الماتىلىقتار قونايەۆتىڭ ەسكەرتكىشىنە گۇل شوقتارىن قويدى
بۇگىن الماتىدا اسا كورنەكتى مەملەكەت جانە قوعام قايراتكەرى، ءۇش مارتە سوتسياليستىك ەڭبەك ەرى، قازاق ك س ر عىلىم اكادەمياسىنىڭ اكادەميگى، تەحنيكا عىلىمدارىنىڭ دوكتورى دىنمۇحامەد قونايەۆتىڭ ەسكەرتكىشىنە گۇل شوقتارىن قويۋ ءراسىمى ءوتتى.
سونداي-اق د. ا. قونايەۆتىڭ مەموريالدى پاتەر-مۋزەيىندە ەكسكۋرسيا ۇيىمداستىرىلدى، دەپ حابارلايدى Kazinform.
ءىس-شاراعا جينالعان زيالى قاۋىم وكىلدەرى مەن تۋعان- تۋىستارى مەملەكەت جانە قوعام قايراتكەرىنىڭ ءومىرى مەن ەلىمىزدىڭ دامۋىنا قوسقان ۇلەسى تۋرالى ەستەلىكتەرىمەن ءبولىستى.
«قونايەۆتىڭ ءوزىنىڭ تۋعان بالالارى بولمادى، تاعدىرى سولاي بولدى. ول كىسى تۋعان-تۋىستارىنا، جاقىن جيەندەرىنە جالپى جاستارعا ەرەكشە قارايتىن. مىسالى، جەلتوقسان وقيعاسى كەزىندە جاستار ءۇشىن قاتتى ۋايىمدادى. ول كىسى وتە مەيرىمدى جان ەدى. ءتىپتى، قول استىنداعى قىزمەتكەرلەرى جۇمىستارىن قاجەتتى دەڭگەيدە اتقارا الماسا، ولاردىڭ كوڭىلىنە قاياۋ تۇسىرمەي جەتكىزەتىن»، - دەيدى مەملەكەت جانە قوعام قايراتكەرىنىڭ تۋىسى ەلدار قونايەۆ.
مەموريالدى پاتەر-مۋزەيىنىڭ جەتەكشىسى ەلەنا كۋباشيەۆانىڭ ايتۋىنشا، دىنمۇحامەد قونايەۆتىڭ مۇراجاي ءۇيى قونايەۆتى تەك مەملەكەت قايراتكەرى رەتىندە عانا ەمەس، شىنايى ومىردە بولعان تۇلعا رەتىندە دە اشىپ كورسەتەدى.
«مۋزەي 2002-جىلى د. قونايەۆتىڭ 90 جىلدىعىنا وراي اشىلعان بولاتىن. ون جىلدان كەيىن اتامىز تۇرعان ءۇي، ياعني، پاتەرى دە مۋزەي بولىپ اشىلدى. مۇندا 8 مىڭنان استام جادىگەر بار. مۋزەيگە كەلۋشىلەر قونايەۆتىڭ ءجۇرىپ وتكەن جولىمەن تانىسا الادى. مۋزەيدەگى ەڭ قۇندى دۇنيەلەردىڭ ءبىرى اتامىزدىڭ ءىس ساپارالارىندا تۇسكەن فوتولارى. بۇل جەردەن اقپاراتتى قازاق، ورىس جانە اعىلشىن تىلىندە الۋعا بولادى. بىلتىر مۋزەيگە 35 مىڭنان استام ادام كەلدى»، - دەيدى مۋزەي جەتەكشىسى ەلەنا كۋباشيەۆا.
بۇگىن دىنمۇحامەد قونايەۆتىڭ تۋعانىنا - 112 جىل.
دىنمۇحامەد احمەت ۇلى قونايەۆ 1912-جىلى 12- قاڭتاردا قازىرگى الماتى قالاسىندا دۇنيەگە كەلگەن. 1930-جىلى الماتىداعى 14№ ورتا مەكتەپتى بىتىرگەن دىنمۇحامەدتى قازاقستان ولكەلىك كومسومول كوميتەتى 1931-1936-جىلدارى ماسكەۋدەگى ءتۇستى مەتالل ينستيتۋتىنا وقۋعا جىبەرەدى. 1936-جىلى وسى ينستيتۋتتان تاۋ-كەن ينجەنەرى ماماندىعىن الىپ شىققان ول 1937-1939-جىلدارى بالقاش مىس قورىتۋ كومبيناتىنىڭ قوڭىرات رۋدنيگىنە جۇمىسقا ورنالاسىپ، وندا بۇرعىلاۋ ستانوگىنىڭ ءماشينيسى، سەح باستىعى، رۋدنيكتىڭ باس ينجەنەرى جانە ونىڭ ديرەكتورى بولدى.
