الماتىداعى جەر سىلكىنىسى كەزىندە دابىل قوسۋ قاجەتتىلىگى تۋعان جوق - نۇرلان اتىعايەۆ

سپيكەردىڭ سوزىنشە، الماتىدا جەر سىلكىنىسى كەزىندە ىسكە قوسىلاتىن 843 ەلەكتر دابىل قۇرىلعىسى بار. ولار جەر ءدۇمپۋى 5 بالدان اسقان كەزدە عانا قوسىلادى.

«تۇندە دابىلدى قوسۋ قاجەتتىلىك تۋدىرعان جوق. سەبەبى، بىزدە 5 بال دەڭگەيىندە بولدى. سونداي-اق ول قوسىلسا تۇرعىندار اراسىندا دۇربەلەڭ تۋدىراتىن ەدى»، - دەدى ۇلتتىق سەيسمولوگيالىق باقىلاۋلار مەن زەرتتەۋلەر عىلىمي ورتالىعىنىڭ ديرەكتورى داۋلەت سارسەنبايەۆ. 

ەسكە سالايىق، الماتى ۋاقىتىمەن 23-قاڭتار كۇنى 00 ساعات 09 مينۋتتا جەر سىلكىندى. جەراستى ءدۇمپۋى مەگاپوليستەن وڭتۇستىك- شىعىسقا قاراي 264 شاقىرىم جەردە، قازاقستان مەن قىرعىزستان شەكاراسى اۋماعىندا بولدى.

ەنەرگەتيكالىق ساناتى - 15.1. MPV تەربەلىسى - 6.7. تەرەڭدىگى - 65 ك م.

جەر سىلكىنىسى الماتىدا 5 بال دەڭگەيىندە (MSK-64 شكالاسى بويىنشا) سەزىلدى.

وسى جولى جەر ءدۇمپۋى قاتتى سەزىلدى. ۇزاق ۋاقىت بويى شايقادى. تۇرىعىندار ۇرەيلەنىپ، ۇيىنەن كوشەگە، دالاعا قاشىپ شىقتى.

الماتى قالالىق توتەنشە جاعدايلار دەپارتامەنتىنە جەر سىلكىنىسى كەزىندە عيماراتتاردىڭ قيراۋى مەن زارداپ شەككەندەر تۋرالى اقپارات تۇسكەن جوق.

مەگاپوليستە دەرەۋ بارلىق جينالۋ نۇكتەسى اشىلدى.

شاھارداعى سەيسميكالىق جاعدايعا بايلانىستى، ەربولات دوسايەۆ جەدەل شتابتىڭ شۇعىل كەڭەسىن وتكىزدى. شۇعىل كەڭەستە ماماندار ودان ءارى ءىس-قيمىل جوسپارىن تالقىلادى.

الماتى تۇرعىندارى قاتتى جەر سىلكىنىسىنەن كەيىن، قالادان جاپپاي كەتە باستادى. كوشەلەردە ۇلكەن كەپتەلىس پايدا بولىپ، جانارماي قۇيۋ بەكەتتەرىندە ۇزىن-سونار كەزەك قالىپتاستى. سونداي- اق، تاكسي باعاسى ءبىر ساپار ءۇشىن 5 مىڭ تەڭگەدەن 20 مىڭ تەڭگەگە دەيىن كوتەرىلدى.

الەۋمەتتىك جەلىلەردە ءال-فارابي اتىنداعى قازاق ۇلتتىق ۋنيۆەرسيتەتىنىڭ جاتاقحانالارى قيرادى دەگەن اقپارات شىقتى. الماتىداعى ستۋدەنتتىك جاتاقحانالاردا جاعداي تۇراقتى ەكەنىن عىلىم جانە جوعارى ءبىلىم مينيسترلىگى حابارلادى.

جەر سىلكىنىسى ناتيجەسىندە 8 ادام زارداپ شەكتى. ءۇش تۇرعىن كوپقاباتتى ءۇيدىڭ ەكىنشى جانە ءۇشىنشى قاباتىنان سەكىرگەن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى