سەبەبى 100 پايىز قازاق تىلىندە ءبىلىم بەرەتىن مەكتەپتەردە جاڭا وقۋ جىلىندا 33 مىڭ وقۋشى ءبىلىم السا، ارالاس مەكتەپتەردەگى قازاق سىنىپتارىندا وقيتىن وقۋشىلار سانى - نەبارى 17,5 مىڭ بالا. ال ارالاس مەكتەپتەردە ورىسشا ءبىلىم الاتىندار سانى - 60 مىڭ وقۋشى. ياعني ارالاس مەكتەپتەردەگى ءار ءۇش سىنىپتىڭ ەكەۋى - ورىسشا. بۇل جەردە تازا ورىسشا وقىتاتىن مەكتەپتەردى ساناتقا قوسقان جوقپىز. سوندىقتان قازاق مەكتەپتەرىنىڭ سانىن كوبەيتۋ وتە قۇپتارلىق قادام.

اۆتور
مۇرات اياعان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى