الماتىدان كوكتەمدە 1200 ۇلان اسكەرگە شاقىرىلادى
الماتى. KAZINFORM - الماتىدا مەرزىمدى اسكەري قىزمەتكە كوكتەمگى شاقىرۋ ناۋقانى 1-ناۋرىزدا باستالىپ، 30-ماۋسىمعا دەيىن جالعاسادى. بۇل تۋرالى وڭىرلىك كوممۋنيكاتسيالار قىزمەتى بريفينگىندە الماتى قالاسى قورعانىس ىستەرى دەپارتامەنتىنىڭ زاڭ قىزمەتىنىڭ باستىعى داۋرەنبەك شەگەبايەۆ ايتتى.
سپيكەردىڭ سوزىنشە، بيىل اقپان ايىنىڭ باسىندا قر پرەزيدەنتى 2024-جىلى مەرزىمدى اسكەري قىزمەتكە شاقىرۋ تۋرالى جارلىققا قول قويدى. 1-ناۋرىزدان باستاپ اكىمدەر ورىنباسارلارىنىڭ توراعالىعىمەن قالالىق جانە اۋداندىق شاقىرۋ كوميسسيالارى ازاماتتاردى كوكتەمگى مەرزىمدى اسكەري قىزمەتكە شاقىرۋدى باستادى.
«شاقىرۋ ناۋقانى 1-ناۋرىزدا باستالىپ، 30-ماۋسىمعا دەيىن جالعاسادى. 30-ماۋسىمعا دەيىن رەسپۋبليكاداعى قارۋلى كۇشتەردىڭ، باسقا دا اسكەرلەر مەن اسكەري قۇرىلىمداردىڭ قاتارى اسكەرگە شاقىرۋدى كەيىنگە قالدىرۋعا نەمەسە بوساتۋعا نەگىزدەرى جوق 18 بەن 27 جاس ارالىعىنداعى 20 مىڭنان استام ەر اداممەن تولىعادى. كوكتەمگى شاقىرۋ ناۋقانىنا الماتى قالاسى بويىنشا 1200 ازامات اسكەرگە شاقىرىلادى. ونىڭ ىشىندە قر قارۋلى كۇشتەرى قاتارىنا – 860، شەكارا قىزمەتىنە - 250 ازامات، قالعان ازاماتتار مەملەكەتتىك كۇزەت قىزمەتى، توتەنشە جاعدايلار مينيسترىلگىنىڭ، ۇلتتىق ۇلاننىڭ اسكەري بولىمدەرىنە شاقىرىلادى. جىل سوڭىنا دەيىن الماتى قالاسى بويىنشا 2500 گە جۋىق اازاماتتى اسكەرگە شاقىرۋ جوسپارلانعان»، - دەدى داۋرەنبەك شەگەبايەۆ.
اسكەرگە شاقىرىلۋشىلاردى حاباردار ەتۋ ءبىرىڭعاي بايلانىس ورتالىعىنىڭ 1414 سەرۆيسى ارقىلى SMS حابارلامالاردى، سونداي-اق ءۇي جانە جۇمىس مەكەنجايلارىنا جىبەرىلەتىن دەربەس شاقىرۋ قاعازدارىن جىبەرۋ ارقىلى جۇزەگە اسىرىلادى. مەرزىمدى اسكەري قىزمەتتەن كەيىن جاس جىگىتتىڭ ۇ ب ت- دا جيناعان بالدارى ەسكەرىلمەي، اسكەري جانە ازاماتتىق جوعارى وقۋ ورىندارىنا تۇسۋگە قۇقىعى بار، ال مەرزىمدى قىزمەتتە ەرەكشەلەنگەن ساربازدارعا وقۋ ورىندارىنان تەگىن وقۋعا گرانتتار بەرىلەتىنىن اتاپ ءوتتى. سونداي-اق اسكەرگە شاقىرىلۋشىلار اسكەري بورىشىن وتەگەن سوڭ ارى قاراي كەلىسىمشارت بويىنشا قىزمەت ەتۋ مۇمكىندىگىنە يە بولادى.
«مەرزىمدى اسكەري قىزمەتتەن كەيىن كەلىسىمشارتتىق نەگىزدە قالعىسى كەلەتىندەر از ەمەس، سەبەبى، مۇندا قولدا بار الەۋمەتتىك پاكەت، اتاپ ايتقاندا، تۇراقتى جالاقى، تەگىن مەديتسينالىق قامتاماسىز ەتۋ، ەرتە زەينەتكە شىعۋ، زاتتاي قامتاماسىز ەتۋ جانە جەكە تۇرعىن ءۇي ساتىپ الۋ ءۇشىن تۇرعىن ءۇي تولەمدەرى بار»، - دەدى داۋرەنبەك شەگەبايەۆ.
ونىڭ ايتۋىنشا، بەيبىت ۋاقىتتا ازاماتتار اسكەري قىزمەتكە شاقىرىلۋدان كەلەسى جاعدايلاردا بوساتىلادى:
- دەنساۋلىق جاعدايى بويىنشا اسكەري قىزمەتكە جارامسىز دەپ تانىلعان؛
- 27 جاسقا تولعاننان كەيىن مەرزىمدى اسكەري قىزمەتكە زاڭدى نەگىزدە شاقىرىلماعان؛
- اسكەري قىزمەت وتكەرۋ كەزەڭىندە قىزمەتتىك مىندەتتەرىن اتقارۋ كەزىندە تۋىستارىنىڭ ءبىرى (اكەسى، اناسى، اعاسى نەمەسە اپكەسى) قايتىس بولعان، قايتىس بولعان نەمەسە ءبىرىنشى نەمەسە ەكىنشى توپتاعى مۇگەدەك بولعان؛
- باسقا مەملەكەتتە اسكەري (بالاما) قىزمەت وتكەرگەن؛
- «ق ر ارناۋلى مەملەكەتتىك ورگاندارى تۋرالى» ق ر 51-بابىنىڭ 9-تارماعىندا كوزدەلگەن جاعدايلاردى قوسپاعاندا، قازاقستان رەسپۋبليكاسىنىڭ ارناۋلى مەملەكەتتىك ورگاندارىندا قىزمەت وتكەرگەندەر؛
- عىلىمي دارەجەسى بار؛
- تىركەلگەن ءدىني بىرلەستىكتەردىڭ ءدىني قىزمەتكەرلەرى.
اسكەري قىزمەتكە شاقىرۋدى كەيىنگە قالدىرۋ زاڭنىڭ 35-بابىنا سايكەس مىناداي نەگىزدەر بويىنشا بەرىلەدى:
- وتباسىلىق جاعدايلار بويىنشا (وتباسى مۇشەلەرىنىڭ اراسىندا مۇگەدەكتىگى بار، نەكەگە تۇرعان جانە وتباسىندا ءبىر جانە ودان دا كوپ بالالارى بار وتباسى اسىرۋشىسى)؛
- وقۋىن جالعاستىرۋ ءۇشىن (قاشىقتىقتان وقىتۋدى قوسپاعاندا، وقۋ كەزەڭىنە)؛
- دەنساۋلىق جاعدايى بويىنشا (شاقىرۋ كوميسسياسىنىڭ شەشىمىمەن)؛
- باسقا سەبەپتەر بويىنشا (قۇقىق قورعاۋ ورگاندارىنا وقۋعا تۇسەتىن پەداگوگتەرگە، دارىگەرلەرگە، دەپۋتاتتارعا، ۇشۋ ەكيپاجدارى مەن كەمەلەرىنىڭ مۇشەلەرىنە، ولارعا قاتىستى انىقتاۋ جۇرگىزىلەدى).
سپيكەر اسكەردەگى قىزمەتتەن جالتارعانى ءۇشىن جاۋاپكەرشىلىكتى دە ەسكە سالدى.
«اسكەري قىزمەتكە شاقىرۋدان جالتارۋ مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا نە 400 ساعاتقا دەيىنگى مەرزىمگە قوعامدىق جۇمىستارعا تارتۋعا نە باس بوستاندىعىن شەكتەۋگە نەمەسە ونى ءبىر جىلعا دەيىنگى مەرزىمگە ايىرۋعا جازالانادى»، - دەدى داۋرەنبەك شەگەبايەۆ.
