التىن باعاسى 3 مىڭ دوللار شەگىنە جاقىندادى
استانا. KAZINFORM - بەيسەنبىدە التىننىڭ باعاسى رەكوردتىق دەڭگەيگە كوتەرىلىپ، ءبىر ۋنتسيا ءۇشىن 3 مىڭ دوللارعا جاقىندادى، دەپ حابارلايدى CNBC.
التىننىڭ سپوت باعاسى 1,6 پايىز قىمباتتاپ، ۋنتسياسى ءۇشىن 2977,36 دوللاردى قۇرادى. بۇل - 2025-جىلى نارىقتاعى 12-ەڭ جوعارى كورسەتكىش.
جىل باسىنان بەرى باعالار 2024-جىلى 27 پايىزعا جىلدام وسكەننەن كەيىن 14 پايىزعا جۋىق ءوستى. ا ق ش- تا التىن فيۋچەرستەرى 1,4 پايىزعا ءوسىپ، 2989 دوللاردى قۇرادى.
- التىن ۇزاق مەرزىمدى «بۇقالار» نارىعىندا تۇر. باعالار بيىل 3000 دوللاردان 3200 دوللارعا دەيىن وزگەرەدى دەپ بولجاپ وتىرمىز، - دەدى «Allegiance Gold» باس وپەراتسيالىق ديرەكتورى الەكس ەبكاريان.
ا ق ش پرەزيدەنتى دونالد ترامپتىڭ تۇراقسىز ساۋدا ساياساتى ينۆەستورلار گەوساياسي جانە ەكونوميكالىق كۇيزەلىس كەزىندە ساتىپ العاندى ءجون كورەتىن التىننىڭ باعاسىن شارىقتاتىپ وتىر.
- تاريفتەردىڭ وزگەرۋىنە قاتىستى جالعاسىپ جاتقان بەلگىسىزدىك شىنىمەن التىنعا دەگەن تابەتتى كۇشەيتىپ كەلەدى - دەدى «Standard Chartered» ساراپشىسى سوكي كۋپەر.
تاعى ءبىر سەبەپ - قىتاي حالىق بانكىنىڭ قىتاي اقپان ايىندا ءتورتىنشى اي قاتارىنان التىن ساتىپ الۋىن جالعاستىرعانى تۋرالى دەرەكتەر.
بۇعان دەيىن قازاقستان ايماقتارىندا التىن قۇنى قانداي ەكەنىن جازعان بولاتىنبىز.
