الماتىداعى بالاباقشالاردىڭ بىرىندە ءبۇلدىرشىن اياۋسىز سوققىعا جىعىلدى
الماتى. KAZINFORM - الەۋمەتتىك جەلىلەردە بالاباقشادا بالالاردىڭ توپ ىشىندەگى ءبىر ءبۇلدىرشىندى جابىلىپ ۇرىپ جاتقانى تۋرالى ۆيدەو تارادى.
«ءبىزدىڭ ۇلىمىزدى بالالار اياۋسىز سوققىعا جىققان. ۇرىپ-سوعۋ شامامەن 5 مينۋتقا سوزىلدى. تاربيەشى جوق، ءوز شارۋاسىمەن شىعىپ كەتكەن. بالامىزدىڭ ميى شايقالعان، اۋرۋحاناعا جاتتىق. كىشكەنتاي بالالاردىڭ دا وسىنداي قاتىگەز بولعانى ما؟»، - دەپ جازادى زارداپ شەككەن بالانىڭ اتا-اناسى.
قالالىق ءبىلىم باسقارماسى جاعداي «№51-بوبەكجاي- باقشا» بالاباقشاسىندا بولعانىن ءمالىم ەتتى.
الىنعان تۇسىندىرمە حاتقا سايكەس، تاربيەشى بۇل ۋاقىتتا بالالارعا تۇسكى اس الىپ كەلۋ ءۇشىن شىعىپ كەتكەن. سول سەبەپتى، بالالاردىڭ ءتارتىبىن قاداعالاي الماعان.
«بالاباقشا اكىمشىلىگىنىڭ بۇيرىعىمەن تاربيەشى قاتاڭ سوگىس الدى. سونىمەن قاتار بالاباقشا مەڭگەرۋشىسىنە دە تارتىپتىك جازا قولدانىلدى»، - دەپ حابارلادى الماتى قالالىق ءبىلىم باسقارماسىنان.
اۆتور
الما مۇقانوۆا
