الەمدەگى ەڭ بيىك ءارى ەڭ جىلدام ليفتى تۋرالى نە بەلگىلى؟
استانا. قازاقپارات - الەمدەگى ەڭ بيىك ءارى جىلدام ليفت تۋرالى بىلەسىز بە؟ ول تۋرالى نە بەلگىلى؟ 1 مينۋتتا 326 مەتر بيىككە كوتەرىلەتىن ليفت قايدا ورنالاسقان؟
بايلۋن نەمەسە «ءجۇز ايداھار» ليفتى قىتايداعى جاڭجياجيە ۇلتتىق ساياباعىندا ورنالاسقان. ول تۋريستەردى بىرنەشە مينۋت ىشىندە 326 مەتر بيىكتىككە كوتەرەدى.
بۇل ليفت بىردەن ءۇش رەكورد بويىنشا گيننەستىڭ رەكوردتار كىتابىنا ەنەدى:
ەڭ جىلدام جولاۋشىلار ليفتى؛
ەڭ بيىك ليفت؛
الەمدەگى ەڭ ۇلكەن جۇك كوتەرگىش ليفت.
جۇك كوتەرگىشتىگى 3750 كەلى دەيىنگى 3 ەكى قاباتتى كابيناسى 60 سەكۋندتا 100-گە جۋىق تۋريستى كوتەرىپ-تۇسىرەدى. ال ءبىر ساعاتتا 1380 تۋريست مىنە الادى.
ليفتىڭ قۇرىلىسى 1999 -جىلى باستالىپ، 2002 -جىلى پايدالانۋعا بەرىلدى.
جەر سىلكىنسە، نە بولماق؟
ليفتىدە سەيسميكالىق داتچيكتەر بار. جەر سىلكىنسە، ادامدار از ۋاقىتتا ەۆاكۋاتسيالانىپ، جەرگە تۇسىرىلەدى. ءبىر قىزىعى، تۋريستەر بۇل ليفتىگە ءمىنۋ ءۇشىن ءتىپتى 4 ساعاتتاپ كەزەك كۇتەدى.
جاڭجياجيە ۇلتتىق ساياباعىنان ليفتكە كىرەبەرىسىندە «اۆاتار» ءمۇسىنى تۇر. مۇندا رەجيسسەر دجەيمس كامەروننىڭ «اۆاتار» فيلمى تۇسىرىلگەن.
ساياباققا كىرۋ قۇنى - 248 يۋان نەمەسە 17 مىڭ تەڭگە. بۇل باعاعا 3-4 كۇن ارالاۋعا مۇمكىندىك بەرىلگەن، ال ليفتكە ءبىر رەت ءمىنىپ-ءتۇسۋ ءۇشىن 72 يۋان (4932 تەڭگە) تولەۋىڭىز كەرەك.
ايتا كەتەيىك، ليفت اۋا رايى قولايسىز بولعاندا جابىلادى. جالپى، جاڭجياجيەدە ىلعال جانە تروپيكالىق كليمات. كوبىنە كۇن شىعىپ، جاڭبىر جاۋادى. قىس قىسقا، ال جاز ۇزاق بولادى. مۇندا اياز نەمەسە اپتاپ ىستىق بولمايدى. جازدا اۋانىڭ ورتاشا تەمپەراتۋراسى 27 گرادۋس.
