الماتىداعى كولىك كەپتەلىسىن رەتتەۋ: قالادان شىعا بەرىستە جاڭا جول وتكەلى سالىنادى

ادامدار كەشكە الماتىدان وبلىسقا شىعۋ ءۇشىن، تاڭەرتەڭ قالاعا كىرۋ ءۇشىن ساعاتتاپ كولىك كەپتەلەسىندە تۇرادى. بۇنىڭ وزەكتى ماسەلەگە اينالعالى ءبىراز جىل بولدى. كولىك كەپتەلىسى تەك «التىن- وردا» بازارى اۋماعىندا جانە تالعار باعىتىندا عانا ەمەس، سونىمەن قاتار مەگاپوليسكە اپاراتىن شىعىس، باتىس جانە سولتۇستىك باعىتتاعى نەگىزگى جولداردا بايقالادى.

الماتى وبلىسىنىڭ جولاۋشىلار كولىگى جانە اۆتوموبيل جولدارى باسقارماسى كولىك كەپتەلىسى ماسەلەسىن شەشۋگە باعىتتالعان شارالار تۋرالى ماعلۇمات بەردى.

الاتاۋ قالاسىنا قاراي جول وتكەلى سالىنادى

ۆەدومستۆونىڭ حابارلاۋىنشا، جوبالىق- سمەتالىق قۇجاتتاما ازىرلەنىپ، مەملەكەتتىك ساراپتامادان ءوتتى. قازىر الماتى وبلىسى ىلە اۋدانى (دامۋ اۋدانى) 6,8 شاقىرىمىندا «الماتى- جەتىگەن- قاپشاعاي» سۋ قويماسى جولىنىڭ بويىندا جول وتكەلىنىڭ قۇرىلىسىنا جەر تەلىمدەرىن الىپ قويۋ جۇمىستارى جۇرگىزىلىپ جاتىر. ەگەر بيۋدجەتتەن قارجى بولىنسە، قۇرىلىس جۇمىستارى 2025 -جىلعا جوسپارلانعان.

جول وتكەلى - كولىك قوزعالىسىنىڭ نەگىزگى جولى رەتىندە قاراستىرىلادى. جوبا اياسىندا قولدانىستاعى جولدىڭ ەنى 11 مەتردەن 12 مەترگە دەيىن وزگەرەدى جانە ەكى جولاقتان تۇرادى. ءار باعىتتا ءبىر جولاقتىڭ ەنى 3,75 مەتر.

جول وتكەلىنىڭ جوباسى بويىنشا ەنى 3,75 مەترلىك ەكى باعىت بولادى. ءار باعىتتا ەنى 1 مەترلىك قاۋىپسىزدىك جولاعى جانە جول باعىتتارىن ءبولىپ تۇراتىن جولاقتا قورشاۋ ورناتىلادى. جول باعىتتارىن ءبولىپ تۇراتىن جولاقتىڭ ەنى مەتالل كەدەرگى قورشاۋلاردى ورناتۋ ءۇشىن 3 مەتر بولادى. ال جولاۋشىلارعا ارنالعان جولدىڭ ەنى ەكى جاعىنان دا 1,5 مەترگە جەتەدى.

سونداي-اق، «ۆينوسوۆحوز - چاپايەۆ» جول ۋچاسكەسىن (0,5-0,8 ك م، اشىبۇلاق اينالما جولى) قايتا جاڭارتۋدىڭ جوبالىق-سمەتالىق قۇجاتتاماسى مەملەكەتتىك ساراپتاماعا جولداندى. جوبادا كەڭەيتىلگەن جول بولىگى، قوسىمشا شىعاتىن جولدار جانە باعدارشام قيىلىسىن ورناتۋ قاراستىرىلعان. قايتا قۇرۋ جۇمىستارىن بيۋدجەت قاراجاتى بولىنگەن جاعدايدا 2025 -جىلى باستاۋ جوسپارلانىپ وتىر.

كوشەلەردى ۇزارتۋ

الماتى اگلومەراتسياسى اياسىندا ق ر پرەزيدەنتىنىڭ تاپسىرماسىنا سايكەس الماتى وبلىسىنىڭ اۋماعى ارقىلى التى راديالدى كوشەنىڭ قۇرىلىسى جۇرگىزىلىپ جاتىر. ونىڭ ىشىندە اباي، رىسقۇلوۆ، اقىن سارا، ساين، تىلەنديەۆ جانە سولتۇستىك اينالما كوشەلەرى بار.

- بۇل جوبانىڭ نەگىزگى ماقساتى - كولىك ينفراقۇرىلىمىن جاقسارتۋ، جول جەلىلەرىنىڭ قولجەتىمدىلىگى مەن ساپاسىن ارتتىرۋ، ازاماتتاردىڭ جول ءجۇرۋ ۋاقىتىن قىسقارتۋ. جوبا كولىك اعىندارىن وڭتايلاندىرۋ جانە ەكولوگيالىق تازا تەحنولوگيالاردى ەنگىزۋ ارقىلى جىلدامىراق جانە ىڭعايلى باعىتتاردى قۇرۋعا، اۋانىڭ لاستانۋىن ازايتۋعا باعىتتالعان. سونداي- اق، جول قوزعالىسى قاۋىپسىزدىگىن ارتتىرۋعا ەرەكشە كوڭىل ءبولىنىپ وتىر. بۇل جول-كولىك اپاتتارىن ازايتىپ، جۇرگىزۋشىلەر مەن جاياۋ جۇرگىنشىلەر ءۇشىن جاعداي تۋعىزادى، - دەپ اتاپ ءوتتى وبلىستىق جولاۋشىلار كولىگى جانە اۆتوموبيل جولدارى باسقارماسىنان.

ۆەدومستۆو اۆتوموبيل جولدارى كوميتەتى ق ر ۇلتتىق ەكونوميكا مينيسترلىگىنە تالعار، ەسىك جانە قاسكەلەڭ قالالارىن الماتى قالاسىمەن (الماتى-تالعار-ەسىك - بايدىبەك بي - 68 ك م جانە الماتى- قاسكەلەن- ۇشقوڭىر- ۇزىناعاش - 84 ك م) بايلانىستىراتىن باعىتتاردا جول ينفراقۇرىلىمىن كەڭەيتۋ جانە جاقسارتۋ جوباسى بويىنشا ەكونوميكالىق قورىتىندى الۋ ءۇشىن ينۆەستيتسيالىق ۇسىنىس جاساعانىن مالىمدەدى.

ۇلتتىق ەكونوميكا مينيسترلىگىنەن كەلىسىم العاننان كەيىن جوبالىق- سمەتالىق قۇجاتتامانى ازىرلەۋگە قاراجات ءبولۋ ماسەلەسى رەسپۋبليكالىق بيۋدجەت كوميسسياسىنىڭ قاراۋىنا شىعارىلادى.

الماتىعا الىس-جاقىن ماڭداعى اۋىلداردان كولىگىمەن نە قوعامدىق كولىكپەن قاتىناپ جۇمىس ىستەيتىن ادامدار از ەمەس. مەگاپوليسكە اركىم ءارتۇرلى جولمەن كەلسە دە، ءبارىنىڭ شاعىمى ءبىر، ول - ساعاتتاپ ۋاقىت الاتىن كەپتەلىس.

وسىعان دەيىن Kazinform ءتىلشىسى ۇزىناعاشقا شىعاتىن جولدا بولاتىن كەپتەلىس ماسەلەسىمەن تانىسىپ قايتقان بولاتىن.

بۇل تۇرعىندار كەپتەلىسكە شاعىمداناتىن جالعىز تاسجول ەمەس. كولىك يەلەرى 2021 -جىلدىڭ اياعىندا جاڭا جولايرىعىنىڭ پايدالانۋعا بەرىلگەنىنە قاراماستان، الماتىنىڭ باتىس شىعىسىندا، اسىرەسە، «التىن وردا» بازارى مەن «اپورت» ساۋدا ورتالىعى ماڭىندا بىرنەشە شاقىرىمعا سوزىلاتىن كەپتەلىس كۇندە بايقالاتىنىن ايتادى.

ەسكە سالايىق، 2021 -جىلى «التىن وردا» بازارى ماڭىنداعى «الماتى- رايىمبەك» ۋچاسكەسىندە جاڭا باس ماگيسترالدىق ەستاكادا پايدالانۋعا بەرىلگەن بولاتىن.

سونداي-اق «الماتى- تالعار» تاسجولىنىڭ كەڭەيتىلەتىنىن جازعان ەدىك.

اۆتور

الما مۇقانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى