الەمدەگى ەڭ قايىرىمدى جانە قايىرىمسىز ەلدەر قايسى

World Giving Index حالىقارالىق ۇيىمى وسىلاي دەيدى. بۇل ءتىزىمدى يندونەزيا باستاپ تۇر. ياعني، يندونەزيالىقتار باسقاعا قاراعاندا سوعىس پەن اشارشىلىقتان قاجىعان ەلدەرگە ءبىرىنشى بولىپ كومەك قولىن سوزعان. تاعى بىرنەشە مەملەكەت ءبىز بىلمەيتىن قۇندى قاسيەتتەرىمەن ەرەكشەلەنىپتى.

ءبىراق ادام الاسى ىشىندە. وزىنەن ارتىلعاننىڭ وزگەگە بۇيىرماعانىن قالايتىندار دا بار. بۇل قالاي؟

جاپوندار قايىرىمدىلىق جاساۋعا اسىقپايدى

جاپوندىقتار كوشەدە كۇلىمسىرەپ، وتكەن-كەتكەنمەن، ءتىپتى بەيتانىس جانمەن دە باس يزەپ امانداسادى. ءبىر قاراعاندا سىپايى. ءبىراق وزگەگە دۇنيە بەرۋگە كەلگەندە ساراڭ.

Charities Aid Foundation دۇنيەجۇزىلىك قايىرىمدىلىق يندەكسى كەلتىرگەن مالىمەتكە قاراعاندا، 2023 -جىلدىڭ ەڭ قايىرىمسىز ەلى وسى جاپونيا. ادامي قۇندىلىقتار ساراپقا تۇسكەن باعدارلاماعا 142 مەملەكەت قاتىسقان. سولاردىڭ اراسىنان كۇنشىعىس ەلى ەڭ سوڭعى ورىندى ەنشىلەگەن. ويتكەنى جاپون مادەنيەتىندە قايىرىمدىلىق جاساۋ ءداستۇرى وزگە ەلدەردەگىدەي ەمەس. بۇل حالىق «ءوز ماسەلەڭدى ءوزىڭ شەش» دەگەن قاعيدانى ۇستانادى. جاپوندار كومەك سۇراۋدى السىزدىك دەپ قابىلداۋى مۇمكىن. ولار ءۇشىن جەكە جاۋاپكەرشىلىك پەن ءوزىن-ءوزى قامتاماسىز ەتۋ - باستى قۇندىلىق.

شۆەدتەر سالقىنقاندى كەلەدى

اڭگىمە بۇزاۋ ەمىزەدى، بۇزاۋ تاياق جەگىزەدى. شۆەد جۇرتىنىڭ ۇستانىمى وسى. بۇل حالىق ءۇشىن بەيتانىس اداممەن اڭگىمە- دۇكەن قۇرۋ زايا كەتكەن ۋاقىت بولىپ ەسەپتەلەدى. ويتكەنى ولار كوپ سويلەمەيدى. ءسوز تەك اقپارات الماسۋ ءۇشىن قاجەت. سول سەبەپتى كوشەدە تانىستارىن كەزىكتىرىپ، كوز ءتۇيىستىرىپ قالماس ءۇشىن سمارتفونعا نەمەسە دۇكەن اتاۋلارىنا قاراعانسىپ جۇرەدى. ساتۋشى نەمەسە داياشىمەن اڭداپ سويلەسەدى. كوڭىل-كۇيىنە قارايدى. ايتپەسە، ءبىر عانا ءسوز قارسى تاراپتىڭ شامىنا ءتيۋى مۇمكىن.

ساراپشىلار شۆەدتەردىڭ ۇستامدى مىنەزىن ەرتەرەكتە حالىقتىڭ سيرەك قونىستانعانىمەن بايلانىستىرادى. بۇل سوناۋ 1960 -جىلدان بەرى قالىپتاسقان ءۇردىس. ول كەزدە شۆەتسياعا باراتىندار از بولعان.

ەللي ەدۆاردسون، كوممۋنيكاتسيا بويىنشا مامان:

- شۆەدتەر ءاۋ باستان اڭگىمەشىل ەمەس. ولارعا از-كەم تىلدەسۋدىڭ ءوزى قيىنعا سوعادى. ءتىپتى كۇن رايىن سۇراي المايسىڭ. ولار تەك قانداي دا ءبىر تاقىرىپ توڭىرەگىندە سول سالانىڭ مامانىمەن پىكىر الماسقاندى ءجون كورەدى. ماسەلەن كۇن رايى تۋرالى ءسوز بولسا، ونى مەتەرەولوگتان سۇراۋ الدەقايدا ءتيىمدى دەپ سانايدى.

كورەيلەر كورشىسىمەن امانداسپايدى

كارىستەر دە كىسىكيىك. ولار ەت جاقىنى بولماسا، جاتپەن ءتىل تابىسۋعا شورقاق. ءتىپتى سالەم بەرۋگە سەسكەنەدى. ءوتىپ بارا جاتقان بەيتانىس ادامعا كۇلىمسىرەمەيدى. ءجۇزىن الا قاشادى. ەگەر الدەكىم كەزدەيسوق امان-ساۋلىق سۇراسىپ، كۇلىپ قاراسا دا، ەلەمەي ءوتىپ كەتۋگە تىرىسادى. ىشتەي «مەن سەنى بىلەمىن بە؟» دەگەن سىڭاي تانىتادى. مۇنىڭ باستى سەبەبى - ولاردىڭ ادامنىڭ جەكە كەڭىستىگىنە دەگەن قۇرمەتى. سونداي-اق بۇل حالىق ءۇشىن ەڭ قۇندى رەسۋرس - ۋاقىت. سول سەبەپتى قاجەتى بولماسا، بەيتانىس اداممەن پىكىر الماسۋدى ءجونسىز سانايدى.

2024 -جىلدىڭ ەڭ جومارت ەلى - يندونەزيا

ارينە، ءار حالىقتىڭ ءوز قۇندىلىقتارى بار. بىزگە وعاش كورىنگەن دۇنيە وزگەلەر ءۇشىن قالىپتى ءداستۇر بولۋى مۇمكىن. ولاردىڭ قۇرمەتى، سالتى، نانىم-سەنىمى بولەك. مىسالعا يندونەزيالىقتار - ەڭ جومارت حالىق. بۇل - Charities Aid Foundation ۇيىمى كەلتىرگەن مالىمەت. حالىقارالىق قۇرىلىم قاتىسۋشى ءار ەلدىڭ بەيتانىس ادامعا كومەك كورسەتۋ، قايىرىمدىلىق جاساۋ سياقتى قۇندىلىقتارىن ساراپقا سالعان. ءسويتىپ، يندونەزيا بىلتىر وسىمەن جەتىنشى جىل قاتارىنان ءبىرىنشى ورىندى يەلەنگەن. كەنيا ەكىنشى ورىنعا جايعاسسا، ۇزدىك ۇشتىكتى سينگاپۋر قورىتىندىلادى. ءسويتىپ، سينگاپۋرلىقتار جالپى يندەكس كورسەتكىشىن %49- تەن %61- كە دەيىن ارتتىردى. ساراپشىلا مۇنى ەلدەگى قايىرىمدىلىق پەن ەرىكتىلىكتى ىنتالاندىرۋعا باعىتتالعان باعدارلامالاردىڭ ناتيجەسى دەيدى. يندونەزياداعى حالىقتىڭ %90- ءى يگى ءىس جاساۋعا ۇمتىلادى. مۇقتاج جانعا مەيىرىمىن توگىپ، قايىرىمدىلىق كورسەتۋگە تىرىسادى. %63- ءى ەرىكتىلەر.

بۇل ەل تاياۋ شىعىستا قاقتىعىس باستالعان ساتتە گازاعا قۇنى 2 ميلليارد ا ق ش دوللارىنا تەڭ 50 توننادان استام گۋمانيتارلىق جۇك جونەلتكەن ەلدەردىڭ العاشقىسى.

مەيىرىمگە مۇقتاج جاندار كوپ

تاياۋ شىعىس دەمەكشى، قازىر گازا سەكتورىندا 2 ميلليونداي ادام ءبىر ءتىلىم نانعا مۇقتاج. الەمنىڭ كوپ ەلى ءبىر جەڭنەن قول، ءبىر جاعادان باس شىعارىپ، قولداۋ كورسەتىپ جاتىر. كومەك جەرمەن دە، كوكپەن دە، ءتىپتى تەڭىز ارقىلى جەتكىزىلەدى. تەك الەمدە مۇنداي مەيىرىم توككەن جاندار عانا ەمەس، قايىرىمى جوقتار دا كوپ. سوعىس اشىپ وتىرعاندار دا سولار. ال الگى ءبىر ءۇزىم نانعا زار، كىرىپتار جۇرتتار باردا الەمدە مەيىرباندىق، ىزگىلىك سالتانات قۇرىپ تۇر دەپ ايتۋعا كەلمەس.

24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى