الەمدىك ب ا ق- تاعى قازاقستان: دۇنيەجۇزىلىك بانكتىڭ پاندەميا قورىنان گرانت جانە قىتايمەن اگروەكسپورتتىق سەرپىلىس

Caspian news: تۇرىكمەنستان مەن قازاقستان ازەربايجان ارقىلى مۇناي جەتكىزۋدى ارتتىردى

Caspian news اگەنتتىگى 22-اقپاندا قازاقستان مەن تۇرىكمەنستاننان ازەربايجان اۋماعى ارقىلى ەۋروپالىق نارىقتارعا جەتكىزىلەتىن مۇنايدىڭ كۇرت وسكەنى تۋرالى حابارلادى. ول قاڭتار ايىندا باكۋ- تبيليسي- دجەيحان (ب ت د) قۇبىرى ارقىلى مۇناي تاسىمالداۋدىڭ جالپى كولەمىنىڭ %17,3 - ىن قۇراعان.

اگەنتتىكتىڭ حابارلاۋىنشا، مەملەكەتتىك ستاتيستيكالىق كوميتەت تاراتقان مالىمەتتەرگە سايكەس، قاڭتار ايىندا ب ت د قۇبىرى تۇرىكمەنستان مەن قازاقستاننان 430000 توننادان استام مۇناي تاسىمالدادى.

SOCAR مەن «قازمۇنايگاز» ۇلتتىق ەنەرگەتيكالىق كومپانياسى اراسىندا قول قويىلعان باس كەلىسىمنەن كەيىن ەنەرگياعا باي قازاقستان وتكەن جىلدان باستاپ ب ت د قۇبىرى ارقىلى ءوز مۇنايىن ەكسپورتتاي باستادى. بۇل كەلىسىم جىل سايىن 1,5 ميلليون توننا مۇناي تاسىمالداۋعا مۇمكىندىك بەرەدى، ەكى تاراپ جىل سايىن باكۋ مەن اقتاۋ پورتتارى اراسىندا 12-14 تانكەر رەيسىن ورىنداۋعا مىندەتتى.

وتكەن جىلى ازەربايجان قازاقستانعا باكۋ- سۋپسا مۇناي قۇبىرى ارقىلى بەس ميلليون توننا قازاقستاندىق مۇنايدى تاسىمالداۋدى ۇسىندى. سوڭعى قىرىق جىلدا اشىلعان ەڭ ءىرى مۇناي كەن ورىندارىنىڭ ءبىرى قاشاعان مۇنايى وسى باعىت بويىنشا تاسىمالدانادى دەپ كۇتىلۋدە.

Daryo.uz: قازاقستان دۇنيەجۇزىلىك بانكتىڭ پاندەميا قورىنان وتەۋسىز گرانت الدى

19-اقپاندا Daryo اگەنتتىگى قازاقستاننىڭ دەنساۋلىق ساقتاۋ مينيسترلىگى دۇنيەجۇزىلىك دەنساۋلىق ساقتاۋ ۇيىمىمەن (د د ۇ) بىرلەسە وتىرىپ جانە دۇنيەجۇزىلىك بانكتىڭ قولداۋىمەن 15-اقپاندا قازاقستاندا پاندەمياعا قارسى قوردىڭ سالتاناتتى اشىلۋىن وتكىزدى دەپ جازدى. بۇل باستاما ەلدىڭ بولاشاقتاعى ىقتيمال پاندەمياعا توزىمدىلىگىن نىعايتۋعا باعىتتالعان. قازاقستان د د س ۇ ەۋروپا وڭىرىندەگى گرانت العان 36 ەلدىڭ ءبىرى بولدى. رەسپۋبليكاعا 19 ميلليون ا ق ش دوللارى كولەمىندە ەلدىك گرانت بەرىلدى.

پاندەميا قورىنىڭ اتقارۋشى باسشىسى پريا باسۋ قازاقستاندى عانا ەمەس، سونىمەن قاتار ورتالىق ازيا ايماعىن جانە ودان تىسقارى اۋماقتاردى بولاشاقتا پاندەميا قاۋپىنەن قورعاۋعا ۇجىمدىق مىندەتتەمە بار ەكەنىن ەرەكشە اتاپ ءوتتى. ول دەنساۋلىق ساقتاۋ ينفراقۇرىلىمىن، ەپيدەميولوگيالىق قاداعالاۋدى، شەكارالىق باقىلاۋ شارالارىن، زەرتحانالىق قاۋىپسىزدىكتى، جەدەل انىقتاۋ جانە ارەكەت ەتۋ تەتىكتەرىن نىعايتۋ ءۇشىن قور رەسۋرستارىن پايدالانۋدىڭ ماڭىزدىلىعىن ايتتى.

«جوبا تەك قازاقستاندى عانا ەمەس، سونىمەن قاتار ورتالىق ازيا ايماعىن جانە ودان تىسقارى ايماقتاردى بولاشاق پاندەميا قاۋپىنەن قورعاۋ جونىندەگى ءبىزدىڭ ورتاق مىندەتتەمەمىزدى بىلدىرەدى»، - دەدى پريا باسۋ پانەلدىك سەسسيا بارىسىندا.

بۇل باستاما ماڭىزدى كەزەڭدە جۇزەگە اسىرىلۋدا، ويتكەنى جاھاندىق دەنساۋلىق ساقتاۋ سالاسى كليماتتىڭ وزگەرۋى كەزەڭىندە پاندەميا قاۋپىنە تاپ بولادى. پريا باسۋ الداعى 25 جىلدا تاعى ءبىر COVID ءتارىزدى پاندەميانىڭ پايدا بولۋ ىقتيمالدىعى % 50 دان اسادى دەگەن ساراپشىلاردىڭ بولجامدارىنا سىلتەمە جاساي وتىرىپ، بولاشاق دەنساۋلىق ساقتاۋ سالاسىنداعى توتەنشە جاعدايلارعا بەلسەندى دايىندىقتىڭ ماڭىزدىلىعىن اتاپ ءوتتى.

Azernews: قازاقستان ءۇشىن ورتا ءدالىزدى دامىتۋدىڭ ماڭىزى زور

Azernews اقپارات اگەنتتىگى ساۋدا- ەكونوميكالىق ىنتىماقتاستىق جونىندەگى قازاقستان- گەرمانيا ۇكىمەتارالىق جۇمىس توبىنىڭ وتىرىسى بارىسىندا ق ر يندۋستريا جانە قۇرىلىس ءمينيسترى قانات شارلاپايەۆ قازاقستان ءۇشىن ورتا ءدالىزدى دامىتۋدىڭ ماڭىزى زور ەكەنىن مالىمدەگەنى تۋرالى حابارلادى.

اگەنتتىكتىڭ مالىمدەۋىنشە، ق ر يندۋستريا جانە قۇرىلىس ءمينيسترى گەرمانيامەن ستراتەگيالىق سينەرگيا كونتينەنتارالىق تاسىمالداۋ باعىتتارىنىڭ، سونىڭ ىشىندە ەنەرگيامەن قامتاماسىز ەتۋ باعىتتارىنىڭ توعىسقان جەرىندەگى قولايلى گەوگرافيالىق ورنالاسۋىمەن ۇيلەسۋى قازاقستاننىڭ وڭىرلىك ينۆەستيتسيالىق حاب جانە جاھاندىق ەنەرگەتيكالىق ارەناداعى نەگىزگى ويىنشىلاردىڭ ءبىرى رەتىندەگى ۇستانىمىن نىعايتاتىنى تۋرالى ايتقان.

«ترانسكاسپي حالىقارالىق تاسىمالداۋ باعىتىن دامىتۋدىڭ ەۋروپاعا ەنەرگەتيكالىق رەسۋرستار مەن ستراتەگيالىق تاۋارلاردىڭ سەنىمدى جەتكىزۋشىسى رەتىندە قازاقستان ءۇشىن ۇلكەن ماڭىزى بار»، - دەپ ءمينيستردىڭ ءسوزىن كەلتىرەدى Azernews ماقالاسىندا.

ماقالادا ورتا ءدالىز ورتالىق ازيا، كاۆكاز، تۇركيا جانە شىعىس ەۋروپا ەلدەرى ارقىلى قىتاي مەن ەۋروپالىق وداقتىڭ كونتەينەرلىك تەمىرجول جۇك تاسىمالداۋ جەلىلەرىن بايلانىستىراتىنى تۋرالى جازىلعان. كوپجاقتى مۋلتيمودالدى كولىك ينفراقۇرىلىمى كاسپي جانە قارا تەڭىزدەردىڭ پاروم تەرمينالدارىن قىتاي، قازاقستان، ازەربايجان، گرۋزيا، تۇركيا، ۋكراينا جانە پولشانىڭ تەمىرجول جۇيەلەرىمەن بايلانىستىرادى. ورتا ءدالىز قىتايدان تۇركياعا، سونداي- اق ەۋروپا ەلدەرىنە جانە كەرى باعىتتاعى جۇك تاسىمالىنىڭ ارتۋىن جەڭىلدەتەدى. وسى ءدالىز بويىمەن جۇرەتىن مارشرۋتتىق پويىز قىتايدان ەۋروپاعا جۇكتى ورتا ەسەپپەن 20-25 كۇندە جەتكىزەدى جانە بۇل كولىك ءدالىزىنىڭ باستى ارتىقشىلىقتارىنىڭ ءبىرى.

eurasianet: قازاقستان قىتايمەن اگروەكسپورتتىق سەرپىلىسكە قول جەتكىزدى

21-اقپاندا eurasianet اگەنتتىگى قىتاي قازاق ەتىنىڭ يمپورتىنا سالىنعان تىيىمدى الىپ تاستاۋعا كەلىسكەنى تۋرالى حابارلادى. الايدا اگەنتتىكتىڭ حابارلاۋىنشا، قازاقستاندىق شەنەۋنىكتەر ديپلوماتيالىق ەڭبەگىنىڭ جەمىسىن كورۋى ءۇشىن ءبىراز ۋاقىت قاجەت بولۋى مۇمكىن، ويتكەنى لوگيستيكالىق تار جولدار شەكارا ارقىلى جۇك تاسىمالىنا كەدەرگى كەلتىرۋدە.

ق ر اۋىل شارۋاشىلىعى مينيسترلىگىنىڭ مالىمەتىنشە، قىتايدىڭ بۇل شەشىمى قازاقستاندىق قۇس ەتىن، شوشقا جانە سيىر ەتىن يمپورتتاۋعا قاتىستى. ايتا كەتەيىك، قازاقستاندىق قۇس ونىمدەرىن قىتايعا كىرگۋگە قاتىستى تىيىم 2005 -جىلدان بەرى بار ەدى. شوشقا مەن سيىر ەتىنە شەكتەۋلەر 2022 -جىلى مال اراسىندا اۋسىل ىندەتىنەن كەيىن كۇشىنە ەنگەن ەدى.

«قازاقستاندىق يمپورت قايتا جاندانۋى مۇمكىن، دەگەنمەن قىتاي شەنەۋنىكتەرى يمپورتتىڭ قاتاڭ پارامەترلەرىن بەلگىلەدى. قازىر قىتايعا تەك ەكى زاۋىت 8 مىڭ تونناعا دەيىن مۇزداتىلعان ەتتى جونەلتە الادى» - دەلىنگەن حابارلامادا.

ەسەپتە ەت يمپورتىنا ارنالعان كۆوتانىڭ مەرزىمى كورسەتىلمەگەن. ماقالادا قازاقستاننىڭ ەت وداعىنىڭ ءتوراعاسى ماقسۇت باقتىبايەۆ قازاقستان قىتايدا باسقا جەتكىزۋشىلەردىڭ ەت ونىمدەرىنە قاتىستى قاتاڭ باسەكەلەستىككە تاپ بولعانى تۋرالى جازعان.

«ءبىز ۇندىستانمەن جانە برازيليامەن باسەكەلەسۋگە ءماجبۇر بولامىز، ولاردىڭ ونىمدەرى الدەقايدا ارزان، ءوندىرىس شىعىندارى تومەن جانە ۇزاق ۋاقىتتان بەرى اياققا نىق تۇرعان»، - دەپ كەلتىرەدى باقتىبايەۆتىڭ ءسوزىن ماقالا اۆتورى.

ايتا كەتەيىك، قازاقستاندىق ەت ەكسپورتىنىڭ قايتا جاندانۋى 2023 -جىلى قىتايعا استىق جەتكىزۋدىڭ ارتۋىنا بايلانىستى ورىن الدى.

Akipress: قازاقستان مەن وزبەكستان شەكارالاس ونەركاسىپ كەشەنىن سالادى

Akipress اگەنتتىگى وزبەكستان- قازاقستان شەكاراسىندا ونەركاسىپتىك كووپەراتسيا كەشەنىنىڭ قۇرىلىسى بيىل تامىز ايىندا باستالاتىنى تۋرالى حابارلادى. قازاقستاننىڭ تۇركىستان وبلىسى مەن وزبەكستاننىڭ سىرداريا وبلىسىنىڭ سىرداريا اۋدانىندا سالىناتىن ونەركاسىپ كەشەنى 100 گەكتارعا جۋىق جەردى الىپ جاتىر. جوباعا سايكەس نىساندا ءوندىرىس پەن كوتەرمە ساۋداعا جاعداي جاسالادى.

ماقالادا جوبا وزبەكستانعا جۇمىس ساپارىمەن كەلگەن قازاقستاننىڭ ساۋدا جانە ينتەگراتسيا ۆيتسە- ءمينيسترى قايرات تورەبايەۆ، سىرداريا اۋدانىنىڭ اكىمى اكمالجون ماحمۋداليەۆ باستاعان دەلەگاتسيانىڭ جانە مۇددەلى مينيسترلىكتەر مەن ۆەدومستۆولاردىڭ وكىلدەرىنىڭ قاتىسۋىمەن تالقىلانعانى جازىلعان.

وندىرىلگەن ءونىم ءۇشىنشى ەلدەرمەن قاتار وزبەكستان مەن قازاقستان نارىعىنا دا ەكسپورتتالاتىنى ايتىلدى. ءوزارا تاۋار اينالىمىنىڭ كولەمى 10 ميلليارد دوللارعا دەيىن وسەدى دەپ كۇتىلۋدە. كەشەندى تولىق پايدالانۋ جانە ونى كوممەرتسيالىق ماقساتتا پايدالانۋ مەرزىمى 2030 -جىلعا بەلگىلەنگەن. كەشەن تۇركىستان جانە سىرداريا وبلىستارىنىڭ جالپى وڭىرلىك ءونىمىن ارتتىرۋعا جانە شەكارالاس اۋماقتاردى ءىرى لوگيستيكالىق ورتالىققا اينالدىرۋعا ىقپال ەتەدى. كەزدەسۋ قورىتىندىسى بويىنشا تاراپتار بىرلەسكەن قۇجاتقا قول قويدى.

اۆتور

ۆەنەرا جولامان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى