الەمدىك ب ا ق- تاعى قازاقستان: مينيسترلەردىڭ كەزدەسۋى، اسكەري وقۋ-جاتتىعۋ جانە قارجى پيراميداسىن جويۋ

بۇدان بولەك، ازەربايجاندىق تاراپ ەلىمىزبەن اسكەري باعىتتا دا كەزدەسۋلەر وتكىزدى. تولىعىراق kazinform ءتىلشىسىنىڭ شولۋىنان وقي الاسىز.

Anadolu: الماتىدا ت م د سىرتقى ىستەر مينيسترلەرى كەڭەسىنىڭ وتىرىسى ءوتىپ جاتىر

ايتۋلى كەزدەسۋ بارىسىندا دوستاستىق اياسىنداعى ىنتىماقتاستىقتى ودان ءارى نىعايتۋعا باعىتتالعان كەڭ اۋقىمدى ماسەلەلەردى تالقىلاۋ جوسپارلانۋدا. مينيسترلەر كەڭەسىنىڭ وتىرىسى «ورتالىق ازيا - رەسەي» فورماتىندا ءوتىپ جاتىر. جاڭالىقتى Anadolu جازدى.

رەسمي ءبولىم باستالار الدىندا قازاقستان پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ دەلەگاتسيا مۇشەلەرىن قارسىلاپ الدى. ءىس-شارا ءداستۇرلى پروتوكولدىق فوتوسەسسيادان باستالدى، ودان كەيىن مينيسترلەر وڭىرلىك جانە حالىقارالىق ىنتىماقتاستىقتىڭ نەگىزگى ماسەلەلەرىن تالقىلاۋعا كىرىستى.

نۇرتىلەۋ ءوز سوزىندە 2025-جىل دوستاستىق رۋحىندا سوۆەت-گەرمان سوعىسىنداعى جەڭىستىڭ 80 جىلدىعى اياسىندا ءوتىپ جاتقانىن ايتتى.

«قازاقستان ستراتەگيالىق تىل رەتىندە ەرەكشە ءرول اتقاردى. ءبىزدىڭ رەسپۋبليكادان مايدانعا 1,2 ميلليون سارباز جۇمىلدىرىلدى، بۇل ەلىمىزدىڭ بارلىق حالقىنىڭ شامامەن 25 پايىزىن قۇرادى. ءبىز ارميانى ۇدايى ازىق-تۇلىكپەن قامتاماسىز ەتتىك: سوعىس جىلدارى مايدانعا 5 ميلليون توننادان استام نان مەن 800 مىڭ توننا ەت جونەلتىلدى»، - دەدى ول.

دوستاستىق شەڭبەرىندەگى ىنتىماقتاستىقتى ودان ءارى نىعايتۋعا باعىتتالعان كەڭ اۋقىمدى ماسەلەلەردى تالقىلاۋ جوسپارلانۋدا. ساياسي، ساۋدا-ەكونوميكالىق، مادەني-گۋمانيتارلىق جانە ءوزارا ءىس-قيمىلدىڭ وزگە دە سالالارىنداعى كۇش-جىگەردى ۇيلەستىرۋگە ەرەكشە نازار اۋدارىلاتىن بولادى.

سىرتقى ىستەر مينيسترلەرىنىڭ «ورتالىق ازيا - رەسەي» فورماتىنداعى كەزەكتى كەزدەسۋى اياسىندا ءوڭىر ەلدەرىنىڭ ساۋدا-ەكونوميكالىق جانە ينۆەستيتسيالىق، كولىك-لوگيستيكالىق جانە مادەني- گۋمانيتارلىق سالالارداعى، سونداي- اق وڭىرلىك قاۋىپسىزدىكتى قامتاماسىز ەتۋ سالاسىنداعى ءوزارا ءىس-قيمىلىنىڭ وزەكتى ماسەلەلەرىن تالقىلاۋ جوسپارلانعان.

سونىمەن قاتار، ت م د باس حاتشىسى سەرگەي لەبەديەۆ ت م د سىرتقى ىستەر مينيسترلەرى كەڭەسىنىڭ كۇن تارتىبىنە 13 سۇراق پەن 17 جوبالىق قۇجات ەنگىزىلگەنىن حابارلادى.

ونىڭ ايتۋىنشا، وتىرىسقا قاتىسۋشىلار ماقۇلداعان جاعدايدا وسى قۇجاتتاردىڭ التاۋى مەملەكەت باسشىلارى كەڭەسىنىڭ قاراۋىنا شىعارىلادى. اتاپ ايتقاندا، ت م د- نىڭ «1941-1945 جىلدارداعى ەڭبەك داڭقى قالاسى» قۇرمەتتى اتاعىن بەرۋ تۋرالى 13-ماسەلەنى 2025-جىلعى 9-مامىرعا دەيىن اياقتاۋ ءۇشىن جۇمىس تارتىبىمەن مەملەكەت باسشىلارىنا قول قويۋعا جىبەرۋ ۇسىنىلادى.

سونداي-اق، سەرگەي لەبەديەۆ مەملەكەتتىك ىشكى پروتسەدۋرالاردىڭ اياقتالماۋىنا بايلانىستى كۇن تارتىبىنەن ءۇش ماسەلە الىنعانىن اتاپ ءوتتى. الايدا ولارمەن جۇمىس جالعاسۋدا جانە ولار دوستاستىقتىڭ كۇن تارتىبىندە قالادى، ءبىراق كەيىنگە قالدىرىلادى. بۇدان باسقا، الداعى ۋاقىتتا قاراۋعا تاعى دا بەس قۇجات ەنگىزۋ جوسپارلانىپ وتىر.

«بۇگىن قارالىپ جاتقان قۇجاتتار بويىنشا بارلىق ۇسىنىستار مەن ەسكەرتۋلەر كەشە وتكەن كەڭەستە قاتىسۋشى مەملەكەتتەردىڭ وكىلدەرىمەن الدىن الا كەلىسىلدى. وسىلايشا، بارلىق قۇجاتتار ساراپتامالىق پىسىقتاۋدان جانە قاجەتتى كەلىسۋدەن ءوتتى جانە ەسكەرتۋلەرسىز قاراۋعا دايىن»، - دەپ اتاپ ءوتتى لەبەديەۆ.

شاعىن قۇرامداعى وتىرىس اياسىندا دەلەگاتسيا باسشىلارى وزەكتى حالىقارالىق ماسەلەلەر بويىنشا، سونداي-اق ت م د اياسىنداعى ءوزارا ءىس-قيمىل ماسەلەلەرى بويىنشا پىكىر الماسادى.

كەڭەيتىلگەن قۇرامدا 2026-2030-جىلدارعا ارنالعان سىرتقى شەكارالاردا شەكارا قاۋىپسىزدىگىن نىعايتۋ جونىندەگى تمد مەملەكەتتەرىنىڭ ىنتىماقتاستىق باعدارلاماسىنىڭ جوباسىن، سونداي-اق ت م د- داعى ەرىكتىلەر قوزعالىسىنا قاتىستى ماسەلەلەردى تالقىلاۋ جوسپارلانىپ وتىر. وتىرىستى كەلىسىلگەن قۇجاتتارعا قول قويۋ ءراسىمى اياقتايدى.

Trend: ازەربايجان مەن قازاقستاننىڭ قارجى قۇرىلىمدارى اراسىنداعى ىنتىماقتاستىقتى كەڭەيتۋ تالقىلاندى

مادينا ءابىلقاسىموۆا باستاعان ق ر قارجى نارىعىن رەتتەۋ جانە دامىتۋ اگەنتتىگىنىڭ دەلەگاتسياسى ازەربايجانعا باس سۇقتى. سارسەنبى كۇنى Trend ازەربايجان ورتالىق بانكىنە سىلتەمە جاساپ حابارلاعانداي، ورتالىق بانك ءتوراعاسى تالەح كيازيموۆ قازاقستاندىق دەلەگاتسيامەن كەزدەسكەن.

كەزدەسۋدە ورتالىق بانك ءتوراعاسى قازاقستاندىق دەلەگاتسياعا بانك جۇزەگە اسىرىپ جاتقان «2024-2026-جىلدارى قارجى سەكتورىن دامىتۋ ستراتەگياسى» جانە ونىڭ شەڭبەرىندە اتقارىلىپ جاتقان ستراتەگيالىق باستامالار تۋرالى اۋقىمدى اقپارات جەتكىزدى.

كەزدەسۋ بارىسىندا قر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى قارجىلىق تۇراقتىلىقتى، بانكتىك جانە ساقتاندىرۋدى قاداعالاۋدى قامتاماسىز ەتۋ سالاسىندا قولدانىلاتىن تاسىلدەر تۋرالى، سونداي- اق قازاقستان رەسپۋبليكاسىنىڭ قارجى نارىقتارىن رەتتەۋ سالاسىنداعى تاجىريبەسى تۋرالى ەگجەي- تەگجەيلى اقپارات بەردى. سونداي-اق، قازاقستاندا سيفرلاندىرۋ بويىنشا جۇزەگە اسىرىلىپ جاتقان جوبالاردىڭ جانە وسى باعىتتا اتقارىلعان جۇمىستاردىڭ تۇساۋكەسەرى ءوتتى.

كەزدەسۋ قۇرىلىمدار اراسىنداعى ىنتىماقتاستىقتى كەڭەيتۋ مۇمكىندىكتەرىن، سونداي-اق ءوزارا قىزىعۋشىلىق تۋدىراتىن باسقا دا ماسەلەلەردى تالقىلاۋمەن جالعاستى.

Report: قازاقستان مەن ازەربايجان «حازري-2025» بىرلەسكەن تاكتيكالىق وقۋ-جاتتىعۋى بويىنشا كونفەرەنتسيا وتكىزدى

ازەربايجان رەسپۋبليكاسىنىڭ قورعانىس مينيسترلىگى مەن قازاقستان رەسپۋبليكاسىنىڭ قورعانىس مينيسترلىگى اراسىندا قول قويىلعان بىرلەسكەن ءىس- قيمىل جوسپارىنا سايكەس، ەكى ەلدىڭ اسكەري-تەڭىز كۇشتەرىنىڭ كورابلدەرى مەن اسكەري قىزمەتشىلەرىنىڭ قاتىسۋىمەن «حازري-2025» بىرلەسكەن تاكتيكالىق وقۋ-جاتتىعۋىن وتكىزۋگە بايلانىستى جوسپارلانعان كونفەرەنسيا ءوتتى. اقپاراتتى Report تاراتتى.

ازەربايجان قورعانىس مينيسترلىگى حابارلاعانداي، ءىس-شاراعا قازاقستان اسكەري تەڭىز كۇشتەرىنىڭ باس قولباسشىسىنىڭ ءبىرىنشى ورىنباسارى - باس شتاب باستىعى، 1-دارەجەلى كاپيتان قانات نيازبەكوۆ جانە ازەربايجان اتك قولباسشىسىنىڭ ءبىرىنشى ورىنباسارى - شتاب باستىعى 1-دارەجەلى كاپيتان تەيمۋر مۋرشۋدوۆ باستاعان دەلەگاتسيالار قاتىستى.

كەزدەسۋ قورىتىندىسى بويىنشا كاسپيي تەڭىزىنىڭ قازاقستاندىق سەكتورىندا وتەتىن بىرلەسكەن تاكتيكالىق وقۋ- جاتتىعۋلاردى وتكىزۋ جونىندەگى كونفەرەنتسيانىڭ قورىتىندى حاتتاماسىنا قول قويىلدى. وقۋ- جاتتىعۋدىڭ ماقساتى - ازەربايجان مەن قازاقستاننىڭ اسكەري تەڭىزشىلەرىنىڭ كاسىبيلىگىن ارتتىرۋ جانە تاجىريبە الماسۋ.

ت ا س س: قازاقستاندا Qnet قارجىلىق پيراميداسىن ۇيىمداستىرۋشىلار سوتتالدى

قازاقستانداعى Qnet قارجىلىق پيراميداسىن ۇيىمداستىرۋشىلار 6 جىلدان 7 جىلعا دەيىن باس بوستاندىعىنان ايىرىلدى. ولاردىڭ استاناداعى 7 پاتەرى مەن اۆتوكولىگى تاركىلەندى. بۇل تۋرالى رەسپۋبليكانىڭ قارجى مونيتورينگى جونىندەگى اگەنتتىك دەپارتامەنتىنە سىلتەمە جاساي وتىرىپ، رەسەيلىك تاسس مالىمدەدى.

«Qnet قارجىلىق پيراميداسىنىڭ قۇرىلىمدىق بولىمشەسىن ۇيىمداستىرۋ تۋرالى ءىس بويىنشا ۇكىم شىعارىلدى. سوت ۇكىمىمەن قارجى پيراميداسىن ۇيىمداستىرۋشىلار كىنالى دەپ تانىلىپ، ولارعا 6 جىلدان 7 جىلعا دەيىن باس بوستاندىعىنان ايىرۋ جازاسى تاعايىندالدى»، - دەلىنگەن حابارلامادا.

ءىس بويىنشا ايىپتالۋشىلار ازاماتتاردى كوپ دەڭگەيلى ماركەتينگتىك جەلىگە جانە ەلەكتروندىق كوممەرتسياعا اقشا ينۆەستيتسيالاۋعا، سونىڭ ىشىندە QVI Tripsaver ساياحات كارتالارىن جانە زەرگەرلىك بۇيىمداردى ساتىپ الۋعا كوندىرگەن. سالىمدار سوماسى 840 مىڭنان 4 ميلليون تەڭگەگە دەيىن بولعان، مىندەتتى شارت - ادەتتەگىدەي باسقا ادامداردى تارتۋ. قارجىلىق پيراميداعا 63 ميلليون تەڭگەدەن استام قارجى سالىنعان، 51 ازامات تارتىلعان. سوت كىنالىلەردەن 301 ميلليون تەڭگەنىڭ مۇلكىن تاركىلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى