الماتىنىڭ بۇرىنعى باس ساۋلەتشىسىنە سوت ۇكىمى شىقتى

ولار قۇرىلىستى زاڭسىز ۇيلەستىردى جانە مەملەكەتتىك جەرگە قاتىستى الاياقتىق جاسادى دەپ ايىپتالدى.

ۇكىمدى سۋديا مارتپەك كاكىمجانوۆ وقىدى.

الماسحان احمەدجانوۆ كىنالى دەپ تانىلدى. سوت وعان 11 جىلعا باس بوستاندىعىنان ايىرۋ جازاسىن تاعايىندادى، سونداي-اق، مۇلكى تاركىلەنىپ، مەملەكەتتىك قىزمەت اتقارۋعا تىيىم سالىندى. ول جازاسىن قاۋىپسىزدىگى ورتاشا مەكەمەدە وتەيدى.

سوت الماتىنىڭ جەر قاتىناستارى باسقارماسىنىڭ بۇرىنعى باسشىسى ارداق سامامبەتوۆتى دە كىنالى دەپ تانىدى. وعان بەلگىلى ءبىر لاۋازىمداردى اتقارۋعا ءومىر بويى تىيىم سالۋمەن قاتار، 10 جىلعا باس بوستاندىعىنان ايىرۋ جازاسى تاعايىندالدى.

ۇكىم زاڭدى كۇشىنە ەنگەن جوق.

2023-جىلعى 19-ماۋسىمدا سىبايلاس جەمقورلىققا قارسى قىزمەت الماتى قالالىق جوسپارلاۋ جانە ۋربانيستيكا باسقارماسىنىڭ بۇرىنعى باسشىسى ۇستالعانىن حابارلادى. ۆەدومستۆو مالىمەتىنشە، شەنەۋنىك جەر ۋچاسكەلەرىن بەرۋ جانە نىسانداردىڭ قۇرىلىسىن كەلىسۋ كەزىندە لاۋازىمدىق وكىلەتىن اسىرا پايدالاندى دەگەن كۇدىككە ىلىنگەن.

كەيىن الماتى اكىمدىگى ونىڭ قاماۋعا الىنعانعا دەيىن بىرنەشە اي بۇرىن قالانىڭ باس ساۋلەتشىسى قىزمەتىنەن كەتكەنىن حابارلادى.

2023-جىلعى قاراشادا احمەدجانوۆقا قاتىستى تەرگەۋ الماتىنىڭ تاۋ بوكتەرىندەگى قۇرىلىس كەزىندەگى سىبايلاس جەمقورلىق تاۋەكەلدەرىن تالداۋ ناتيجەلەرى بويىنشا قوزعالعانى بەلگىلى بولدى.

احمەدجانوۆ 2018-جىلعى جەلتوقساننان 2023-جىلعى مامىرعا دەيىن ۋربانيستيكا باسقارماسىنىڭ باسشىسى بولدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى