الماتىنىڭ «الاتاۋ» تەاترىندا جاڭا ماۋسىم پرەمەرامەن اشىلدى
الماتى. KAZINFORM - «الاتاۋ» ءداستۇرلى ونەر تەاترى VIII ماۋسىمنىڭ شىمىلدىعىن ءتۇردى. جاڭا ماۋسىم «Alatau FM radiosy» سپەكتاكلىنىڭ پرەمەراسىمەن اشىلدى.
«الاتاۋ» تەاترىنىڭ ديرەكتورى ماقسات نۇراليەۆ ماۋسىماشار كونفەرەنسيا كەزىندە تەاتردىڭ جوسپارلارىمەن ءبولىستى.
- وسكەلەڭ ۇرپاقتى تاربيەلەپ، جاقسى باعىتتا قالىپتاسۋى ءۇشىن جاقسى دۇنيەلەردى وسى تەاترىمىزدا قويىپ ءجۇرمىز. بىلتىر ماۋسىمدى پرەمەرامەن جاۋىپ، بيىل پرەمەرامەن اشىپ جاتىرمىز. بۇگىنگى «Alatau FM radiosy» قويىلىمىنان بولەك، «ءبىرجان سال» قويىلىمىن جارىققا شىعارۋ جوسپارىمىزدا بار. كەلەسى جىلى نۇرعيسا تىلەنديەۆ اعامىزدىڭ 100 جىلدىعىنا، سونداي-اق قورقىت اتا جايىندا سپەكتاكل قويۋ ويىمىزدا بار، - دەدى تەاتر ديرەكتورى.
ال «Alatau FM radiosy» مۋزىكالىق كومەدياسىنىڭ رەجيسسەرى ەسلام نۇرتازين جاڭا قويىلىمدا كورەرمەندەردى ءازىل-قالجىڭى جاراسقان بۇگىنگى كۇننىڭ كەيىپكەرلەرى مەن جاندى داۋىستاعى ەرەكشە اندەر كۇتەتىنىن اتاپ ءوتتى.
- كوكتەمدە جاڭا دۇنيە جاسايىق دەپ اقىلداسىپ، مۋزىكالىق كومەدياعا توقتادىق. ەفرات شاريپوۆ، شىڭعىس مامان دەگەن جاس اۆتورلار وسى پەسانى جازدى، ەرمەك مەدەنوۆ كومپوزيتورى بولدى. قويىلىمعا تەاترداعى ءانشى-بيشىلەرىمىزدىڭ ءبارىن قوسۋعا تىرىستىق. شىنى كەرەك، بۇل - وتە قيىن جانر. جەڭىل قابىلدانادى، ءبىراق جاسالعان كەزدە كوپ ەڭبەكتى تالاپ ەتەدى، - دەدى ەسلام نۇرتازين.
ەسكە سالايىق، بۇعان دەيىن الماتىدا اۋەزوۆ اتىنداعى قازاق ۇلتتىق دراما تەاترىنىڭ 99- ماۋسىمى اشىلعانىن جازعانبىز.
سونداي- اق الماتى قۋىرشاق تەاترى بىرنەشە حالىقارالىق فەستيۆالدە جۇلدەلى بولعانىن جازعان بولاتىنبىز.
اۆتور
دوسبول اتاجان
