الەمدىك ب ا ق-تاعى قازاقستان: ۆيزا بەرۋدى جەڭىلدەتۋ، بەيبىتشىلىككە باستاما جانە ورتالىق ازيانىڭ تالقىسى

Report: ەۋروكوميسسيا مەن قازاقستان ۆيزا بەرۋدى جەڭىلدەتۋ تۋرالى كەلىسىمدەردى باستادى
قازاقستان پرەزيدەنتى قاسىم-جومارت توقايەۆ پەن ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى ءارى ەۋروكوميسسيانىڭ ۆيتسە- پرەزيدەنتى كايا كاللاس كەزدەسىپ، جان-جاقتى ىنتىماقتاستىقتىڭ پەرسپەكتيۆالارىن ءسوز ەتتى. اقپاراتتى اقورداعا سىلتەمە جاساي وتىرىپ، Report حابارلادى.

ەڭ اۋەلى كاللاس قازاقستان ە و- مەن كەڭەيتىلگەن سەرىكتەستىك پەن ىنتىماقتاستىق تۋرالى كەلىسىمگە قول قويعان ءبىرىنشى ەل ەكەنىن ەرەكشە اتاپ ءوتتى. ونىڭ ايتۋىنشا، بۇل - ەكىجاقتى قارىم-قاتىناستىڭ جوعارى دەڭگەيدە دامۋىنىڭ دالەلى. سونداي-اق ەۋروكوميسسيا مەن قازاقستان اراسىندا ۆيزا بەرۋ ءتارتىبىن جەڭىلدەتۋ تۋرالى كەلىسىم جاساسۋ ءراسىمىنىڭ باستالعانى تۋرالى جاريا ەتتى.

ءوز كەزەگىندە قاسىم-جومارت توقايەۆ قازاقستاندا بۇل جاڭالىقتى وڭ قابىلداپ وتىرعانىن، سەبەبى كەزەكتى قادام ەۋروپالىق مەملەكەتتەرمەن ىسكەرلىك جانە تۇلعا ارالىق بايلانىستاردى نىعايتۋعا كەڭ مۇمكىندىكتەر اشاتىنىن جەتكىزدى.

بۇعان قوسا، كەزدەسۋدە ەنەرگەتيكا، ونەركاسىپ، سيفرلاندىرۋ سياقتى باسىم سالالارداعى ساۋدا-ەكونوميكالىق ارىپتەستىكتى كەڭەيتۋگە، ترانسكاسپيي كولىك ءدالىزىن دامىتۋعا باعىتتالعان ءىرى ينفراقۇرىلىمدىق جوبالاردى ىسكە اسىرۋعا كوڭىل ءبولىندى.

Anadolu: استانا باكۋ مەن ەريەۆان اراسىنداعى بەيبىت شارت جوباسىن قۇپتايدى
تاياۋدا قازاقستان پرەزيدەنتى قاسىم-جومارت توقايەۆ ارمەنيانىڭ سىرتقى ىستەر ءمينيسترى ارارات ميرزوياندى قابىلدادى. وسى تۇستا قازاقستان تاراپى ەريەۆان مەن باكۋ اراسىنداعى بەيبىتشىلىك جانە مەملەكەتارالىق قاتىناستار تۋرالى كەلىسىم جوباسىنىڭ ءماتىنى بويىنشا كەلىسسوزدەردىڭ اياقتالعانىن قۇپتايتىنىن جەتكىزدى. جاڭالىقتى اقورداعا سىلتەمە بەرە وتىرىپ، تۇركيالىق Anadolu اگەنتتىگى جازدى.

بۇل ايتۋلى وقيعا ارمەنيا مەن ازەربايجان اراسىندا بەيبىتشىلىك ورناۋىنىڭ جارشىسى بولادى جانە ءوڭىردىڭ قازاقستانمەن دە، ورتالىق ازيانىڭ بارلىق ەلدەرىمەن دە ىنتىماقتاستىعىن نىعايتۋعا ىقپال ەتپەك.

قاسىم-جومارت توقايەۆ پرەزيدەنتتەردىڭ وتكەن جىلعى ءوزارا ساپارلارى قازاق- ارميان قارىم-قاتىناستارىنىڭ جان-جاقتى دامۋىنا ەلەۋلى سەرپىن بەرگەنىن اتاپ ءوتتى.

ءوز كەزەگىندە ارميان ديپلوماتى جىلى شىرايلى قابىلداعانى ءۇشىن قازاقستان پرەزيدەنتىنە ريزاشىلىعىن ءبىلدىردى. ديپلوماتيالىق ۆەدومستۆو باسشىسى ارمەنيا مەن قازاقستاننىڭ سىرتقى ىستەر مينيسترلىكتەرى، باسقا دا ۆەدومستۆولارى قاسىم-جومارت توقايەۆتىڭ وتكەن جىلى ەرەۆانعا رەسمي ساپارى بارىسىندا قول جەتكىزىلگەن ۋاعدالاستىقتاردى ىسكە اسىرۋ بويىنشا جۇمىس ىستەپ جاتقانىن حابارلادى.

كەزدەسۋ بارىسىندا ساۋدا-ەكونوميكالىق، ينۆەستيتسيالىق، كولىك-لوگيستيكالىق جانە مادەني-گۋمانيتارلىق سالالارداعى ەكىجاقتى قارىم-قاتىناستاردى دامىتۋ پەرسپەكتيۆالارى قارالدى. قازاقستان پرەزيدەنتى وتاندىق بيزنەستىڭ ارمەنياعا تاۋار جەتكىزۋدى 350 ميلليون دوللارعا ۇلعايتۋعا دايىن ەكەنىن مالىمدەدى.

Trend: ورتا ءدالىزدى كەڭەيتۋ ماسەلەسى تالقىلاندى
قازاقستان، تاجىكستان، تۇرىكمەنستان، قىرعىزستان جانە وزبەكستان سىرتقى ىستەر مينيسترلىگى وكىلدەرىنىڭ قاتىسۋىمەن اشحابادتا ەۋروپالىق وداق پەن ورتالىق ازيانىڭ 20-كەزدەسۋى ءوتتى. اقپاراتتى ازەربايجاندىق Trend باسىلىمى ءبولىستى.

الدىمەن مينيسترلەر 2024 -جىلعى قاڭتاردا بريۋسسەلدە وتكەن Global Gateway ينۆەستورلار فورۋمىنىڭ تابىستى وتكەنىن اتاپ ءوتىپ، ەۋروپالىق جانە حالىقارالىق قارجى ينستيتۋتتارىنىڭ ترانسكاسپي حالىقارالىق كولىك باعىتىنا 10 ميلليارد ەۋرو ينۆەستيسيالاۋ مىندەتتەمەلەرىن قۇپتادى. ولار ورتالىق ازيا مەن ەۋروپا اراسىنداعى بايلانىستاردى جاقسارتۋ، سونداي-اق وڭىرلىك ەكونوميكالىق ءوسىمدى ىنتالاندىرۋ ءۇشىن وسى ءدالىزدىڭ ماڭىزدىلىعىن العا تارتتى.

كەزدەسۋگە قاتىسۋشىلار 2024 -جىلعى ماۋسىمدا ورتا ءدالىز ءۇشىن ۇيلەستىرۋ تۇعىرناماسىن ىسكە قوسۋدى ۇيىمداستىرۋداعى قازاقستاننىڭ جانە 2024 -جىلعى قازاندا جوعارى دەڭگەيدەگى ءىس- شارانى وتكىزۋدە تۇرىكمەنستاننىڭ ءرولى ماڭىزدى بولعانىن ءسوز ەتتى. وڭىرلىك ساۋدا مەن لوگيستيكانى دامىتۋ ءۇشىن وڭتۇستىك كاۆكازبەن ىنتىماقتاستىقتى قۇپتادى.

بۇدان باسقا، ە و مەن ورتالىق ازيا قارىم-قاتىناستارىنداعى ماڭىزدى شيكىزات رەسۋرستارىنا نازار اۋدارۋ ماسەلەسى تالقىلانعان. مينيسترلەر ە و مەن قازاقستان، سونداي-اق ە و مەن وزبەكستان اراسىنداعى جەرگىلىكتى وندىرىستىك- وتكىزۋ تىزبەكتەرىن نىعايتۋعا، حالىقارالىق ستاندارتتارعا سايكەستىككە جانە ورنىقتى ينۆەستيتسيالاردى قولداۋعا باعىتتالعان ستراتەگيالىق ارىپتەستىكتى قولدادى.

ورتا ءدالىز بىرنەشە ەلدەر ارقىلى وتەتىن جانە ازيانى ەۋروپامەن بايلانىستىراتىن كولىك- ساۋدا باعىتى بولىپ تۇر. ول ءداستۇرلى سولتۇستىك جانە وڭتۇستىك دالىزدەرگە بالاما رەتىندە قاراستىرىلۋدا. مارشرۋت قىتايدان باستالىپ، قازاقستان، وزبەكستان جانە تۇرىكمەنستان سياقتى ورتالىق ازيا ەلدەرى ارقىلى وتەدى. سودان كەيىن كاسپي تەڭىزىن، ازەربايجان، گرۋزيا مەن تۇركيانى كەسىپ ءوتىپ، ەۋروپاعا جەتەدى. جىل وتكەن سايىن تاراپتار ءۇشىن بۇل باعىتتىڭ ماڭىزى ارتۋدا.

Daryo: قازاقستان مەن وزبەكستان 2030 -جىلعا قاراي تاۋار اينالىمىن 10 ميلليارد دوللارعا جەتكىزۋدى جوسپارلاۋدا

2024 -جىلى ەكى ەل اراسىنداعى ساۋدا كولەمى 4,3 ميلليارد دوللارعا جەتتى. ءوسىم ازىق-تۇلىك جانە توقىما تاۋارلارىنىڭ، ءتۇستى مەتالداردىڭ، حيميالىق ونىمدەر مەن پلاستماسسادان جاسالعان بۇيىمدار بويىنشا تىركەلگەن. حاباردى وزبەكستاندىق Daryo تاراتتى.

وزبەكستاندا نەگىزىنەن ساۋدا، ءىت، قۇرىلىس، قارجى جانە جىلجىمايتىن مۇلىك سالالارىندا قازاقستاندىق كاپيتالى بار 1042 كاسىپورىن جۇمىس ىستەيدى. قازاقستاندا وزبەكستاندىق كاپيتالى بار 4500 دەن استام كومپانيا تىركەلگەن. بۇل كۇنى كاسىپكەرلەردى قولداۋدى كەڭەيتۋ تۋرالى كەلىسىمگە قول جەتكىزىلگەن.

ناۋرىزدىڭ ورتاسىندا وزبەكستاننىڭ ينۆەستيتسيالار، ونەركاسىپ جانە ساۋدا ءمينيسترى لازيز قۇدراتوۆ پەن قازاقستاننىڭ ساۋدا جانە ينتەگراتسيا ءمينيسترى ارمان شاققالييەۆ كەزدەسكەن. تاراپتار ەكىجاقتى كەلىسىمدەردى ىسكە اسىرۋ جانە ساۋدا-ەكونوميكالىق ىنتىماقتاستىقتى ودان ءارى نىعايتۋ جونىندەگى شارالاردى تالقىلادى.

ونىڭ قورىتىندىسى بويىنشا، 2030 -جىلعا قاراي تاۋار اينالىمىن 10 ميلليارد دوللارعا دەيىن ۇلعايتۋ جونىندەگى باعدارلاماعا قول قويىلدى. ءوڭىر باسشىلارىنىڭ 2025 -جىلعا ارنالعان ساپارلارىنىڭ كەستەسى دە بەكىتىلدى.

وزبەكستان تاراپى «تەرمەز» حالىقارالىق ساۋدا ورتالىعىندا قازاقستاندىق ونىمدەر پاۆيلونىنىڭ اشىلعانىن اتاپ ءوتىپ، ونىڭ سۇرانىستا بولارىنا سەنىم ءبىلدىردى.

اۆتور

ماديار تولەۋوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى