پالەستينانى قالپىنا كەلتىرۋ ءۇشىن كەم دەگەندە 53,2 ميلليارد دوللار قاجەت – ب ۇ ۇ
استانا. KAZINFORM - بىرىككەن ۇلتتار ۇيىمى مەن ونىڭ سەرىكتەستەرى جاريالاعان سوڭعى ەسەپ بويىنشا، گازا سەكتورى مەن باسىپ الىنعان باتىس جاعالاۋدى قالپىنا كەلتىرۋگە الداعى ون جىلدا 53,2 ميلليارد ا ق ش دوللارى قاجەت بولادى.
News.un سايتىنىڭ حابارلاۋىنشا، بىرىككەن ۇلتتار ۇيىمى «شىعىندار مەن قاجەتتىلىكتەردى باعالاۋ ەسەبى» دەپ اتالاتىن بايانداماسىن جاريالادى.
ەسەپ پالەستيناداعى سوعىستان زارداپ شەككەن ينفراقۇرىلىمدى قالپىنا كەلتىرۋ قۇنى 29,9 ميلليارد ا ق ش دوللارىن قۇرايتىنىن، ال ەكونوميكالىق جانە الەۋمەتتىك سالالاردى قالپىنا كەلتىرۋ ءۇشىن 19,1 ميلليارد ا ق ش دوللارىن قاجەت ەتەتىنىن كورسەتەدى.
ولاردىڭ ىشىندە تۇرعىن ءۇيدى قايتا قۇرۋ قاجەتتىلىكتەرى ەڭ وزەكتى بولىپ وتىر. قالپىنا كەلتىرۋگە جۇمسالاتىن جالپى شىعىنداردىڭ %30 باسپاناعا قاجەت. بۇل 15,2 ميلليارد ا ق ش دوللارى ينۆەستيتسياسىنا تەڭ.
سونىمەن بىرگە، بىرىككەن ۇلتتار ۇيىمى تەك الداعى ءۇش جىلدا نەگىزگى مەملەكەتتىك قىزمەتتەردى تۇراقتاندىرۋ جانە ۇزاق مەرزىمدى قالپىنا كەلتىرۋگە نەگىز قالاۋ ءۇشىن شامامەن 20 ميلليارد ا ق ش دوللارىن قاجەت ەتەتىنىن مالىمدەدى.
بىرىككەن ۇلتتار ۇيىمىنىڭ باسىپ الىنعان پالەستينا تەرريتورياسىنداعى گۋمانيتارلىق ۇيلەستىرۋشىسى موحانناد حادي حالىقارالىق قاۋىمداستىقتى پالەستينانى قايتا قۇرۋدى بىرلەسىپ ىلگەرىلەتۋ ءۇشىن بىرىگۋگە جانە ىنتىماقتاستىققا شاقىرا وتىرىپ، گازانىڭ تولىق قالپىنا كەلۋى پالەستينا بيلىگىنىڭ قالپىنا كەلۋىنە دە بايلانىستى ەكەنىن باسا ايتتى.
مۇحانناد حادي گازانىڭ بولاشاعىنىڭ بىرىككەن ۇلتتار ۇيىمىنىڭ قارارلارى مەن حالىقارالىق قۇقىققا نەگىزدەلۋى كەرەكتىگىن، استاناسى يەرۋساليم بولاتىن «ەكى مەملەكەتتى شەشىمنىڭ» ەڭ جاقسى نۇسقا ەكەنىن ايتتى.
ەسكە سالا كەتەيىك، بۇعان دەيىن يزرايل 17-اقپاندا گازا سەكتورىنا قاتىستى كەلىسىمنىڭ ەكىنشى كەزەڭىن تالقىلايتىنىن جازعان بولاتىنبىز.
