التىن وردا بازارىندا ءالى دە زاڭسىز اقشا جينايتىندار بار ەكەنى راس پا - كوميتەت وكىلىنىڭ جاۋابى
استانا. KAZINFORM - ساۋدا جانە ينتەگراتسيا مينيسترلىگى ساۋدا كوميتەتىنىڭ ءتوراعاسى ايدار ابىلدابەكوۆ الەۋمەتتىك جەلىدەگى «التىن وردا» بازارى تۋرالى شاعىمدارعا پىكىر ءبىلدىردى.
«2022-جىلى باس پروكۋراتۋرانىڭ باستاۋىمەن قازىر كوپ ايتىلىپ، كوپ جازىلىپ جۇرگەن «التىن وردا» بازارىندا ۇلكەن تەكسەرۋ بولدى. بىلتىر ءوزىم سول بازاردا بىرنەشە اپتا بولعان شىعارمىن. ويتكەنى بازاردى تارتىپكە كەلتىرۋ تۋرالى قايتا تاپسىرما تۇسكەن بولاتىن»، - دەدى ايدار ابىلدابەكوۆ ۆەدومستۆو جانىنداعى قوعامدىق كەڭەس ماجىلىسىندە.
سونداي-اق، كوميتەت ءتوراعاسى الەۋمەتتىك جەلىدە بازار تۋرالى تاراعان مالىمەتتەردى تەرىسكە شىعاردى.
«ول بازاردا ءبىر تاۋاردى ونداعان ادامنىڭ ءبىر-بىرىنەن الىپ، قايتا ساتىپ جۇرگەنى تۋرالى بەينەروليكتەر تاراعانىن ايتىپ وتىرسىز. ونداي جاعداي جوق. بازارعا كىرگەن جۇك كولىكتەرىنەن، كوتەرمە ساۋداگەرلەردەن بىرنەشە قايتالاپ اقشا الاتىنى، باعانىڭ سول ءۇشىن كوتەرىلىپ جاتقانى دا، ونداي جوق. ءبىر رەت كىرەدى، ءبىر رەت قانا تولەيدى. ونىڭ قۇنى ورنالاسقان قاتارىنا بايلانىستى - ءبىر جەردە 18 مىڭ تەڭگە، ءبىر جەردە 15 مىڭ تەڭگە. ءبىر كىرگەن كولىك 5 تاۋلىك تۇرا الادى»، - دەدى ول.
