التى ءتىلدى بىلەتىن ۇستاز اۋىل مەكتەبىندە ساباق بەرەدى
تۇركىستان وبلىسىنىڭ كەلەس اۋدانىنداعى وزبەكالى جانىبەكوۆ اتىنداعى №2 مەكتەپ گيمنازياسىندا اعىلشىن تىلىنەن ساباق بەرەتىن گاۋحار باحادىروۆا 6 ءتىلدى جەتىك بىلەدى، - دەپ حابارلايدى Kazinform.
پوليگلوت ۇستازدىڭ ساباعىنا وقۋشىلار بەلسەندىلىكپەن قاتىسادى. سەبەبى، ءاربىر سىنىپقا ۇلكەن دايىندىقپەن كىرەتىن ءمۇعالىم قىزىقتى دا، ەرەكشە تاسىلدەردى كوپ قولدانادى. سوندىقتان كەي ساتتەرى 45 مينۋتتىڭ قالاي وتكەنى دە بايقالماي قالادى.
«بالاعا باعىت بەرىپ، قىزىقتىرا بىلسەڭ، ول سەنى تاڭعالدىرۋدان جالىقپايدى. مەن ساباق بەرگەندە وقۋشىلارعا ەڭ ءبىرىنشى سىني تۇرعىدان ويلانۋ، ءوزىن- ءوزى وقىتا الۋ، بالانىڭ قالىپتاسۋ تۇرعىسىنداعى داعدىلارىن ەسكەرەمىن. سودان كەيىن ءبىلىم بەرۋ داعدىسىنا جۇگىنەمىن»، - دەيدى گاۋحار باحادىروۆا.
گاۋھار م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىندە اعىلشىن جانە نەمىس ءتىلى ءپانى بويىنشا ءبىلىم العان. ەكىنشى كۋرستا وقىپ جۇرگەن ساتىندە «اكادەميالىق ۇتقىرلىق» جوباسى اياسىندا يسپانيانىڭ كاديس قالاسىنداعى “ەrasmus Mundus” ۋنيۆەرسيتەتىنە تاجىريبە الماسۋعا بارادى. سول ساتتە وقۋ ورنى جاس ستۋدەنتتەردىڭ شەتەلدە 6 اي ءبىلىمىن جەتىلدىرۋگە مۇمكىندىك بەرگەن. ەڭبەكقورلىعىنىڭ ارقاسىندا ءوز ءبىلىمىن كورسەتە العان بويجەتكەن تاعى 2 جىلعا كەلىسىمشارتتى ۇزارتادى. سودان يسپانيادا ءجۇرىپ يسپان ءتىلىن ۇيرەنەدى. ال، ورىس ءتىلىن وقۋشى كەزدە- اق مەڭگەرىپ العان بولاتىن. كەيىن، وقۋدى ءبىتىرىپ، ديپلوم العان سوڭ، قازاق- تۇرىك ليتسەيىنە قىزمەتكە ورنالاسادى. جۇمىس ىستەپ ءجۇرىپ، تۇرىك تىلىندە سويلەۋگە داعدىلانادى.
«ءتىل بىلگەن سايىن جاڭا مۇمكىندىكتەر اشىلدى. الەمدىك جاڭالىقتاردى، ءبىلىم سالاسىنداعى تاجىريبەلىك داعدىلاردى ەشكىمنىڭ كومەگىنسىز- اق، ءوزىم ينتەرنەتتەن وقىپ الاتىن بولدىم. ساباق بارىسىندا قاجەتتى دەگەن الەمدىك ءادىس- تاسىلدەردى قولدانامىن. شاكىرتتەرىمە دە كوپ ەڭبەكتەنۋ كەرەكتىگىن ايتىپ وتىرامىن. سەبەبى، ەڭبەك ەتكەندە عانا ۇلكەن ناتيجەگە قول جەتكىزۋگە بولادى» - دەيدى ول.
گاۋھار مەكتەپتەگى ساباقتارىندا تەك اعىلشىن تىلىندە سويلەيدى. وقۋشىلارى دا سوعان بەيىمدەلگەن. سوندىقتان بارشاسى اعىلشىنشا «سايراپ» تۇر. سونداي- اق، اۋىل مەكتەبىنەن اعىلشىن ءتىلىن تەرەڭ وقىتاتىن ۇيىرمە اشىپ، وقۋشىلارعا شەت ءتىلىن جەتىك مەڭگەرۋگە سەپتىگىن تيگىزىپ ءجۇر. ناتيجەسىندە 1 جىلدىڭ ىشىندە مەكتەپ بىتىرگەن شاكىرتتەرىنىڭ %80 ى مەملەكەتتىك گرانت يەگەرى اتانعان.
«شاكىرتتەرىمدى ماقتان تۇتامىن. قازىر العىر، ءبىلىمدى جاستار كوپ. ءتىلدى تەز ۇيرەنىپ الادى. ءارى ايتقانىڭدى تەز ۇعىنادى. وسىنداي ۇلگىلى جاستارعا ساباق بەرىپ، بولاشاققا باعىتتاپ ءجۇرمىن»، - دەيدى ۇستاز.
گاۋھار كوپ ىزدەنەدى. بوس ۋاقىتىندا اعىلشىن، يسپان، نەمىس تىلدەرىندەگى كىتاپتاردى كوپ وقيدى.
عالامتوردان دا سوڭعى جاڭالىقتاردى قاراپ وتىرادى. قاجەتتى دەگەن اقپاراتتاردى قويىن داپتەرىنە ءتۇرتىپ الىپ، جۇمىس بارىسىندا قولدانادى. تىلدىك سويلەۋ قورىن ۇلعايتۋ ءۇشىن ۇنەمى شەتەلدەگى دوستارىمەن سويلەسەدى. ال، وتباسىندا تەك قازاق ءتىلىن قولدانادى.
«ەڭ الدىمەن بالا ءوز انا ءتىلىن بويىنا دارىتىپ الۋى ءتيىس. سەبەبى، بالانىڭ تاربيەسى انا ءتىلى ارقىلى قالىپتاسادى دەپ بىلەمىن. سوندىقتان ۇيدە تەك قازاقشا سويلەسەمىز» - دەيدى گاۋھار ديحان قىزى.
