الەۋمەتتىك ينفراقۇرىلىم بالا سانىنا سايكەس كەلمەيتىنى راس - استانا اكىمى

بۇگىن ەلوردادا اكىمنىڭ كاسىپكەرلەرمەن كەزدەسۋىندە ءماجىلىس دەپۋتاتى ولجاس قۇسپەكوۆ قالادا قۇرىلىس قارقىندى ءجۇرىپ جاتقانىنا بايلانىستى الەۋمەتتىك ينفراقۇرىلىمعا جۇكتەمە ايتارلىقتاي ارتقانىن ايتتى. وسى ورايدا دەپۋتات قالاداعى دەموگرافيالىق ءوسىم اياسىندا ءبىلىم بەرۋ نىساندارىنداعى ورىن تاپشىلىعى قالاي شەشىلەتىنىن سۇرادى.

ءوز كەزەگىندە استانا باسشىسى قالا تۇرعىندارى جىل سايىن كەم دەگەندە 60 مىڭ ادامعا ارتىپ وتىرعانىن اتاپ ءوتتى.

«ونىڭ جارتىسى بالا تۋۋ ەسەبىنەن بولسا، قالعانى ەلىمىزدىڭ باسقا وڭىرلەرىنەن قونىس اۋدارۋىنان تولىعىپ وتىر. سوندىقتان قالادا الەۋمەتتىك جانە ينجەنەرلىك ينفراقۇرىلىم جاعىنان ماسەلەلەر بار. ماسەلەن، جازدا سۋعا قاتىستى پروبلەما بولدى. كەيىنگى جىلدارى قىس كەزىندە جىلۋ بەرۋ ماۋسىمىندا ەلەكتر ەنەرگياسى بويىنشا ءتيىستى شەكتەۋ بايقالدى. الەۋمەتتىك ينفراقۇرىلىم قالاداعى بالالاردىڭ سانىنا سايكەس كەلمەيتىنى دە راس»، - دەدى ج. قاسىمبەك.

شاھار اكىمىنىڭ ايتۋىنشا، بيىل ەلوردادا دۇنيەگە كەلگەن نارەستەلەردىڭ سانى 35 مىڭعا جەتۋى ىقتيمال.

«جاڭا وقۋ جىلىندا ءبىرىنشى سىنىپقا 26 مىڭ ءبۇلدىرشىن باردى. بىزدە 25 مىڭ وقۋشى ورنى جەتىسپەيدى. قالادا ءۇش اۋىسىمداعى 8 مەكتەپ بار ەكەنىن دە ەسكەرۋ كەرەك. قازىر «جايلى مەكتەپ» باعدارلاماسى جۇزەگە اسىرىلىپ جاتىر. كەلەسى وقۋ جىلى قارساڭىندا 24 مەكتەپ پايدالانۋعا بەرىلەدى. ال بيىل 10 مەكتەپتى تاپسىرۋ ەسكەرىلگەن. تاعى 8 مەكتەپتى ءوزىمىز سالامىز، سونداي-اق 17 جەكەمەنشىك مەكتەپتىڭ قۇرىلىسى ءجۇرىپ جاتىر. جالپى، ەكى جىلدا 50 گە جۋىق جاڭا مەكتەپ پايدا بولادى. وسى ورايدا ورىن تاپشىلىعىن جويامىز»، - دەدى اكىم.

استانا اكىمىنىڭ سوزىنە قاراعاندا، قالادا 5-7 مىڭ پەداگوگ جەتىسپەيدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى