الماتىنى جاڭاجىلدىق بەزەندىرۋگە 800 ميلليون تەڭگە جۇمسالادى
الماتى. KAZINFORM - مەگاپوليستە «الماتىنىڭ 8 كەرەمەتى: وتباسىلىق مەرەكە - تاڭعاجايىپ جاڭا جىل» اتتى اۋقىمدى باعدارلاما ازىرلەندى.
الماتى اكىمدىگىنەن ءمالىم ەتكەندەي، قالانىڭ بارلىق 8 اۋدانىن قامتيتىن مەرەكەلىك ءىس-شارالار 20-جەلتوقسانادا باستالىپ، 31-جەلتوقسانعا دەيىن جالعاسادى.
- بيىل الماتى قالاسىنىڭ جاڭا جىلدىق بەزەندىرۋىنە شامامەن 800 ميلليون تەڭگە ءبولىندى. دەگەنمەن، وتكەن جىلعى ينستاللياتسيالاردى بارىنشا قالپىنا كەلتىرىپ، پايدالانۋدىڭ ارقاسىندا، ءارى مادەنيەت سالاسىنداعى مەكەمەلەردىڭ بەلسەندى قاتىسۋى ناتيجەسىندە مەرەكە وتكەن جىلمەن سالىستىرعاندا الدەقايدا اۋقىمدى بولماق، - دەپ اتاپ ءوتتى قالا اكىمدىگىنەن.
قالانىڭ جاڭا جىلدىق بەزەندىرىلۋى
الماتى جاڭا جىل قارساڭىندا اۋەجايدان باستاپ ورتالىق الاڭدارعا دەيىن ەرەكشە بەزەندىرىلەدى. قالا اۋماعىندا 300 گە جۋىق ەرتەگى كەيىپكەرى مەن مەرەكەلىك نىسان بەينەسىندەگى ينستالياتسيا ورناتىلادى، ونىڭ ىشىندە قايتا جوندەۋدەن وتكەن بىلتىرعى 120 شاعىن ساۋلەت ءپىشىنى (ش س پ) دە قولدانىلادى. نەگىزگى كوشە بويىنداعى اعاشتار جارىقديودتى شامدارمەن جانە گيرلياندالارمەن بەزەندىرىلەدى. جالپى، 12 كوشە مەن داڭعىل بويىندا 1500 جارىق ەلەمەنتى ورناتىلادى، ونىڭ 350 ى وتكەن جىلى قولدانىلعان كرونشتەيندەر.
سونىمەن قاتار، قالاداعى 21 عيماراتتىڭ قاسبەتى ارحيتەكتۋرالىق جارىقپەن كومكەرىلىپ، الماتىعا جاڭا جىل قارساڭىندا ەرەكشە كورىك بەرەدى. الماتىنىڭ باس سيمۆولدارىنىڭ ءبىرى - «كوكتوبە» تەلەمۇناراسى جاڭاجىلدىق ستيلدە بەزەندىرىلىپ، قالا تۇرعىندارى مەن قوناقتارىن مۋلتيمەديالىق بەينەكورىنىسپەن قۋانتادى.
جاڭا جىلدىڭ باستى سيمۆولدارى
العاش رەت قالانىڭ نەگىزگى الاڭدارىنا قاڭقالى ەمەس، كلاسسيكالىق ەۋروپالىق ستيلدەگى ەرەكشە دىڭگەكتى شىرشالار قويىلادى. الماتىداعى باس شىرشانىڭ بيىكتىگى 22 مەتر بولادى، ول ءداستۇر بويىنشا رەسپۋبليكا سارايىنىڭ الدىنداعى اباي اتىنداعى الاڭدا ورناتىلماق. شىرشانى بەزەندىرۋگە جارقىن دەكوراتسيالار، ءىرى بانتتار، 6 شاقىرىم گيرلياندا جانە قايتا وڭدەلگەن ەكولوگيالىق قاۋىپسىز ماتەريالداردان جاسالعان ويىنشىقتار قولدانىلادى.
جالپى، بيىل الماتى قالاسىندا 80-نەن استام شىرشا ورناتىلادى. ءار شىرشانى بەزەندىرۋ ءۇشىن 4-6 شاقىرىم گيرلياندا پايدالانىلادى. شىرشالار تۇڭعىش پرەزيدەنت ساياباعىندا، رەسپۋبليكا الاڭىندا، «حالىق ارەنا» مۇز ايدىنىندا، «الماتى ارەنا» كوپفۋنكتسيونالدى كەشەنىندە، ن. ساتس اتىنداعى مەملەكەتتىك اكادەميالىق بالالار مەن جاسوسپىرىمدەر تەاترىندا، ناۋرىزباي اۋدانى امفيتەاترىندا، اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا، ايگىلى الماتى تسيركىنىڭ الدىندا، ساۋدا ورتالىقتارىنىڭ اۋماعىندا، ساياباقتاردا، سكۆەرلەردە جانە قالا تۇرعىندارى ءجيى دەمالاتىن باسقا دا قالانىڭ نەگىزگى ورىندارىندا بوي كوتەرەدى.
مەرەكە باعدارلاماسى
20-جەلتوقساندا ساعات 19:00-دە رەسپۋبليكا سارايى الدىندا الماتىنىڭ باس شىرشاسى سالتاناتتى تۇردە جاعىلادى.
شارا بارىسىندا Turar ،Dakelot ،Adill، مادي رىمبايەۆ، دينايا، Astro توبى، Malika Yes، بالجان بيداش، ALPHA توبى سياقتى ەسترادا جۇلدىزدارى ونەر كورسەتەدى. اياز اتا مەن اقشاقار دا مەرەكەنىڭ باستى قوناعى بولادى.
استانا الاڭىندا بيىكتىگى 22 مەترلىك شىرشا مەن ۇلتتىق ناقىشتا بەزەندىرىلگەن اياز اتانىڭ كيىز ءۇيى ورناتىلادى. 20-جەلتوقساننان باستاپ مۇندا جارمەڭكە، شەبەرلىك ساباقتارى مەن ويىندار ۇيىمداستىرىلادى. ال باستى جاڭاجىلدىق كونسەرت ءداستۇر بويىنشا 31-جەلتوقسان كۇنى ق ب ت ۋ الدىندا ساعات 21:00-دە وتەدى.
ءال- فارابي داڭعىلىنىڭ بويىنداعى «نۇرلى تاۋ» بيزنەس-ورتالىعىنىڭ الدىندا 20-جەلتوقساندا جاڭا جىلدىق جارمەڭكە مەن فۋد-كورت ايماعى اشىلادى. 26-31-جەلتوقسان ارالىعىندا مۇندا ارنايى ورناتىلعان ساحنادا لايۆ-بەند توپتارى ونەر كورسەتەدى. مۇندا بيىكتىگى 19 مەترلىك شىرشا، جارقىن ينستاللياتسيالار جانە بەزەندىرىلگەن اعاشتار ەرەكشە مەرەكەلىك اتموسفەرا قالىپتاستىرادى.
اربات لوندوننىڭ كارنابي-ستريت ستيلىندە بەزەندىرىلەدى. جاياۋ جۇرگىنشىلەر ايماعىندا جارىق توننەلدەر، جۇلدىزدار مەن شارلاردان جاسالعان كومپوزيتسيالار ورناتىلادى. 20-31-جەلتوقسان ارالىعىندا مۇندا كلاسسيكالىق جانە ساندىك شاعىن شىرشالار جارمەڭكەسى وتەدى. سونداي-اق ارباتتا بەلگىلى ورىنداۋشىلار مەن جاس مۋزىكانتتاردىڭ ونەر كورسەتۋى، سۋرەتشىلەر كورمەسى جانە وتباسىلىق ويىندار جوسپارلانعان.
مەملەكەتتىك قۋىرشاق تەاترى 20-30-جەلتوقسان ارالىعىندا بالالارعا «سيقىرلى اينا» ويىن-ساۋىق باعدارلاماسى مەن گانس حريستيان اندەرسەننىڭ «قار حانشايىمى» ەرتەگىسى بويىنشا قويىلىم ۇسىنادى.
الماتىلىق سيرك 21-جەلتوقساننان 2025 -جىلدىڭ 21-قاڭتارىنا دەيىن «قار حانشايىمى» اتتى لازەرلىك شوۋ مەن جاڭا جىلدىق قويىلىم ۇسىنادى. مەرەكە قارساڭىندا ارتيستەر جاڭا تسيرك نومىرلەرى مەن ەكسكليۋزيۆتى كوستيۋمدەر دايىندادى. سونداي-اق بالالار ءۇشىن ماسكەۋدەگى نيكۋلين سيركىنىڭ ارتيستەرى مەن يسپانيادان كەلگەن سايقىمازاق ونەر كورسەتەدى.
قالاداعى 8 اۋداننىڭ ءارقايسىسىندا اياز اتا مەن ەرتەگى كەيىپكەرلەرىنىڭ شەرۋى، جارمەڭكەلەر، كورمەلەر، كونسەرتتەر مەن ويىندار ۇيىمداستىرىلادى.
اۆتور
الما مۇقانوۆا
