الماتىلىق شەبەر يننوۆاتسيالىق كيىز ۇيلەر جاسايدى
استانا. قازاقپارات - الماتىلىق شەبەر مارات بەكسۇلتانوۆ ەرەكشە كيىز ۇيلەر جاسايدى، دەپ حابارلايدى 24kz.
ءداستۇر مەن يننوۆاتسيا ۇيلەسىم تاپقان كيىز ءۇي قولدانىسقا ىڭعايلى، جىلى، جارىق، ءارى ونى قۇرىپ، جيناۋ وتە وڭاي. بۇل ىسپەن قوسا، قولونەر شەبەرى ەسكى ساندىقتاردى جيناۋمەن اينالىسادى. ونىڭ كوللەكسياسىندا قازىر 60-تان استام ساندىق بار.
ءبىر قاراعاندا زاماناۋي قازاق ءۇيدىڭ كوز ۇيرەنگەن ءداستۇرلى كيىز ۇيدەن ايىرماشىلىعى بايقالمايدى. كەرەگەسى بار، ۋىعى تارتىلعان، شاڭىراعى ورنىندا. شەبەر ءداستۇردى بۇزباي، اتا-بابامىزعا تۇراق بولعان ءۇيدى اسا ىجداحاتپەن جاساپ شىققان. ەرەكشەلىگى، ديودتى جارىق ەنگىزىلىپ، جىلۋ ۇستايتىن ەسىك-تەرەزەلەر ورناتىلعان. كيىزدىڭ ءيىسىن ۇناتپايتىندار ءۇشىن سىرتقى جابدىعىن ىلعالعا ءتوزىمدى ماتەريالدان جاساپتى. ەڭ باستىسى، كيىز ءۇيدى 20 مينۋتتا قۇرۋعا بولادى. قولشاتىر سياقتى جينالاتىن كيىز ءۇيدى تاسىمالداۋ دا وڭاي. زاماناۋي كيىز ءۇيدى جاساۋعا ءبىر اي ۋاقىت كەتىپتى.
مارات بەكسۇلتانوۆ، شەبەر:
- يننوۆاتسيانىڭ پايداسى كوپ، سەبەبى جارىق تۇسەدى ەرەكشە ءتۇر بەرەدى. جىلۋ ساقتايدى. ونىڭ ەرەكشەلىگى، بۇكىل ەلەمەنتتەرى كەرەگە، ۋىق، شاڭىراق ءبىر-بىرىمەن بۋىنداپ قوسىلعان. سوندا ادامنىڭ مۇشەسى سياقتى قيمىلداپ جينالادى دا، بۇزىلادى، ءبىر كونسترۋكسيا رەتىندە.
ون ساۋساعىنان ونەر تامعان شەبەر جىگىت ءوزى ويلاپ تاپقان يننوۆاتسيالىق ءادىسىن پاتەنتتەپ العان. ايتۋىنشا، ءوزى رەسەيدە تۋىپ وسكەن. 90-جىلدارى قازاقستانعا كوشىپ كەلىپ، وسى جەردە جوعارى ءبىلىم الادى. ءىرى كومپانيادا بايلانىس ينجەنەرى بولىپ جۇمىس ىستەيدى. كەيىننەن ۇستالىققا بەت بۇرىپ، قولونەرگە دەن قويادى.
مارات بەكسۇلتانوۆتىڭ تاعى ءبىر قىزىعۋشىلىعى - ەسكى ساندىقتاردى جيناۋ. قازىر ونىڭ كوللەكسياسىندا قازاقستاننىڭ تۇكپىر-تۇكپىرىنەن اكەلىنگەن 60-تان استام ساندىق بار. كونەنىڭ كوزى سانالاتىن بۇيىمدار ءار كەزەڭدەگى ۇستالاردىڭ تەحنيكاسىنان حابار بەرەدى. جاسالعانىنا عاسىرعا جۋىقتاعان مىنا ساندىقتى ماڭعىستاۋ وڭىرىنەن اكەلگەن.
مارات بەكسۇلتانوۆ، شەبەر:
- ەسكى ەكسپوناتتاردى ساقتاپ قالۋ، ونى ەرتەڭ مۇمكىن مەندە ودان دا كوپ بولىپ كەتەر، ۇلكەن مۋزەي بولىپ كەتەر، ءبىزدىڭ وسى حالىققا ۇلكەن ۇلگىسى تيەدى، ۇلتتىق قۇندىلىقتار قورى دەپ مۋزەيگە اينالىپ كەتسە ەكە دەپ ۇمىتتەنەمىن.
ماراتتىڭ ارمانى - كيىز ءۇيدى تەك ناۋرىز مەرەكەسىندە نەمەسە كاسىپ ءۇشىن قولدانىپ قانا قويماي، تۇرمىستا پايدالانىلسا دەيدى. ءومىر سۇرۋگە قولايلى بولۋ ءۇشىن يننوۆاتسيالىق كيىز ءۇيدى جەتىلدىرىپ، وعان بالامالى قۋات كوزىن ورناتۋدى جوسپارلاپ وتىر.
