الماتىنىڭ 2025-2027 -جىلدارعا ارنالعان بيۋدجەتى قابىلداندى
الماتى. KAZINFORM - الماتى قالاسىنىڭ ءماسليحاتىنىڭ كەزەكتەن تىس XXV سەسسياسىندا دەپۋتاتتار الداعى ءۇش جىلعا ارنالعان قالا بيۋدجەتىن قولداپ، بەكىتتى.
قالا ءماسليحاتىنان اتاپ وتكەندەي، كەلەسى جىلى بيۋدجەت كولەمى 2 تريلليون 177 ميلليارد تەڭگە شاماسىندا بولادى. بۇل 2022 -جىلدىڭ باسىمەن سالىستىرعاندا ەكى ەسەگە كوپ. نەگىزگى قارجىلاندىرۋ باعىتتارى كولىك جانە ينجەنەرلىك ينفراقۇرىلىمدى دامىتۋعا، الەۋمەتتىك باعدارلامالاردى جۇزەگە اسىرۋعا جانە قالانىڭ ەكولوگيالىق جاعدايىن جاقسارتۋعا باعىتتالعان. الەۋمەتتىك سالا باسىمدىق بولىپ قالا بەرەدى، ونىڭ قارجىلاندىرۋى %15 عا (110,6 ميلليارد تەڭگەگە) ۇلعايىپ، 851,9 ميلليارد تەڭگەگە نەمەسە جالپى بيۋدجەتتىڭ %39,1 ىنا جەتتى.
«2025 -جىلعا ارنالعان بيۋدجەت الماتىنى بۇكىل ەل ءۇشىن ۇلگى رەتىندە تۇراقتى دامۋشى قالا رەتىندە كورسەتەدى. بۇل بيۋدجەت قازىرگى زامانعا ساي، جايلى قالا قۇرۋعا باعىتتالعان، وندا ءاربىر تۇرعىن ومىرىندەگى وڭ وزگەرىستەردى سەزىنە الادى. بۇل ءماسليحات پەن اكىمدىك اراسىنداعى بىرلەسكەن جۇمىستىڭ نەگىزگى مىندەتتەردى ءتيىمدى شەشۋگە مۇمكىندىك بەرەتىنىن كورسەتەتىن مىسال»، - دەدى ەربولات دوسايەۆ.
سەسسيا اياسىندا دەپۋتاتتار الماتى قالاسىن دامىتۋدىڭ 2021-2025 -جىلدارعا ارنالعان تۇزەتىلگەن جوسپارىن قابىلدادى. وزگەرىستەر ق ر-نىڭ 2029 -جىلعا دەيىنگى جاڭا ۇلتتىق دامۋ جوسپارىمەن ۇيلەستىرۋگە بايلانىستى ەنگىزىلدى. جاڭارتىلعان جوسپاردا جايلى قالالىق ورتا، تۇراقتى ەكونوميكالىق ءوسۋ، جاسىل الماتى، ۋربانيزاتسيانى باسقارۋ، قاۋىپسىزدىك جانە سيفرلىق تەحنولوگيالاردى دامىتۋ سياقتى باعىتتار كوزدەلگەن.
