پالەستينا پرەمەر-ءمينيسترى وتستاۆكاعا كەتتى

پالەستينا پرەمەرىنىڭ شەشىمى ا ق ش- تىڭ گازا سەكتورىنداعى سوعىستان كەيىن پالەستينا مەملەكەتىن باسقارا الاتىن ساياسي قۇرىلىم قۇرۋ ماقساتىندا پالەستينا اۆتونومياسىنا قىسىم كورسەتۋى اياسىندا قابىلدانىپ وتىر.

پالەستينانىڭ پرەمەر-ءمينيسترى موحامماد شتايە ءوز ۇكىمەتىنىڭ پالەستينا اۋماعىنداعى زورلىق-زومبىلىق پەن گازا سەكتورىنداعى سوعىستىڭ كۇشەيۋىنە بايلانىستى وتستاۆكاعا كەتەتىنىن مالىمدەدى.

«وستاۆكاعا كەتۋ تۋرالى شەشىم باتىس جاعالاۋ مەن يەرۋساليمدەگى جاعدايدىڭ بۇرىن-سوڭدى بولماعان شيەلەنىسۋى، سونداي-اق گازا سەكتورىنداعى سوعىس، گەنوتسيد جانە اشارشىلىققا بايلانىستى قابىلداندى»، - دەدى شتايە دۇيسەنبى كۇنى راماللاداعى ۇكىمەت وتىرىسىندا.

پالەستينا اۆتونومياسىنىڭ 18-ۇكىمەتىن 2019-جىلدىڭ ناۋرىزىنان بەرى باسقارعان شتايە پالەستينا پرەزيدەنتى ماحمۋد ابباسقا وتستاۆكاعا كەتۋ تۋرالى ءوتىنىش بەردى.

«كەلەسى كەزەڭ مەن ونىڭ پروبلەمالارى گازا سەكتورىنداعى جاڭا شىندىقتى جانە پالەستينا بىرلىگى مەن ونداعى بيلىك بىرلىگىن كەڭەيتۋگە نەگىزدەلگەن جالپى پالەستينالىق كونسەنسۋس قاجەتتىلىگىن ەسكەرەتىن جاڭا ۇكىمەتتىك جانە ساياسي تەتىكتەردى قاجەت ەتەتىنىن كورەمىن»، - دەدى شتايە Facebook پاراقشاسىندا.

شتايەنىڭ مالىمدەمەسى ا ق ش- تىڭ ماحمۋد ابباسقا پالەستينا بيلىگىن جاڭارتىپ، سوعىستان كەيىن پالەستينا مەملەكەتىن باسقارا الاتىن ساياسي قۇرىلىم بويىنشا جۇمىستى باستاۋ جونىندەگى قىسىمى كۇشەيگەن تۇستا ايتىلدى.

ەكى اپتا بۇرىن شتايە «ەگەر جاڭا ۇكىمەت قۇرۋ جوسپارلانسا، وتستاۆكاعا كەتەتىنىن» مالىمدەگەن.

يزرايل پرەمەر-ءمينيسترى بينيامين نەتانياحۋ پالەستينا اۆتونومياسىنىڭ پالەستينا مەملەكەتىن باقىلاۋعا الۋ جانە گازا سەكتورىن باسقارۋ تۋرالى ۇندەۋلەرىن بىرنەشە رەت قابىلداماي تاستادى.

وتكەن اپتادا يزرايل زاڭگەرلەرى ءتىپتى نەتانياحۋدىڭ پالەستينا مەملەكەتىن كەز كەلگەن «ءبىرجاقتى» مويىنداۋدان باس تارتۋىن قولدادى.

اراب ب ا ق حابارلاۋىنشا، ماحمۋد ابباس جاڭا مينيسترلەر كابينەتىن قۇرۋعا ىقتيمال كانديدات رەتىندە پالەستينا ينۆەستيتسيالىق قورىنىڭ ديرەكتورلار كەڭەسىنىڭ ءتوراعاسى موحاممەد مۇستافانى ۇسىنادى دەپ كۇتىلۋدە.

رەسەي 29-اقپاندا ماسكەۋدە پالەستيناارالىق كەزدەسۋ وتكىزەدى دەپ كۇتىلۋدە.

30 جىل بۇرىن وسلوداعى ۋاقىتشا ءبىتىم اياسىندا قۇرىلعان پالەستينا بيلىگى باسىپ الىنعان باتىس جاعالاۋدىڭ كەيبىر بولىكتەرىن شەكتەۋلى باسقارۋدى جۇزەگە اسىرىپ وتىر.

2007-جىلى پالەستينا اۆتونومياسى حاماسپەن قاقتىعىسقا بايلانىستى گازا سەكتورىن باقىلاۋدان باس تارتقان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى