التىن وردا كەزەڭىندەگى التىن جاپسىرماسى سارايشىق مۋزەيىنە تاپسىرىلدى

اتىراۋ وبلىستىق تاريحي-ولكەتانۋ مۋزەيىنىڭ ديرەكتورى مۇحامبەتقالي كيپيەۆتىڭ ايتۋىنشا، 2023-2024-جىلدارى ورتاعاسىرلىق سارايشىق قالاشىعىنىڭ ورنىندا ارحەولوگيالىق زەرتتەۋ جۇمىسىن جۇرگىزىلگەن. سول كەزدە جايىق وزەنىنىڭ جاعاسىنداعى 3 مىڭ شارشى مەتردەن استام اۋماقتا 12 بولمە، تۇرعىن ۇيلەرگە ءتان پەش، تاندىر سۋفا (ىسپا) ورنى انىقتالعان.

- ارحەولوگيالىق زەرتتەۋدىڭ ناتيجەسىندە التىن وردا كەزەڭىنە ءتان كوپ جادىگەر تابىلعان. ونىڭ ىشىندە سوعۋ ادىسىمەن جاسالىپ، ارابشا جازۋمەن، وسىمدىك سۋرەتىمەن بەزەندىرىلگەن كۇمىس، قولا تيىندار، كوپتەگەن قىش ىدىستار، اشەكەيلەر، جانۋارلاردىڭ سۇيەكتەرى مەن مەتال بۇيىمدار بار. ەرەكشە نازار اۋدارتقان جادىگەردىڭ ءبىرى - التىن وردا كەزەڭىنە تيەسىلى التىن جاپسىرما. مۇنداي جادىگەر العاش رەت تابىلدى. وسى كەزگە دەيىن ورتاعاسىرلىق سارايشىق قالاشىعىنا بىرنەشە رەت ارحەولوگيالىق زەرتتەۋ جۇمىسى جۇرگىزىلدى. ءبىراق التىن بۇيىم تابىلماعان ەدى، - دەيدى مۇحامبەتقالي كيپيەۆ.

ونىڭ پىكىرىنشە، التىن جاپسىرما قوبديشانىڭ نەمەسە كىشكەنتاي ساندىق قاقپاعىنىڭ توپساسى رەتىندە قولدانىلعان بولۋى مۇمكىن. بۇل بۇيىم ورنەكتەۋ ءتاسىلى ارقىلى جاسالعان. جاپسىرمانىڭ جوعارعى بولىگىنىڭ اينالاسىنا يرەكتەلگەن ورنەك سالىنىپتى.

- جوعارعى جانە تومەنگى بولىگى قوشقار ءمۇيىز ويۋىمەن ورنەكتەلگەن. توپساعا بەكتىتۋگە ارنالعان ەكى تەسىگى بار. التىن جاپسىرمانىڭ ولشەمى تىم ۇلكەن ەمەس. ونىڭ ۇزىندىعى – 6، ەنى - 1 س م. ال قالىڭدىعى 0,2 س م قۇرايدى. مۋزەي قىزمەتكەرلەرى التىن جاپسىرماعا رەستاۆراتسيا جۇرگىزدى. سودان كەيىن ونى «سارايشىق» مەملەكەتتىك تاريحي-مادەني مۋزەي-قورىعىنا تاپسىردىق. وسى كەزگە دەيىن تاريحي قالاشىقتاعى مۋزەي-قورىعىنا 286 جادىگەر تاپسىرىلعان ەدى، - دەپ ءمالىم ەتتى مۇحامبەتقالي كيپيەۆ.

ەسكە سالا كەتەلىك، بۇدان بۇرىن اتىراۋ وبلىسىنداعى قورعانداردان سارمات ءداۋىرىنىڭ التىنى تابىلعانىن جازعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى