الەمنىڭ ءبىرقاتار ەلىندە ۇلتتىق ۆاليۋتا السىرەدى
استانا. قازاقپارات - الەمنىڭ ءبىرقاتار ەلى ۇلتتىق ۆاليۋتالارىن دەمەيتىن تىرەك تاپپاي، تىعىرىققا تىرەلىپ جاتىر، دەپ حابارلايدى 24kz.
ماسەلەن، تۇرىك ليراسى ءبىرشاما قۇنىن جوعالتقان. كورشىلەس رەسەيدىڭ رۋبلى دە، وتكەن اپتادا شامامەن %12- كە قۇلدىرادى. مۇنداي احۋالمەن، اتالعان ەلدەردىڭ بيلىكتەرى قالاي كۇرەسىپ جاتىر؟
2024 -جىل تۇركيا ءۇشىن قيىن بولدى. ەل ەكونوميكاسىنداعى احۋال ايتارلىقتاي كۇردەلەنە ءتۇستى. ۇلتتىق ۆاليۋتا قۇنىن جوعالتتى. ناۋرىز ايىنداعى دەرەك بويىنشا تۇرىك ليراسى %8 السىرەدى. 2023 -جىلى %37 قۇلدىراعان بولاتىن. وعان بىرنەشە فاكتور اسەر ەتتى. اتاپ ايتقاندا، تۇركياداعى ينفلياتسيا مەن مونەتارلىق ساياسات.
بيلىك پايىزدىق مولشەرلەمەنى %45 كوتەردى. بۇدان بولەك، يمپورتتىڭ باسىم بولىگى دوللارمەن جۇزەگە اسىرىلۋى دا ۆاليۋتاعا دەگەن قىسىمدى كۇشەيتتى. ەلدىڭ قارجى جۇيەسىنە سەنىمنىڭ تومەندەۋىنەن تۇرعىندار مەن كاسىپورىندار ءوز جيناقتارىن جاپپاي شەتەلدىك ۆاليۋتا نەمەسە التىنعا اۋىستىرۋعا كوشتى.
قولدا بار مالىمەت بويىنشا قازىرگى تاڭدا بانكتەگى دەپوزيتتەردىڭ جارتىسىنان استامى شەتەلدىك ۆاليۋتادا ساقتالعان.
رەسەي رۋبلى دە قۇلدىرادى. سوڭعى 10 كۇندە كورشى ەلدىڭ ۇلتتىق ۆاليۋتاسى %12,47- كە قۇنسىزدانىپ كەتتى. 28-قاراشا كۇنى 1 ا ق ش دوللارى 113,1 رۋبلگە باعالاندى. بۇعان گەوساياسي احۋال مەن مۇناي ەكسپورتىنا قاتىستى شەكتەۋلەر اسەر ەتتى. ەل ۇكىمەتى ۇلتتىق ۆاليۋتانى قولداۋ ماقساتىندا ەكسپورتتىق كومپانيالارعا ۆاليۋتا تۇسىمدەرىن رۋبلگە ايىرباستاۋدى مىندەتتەدى. ال ورتالىق بانك پايىزدىق مولشەرلەمەنى كوتەردى. ەسكە سالا كەتەيىك، سانكسيا سالدارىنان ماۋسىم ايىنان باستاپ ماسكەۋلىك بيرجادا دوللار مەن ەۋرو ساۋدالانۋىنا تىيىم سالىندى. سودان بەرى دوللاردىڭ قۇنى بانك ارقىلى انىقتالاتىن بولدى.
ارگەنتينا بيلىگى 2023 -جىلدان بەرى ەلدەگى ەكونوميكالىق داعدارىسپەن كۇرەسىپ كەلەدى. وسى ماقساتتا ۇكىمەت ۇلتتىق ۆاليۋتانىڭ باعامىن %54- كە قۇنسىزداندىردى. ءسويتىپ 1 ا ق ش دوللارى 800 پەسودان ساۋدالانا باستادى. بۇرىن باعام 366 پەسو بولاتىن. بۇل جاڭادان سايلانعان پرەزيدەنت حاۆەر ميلەي ۇسىنعان باعدارلاماسىنىڭ ءبىر بولىگى. كەيىن ورتالىق بانك پەسو اي سايىن %2- كە ديەۆالۆاتسيالاۋ تۋرالى جوسپارىمەن ءبولىستى. قازىر ارگەنتيناداعى ينفلياتسيا دەڭگەيى %140- تەن اسادى. تاۋار مەن قىزمەت تۇرلەرى تاعى %20-40- كە وسەدى دەگەن بولجام بار. جالپى ەل بيلىگى جىلدار بويى جالعاسىپ كەلە جاتقان داعدارىستى توقتاتۋ ءۇشىن بىرنەشە مينيسترلىكتى قىسقارتتى. كاپيتال اعىنىنا شەكتەۋ قويىپ، وڭىرلەرگە بولىنەتىن قارجى كولەمىن ازايتتى.
24.
