الەۋمەتتىك جەلىلەر بالا تۇگىلى ەرەسەكتەردى كۇيزەلىسكە ۇشىراتادى
الەۋمەتتىك جەلىلەر بالا تۇگىلى ەرەسەكتەردى دە كۇيزەلىسكە ۇشىراتادى. ا ق ش- تا جۇرگىزىلگەن زەرتتەۋ قورىتىندىسى وسىنداي. پسيحولوگ ماماندار كەيىنگى كەزدە ادامدار اراسىندا پسيحيكالىق داعدارىس ارتقانىن بايقاعان.
زەرتتەي كەلە بۇعان الەۋمەتتىك جەلىلەردىڭ دە اسەرى بارىن انىقتاعان. ا ق ش- تاعى ءتورت ۋنيۆەرسيتەت بىرلەسىپ جۇرگىزگەن زەرتتەۋ پاندەميامەن كۇرەس كەزىندەگى ەرەسەكتەردىڭ مىنەز- قۇلقىن انىقتاۋعا باعىتتالادى. ول ءۇشىن 56 جاسقا دەيىنگى 5000 نان استام ادام تاڭدالىپ الىنادى. زەرتتەۋ توبىنىڭ جەتەكشىسى، پسيحياتر روي پەرليستىڭ ايتۋىنشا الدىمەن كۇيزەلىسكە تۇسپەگەن ادامدار اراسىندا الەۋمەتتىك جەلىنى قالاي پايدالانۋ جونىندە ساۋالناما جۇرگىزىلەدى. اراعا ءبىراز ۋاقىت سالىپ جەلىنى ءجيى قولداناتىن ازاماتتاردىڭ كۇيزەلىسكە ءتۇسۋ ىقتيمالدىعىن ءبىلۋ ءۇشىن ساۋالنامانى قايتالاپ جۇرگىزەدى.
زەرتتەۋ اۆتورلارىنىڭ ايتۋىنشا Facebook, TikTok جانە Snapchat سياقتى پلاتفورمانى پايدالاناتىن ازاماتتار بۇل جولى وزدەرىنىڭ كۇيزەلىسكە ۇشىراي باستاعانىن جانە ونىڭ قايتالانۋ ىقتيمالدىعى جوعارى ەكەنىن اشىپ كورسەتكەن.
روي پەرليس، ماسساچۋسەتس جالپى اۋرۋحاناسى مەن گارۆارد مەديتسينالىق مەكتەبىنىڭ پسيحياتريا جونىندەگى پروفەسسورى: «بالالار سياقتى ۇلكەن ادامدار دا اقپاراتتى باسقاشا قابىلداپ قالۋى ىقتيمال. ۇنەمى سىزدەن گورى باقىتتىراق كورىنەتىن سۋرەتتەر، سىزگە قاراعاندا جەتىستىككە كوبىرەك جەتكەن جاندار، ءومىرى جاقسىراق سياقتى وزگە ادامداردىڭ سۋرەتتەرى كوپتەگەن ازاماتقا جاعىمدى اسەر ەتەدى دەپ ايتا المايمىز. ۇزدىكسىز تەرىس اقپاراتتى قاراۋ دا كەرى اسەرىن تيگىزەدى. الەۋمەتتىك جەلى توقتاۋسىز اعىپ جاتقان سۋدى ءماجبۇرلى تۇردە ىشكەنمەن تەڭ.. .»
البەتتە بۇل زەرتتەۋدىڭ ناتيجەسى الەۋمەتتىك مەديانىڭ الاڭداۋشىلىققا اكەلەتىنىن ناقتى دالەلدەمەيدى. دەگەنمەن، سوڭعى جىلدارى ا ق ش- تا پسيحيكالىق داعدارىستىڭ ءوسىپ كەلە جاتقانىن ايعاقتايدى، دەيدى پسيحياترلار. ساۋالناما بويىنشا مۇنداعى ەرەسەكتەردىڭ ۇشتەن ءبىرى جايسىز كۇيگە ءجيى تۇسەتىنىن حابارلاعان. امەريكالىق پسيحولوگيالىق قاۋىمداستىق ازاماتتارعا الەۋمەتتىك جەلىگە قانشا ۋاقىت بولگەنىڭىزدى قاداعالاعان ءجون كەڭەس بەرەدى. ويتكەنى باعدارلامالار ءسىزدى ۆيرتۋالدى الەمدە بارىنشا ۇزاق ۇستاۋعا تىرىسادى. ونىڭ ارتى الەۋمەتتىك جەلىگە شەكتەن تىس بايلانىپ، لايك ساناپ ءوزىن جۇباتاتىن ادەتكە الىپ كەلەدى.
نۇربەك بەكەن
www.24.kz
