الماتىدا «تاماشا» تەاترىنىڭ 45 جىلدىعىنا وراي كونسەرت وتەدى
الماتى. KAZINFORM - الماتىدا «تاماشا» ءازىل- سىقاق تەاترىنىڭ 45 جىلدىعىنا ارنالعان شوۋ- كونسەرتتىڭ دايىندىعى ءجۇرىپ جاتىر.
بيىل اتى اڭىزعا اينالعان «تاماشا» ءازىل- سىقاق تەاترىنا 45 جىل تولىپ وتىر. مەرەيلى داتاعا وراي تەاتردىڭ تالاي قويىلىمى وتكەن رەسپۋبليكا سارايىندا 9 - جەلتوقسان كۇنى ارنايى شوۋ- كونتسەرت ۇيىمداستىرىلماق. كونسەرت ساعات 19:00 دە باستالىپ، 2-3 ساعاتقا سوزىلادى.
ءىس-شارانىڭ تىزگىنىن باۋىرجان وردا مەن ءلايلا سۇلتان قىزى الادى. ال «تاماشا» تەاترىنىڭ قۇرامىندا بولعان تۇڭعىشباي جامانقۇلوۆ، ليديا كادەنوۆا، گۇلباۋشان تىلەۋبەكوۆا، داناگۇل تەمىرسۇلتانوۆا سىندى ونەر سالاسىنىڭ قايراتكەرلەرى ايتۋلى تەاتر تۋرالى ەستەلىكتەرىمەن ءبولىسىپ، تەاتر ساحناسىندا شىرقالعان اندەردى ورىندايدى. سونداي-اق تەاتردىڭ ۇزدىك ساتيرالىق قويىلىمدارىنان مينياتيۋرا كورسەتىلەدى. كورەرمەن وعان قوسا تەاتردىڭ التىن قورىندا ساقتالعان ەستەلىك بەينەجازبالاردى تاماشالايتىن بولادى.
ودان بولەك مەرەكەلىك كونسەرت بارىسىندا «دوس- مۇقاسان» ، روزا رىمبايەۆا، تولقىن زابيروۆا، پارۆيز نازاروۆ، ءمادينا ءسادۋاقاسوۆا، بەركۋت پەن ايشا، «جىگىتتەر توبى» جانە وزگە دە ەستارادا جۇلدىزدار ءوز ونەرلەرىن پاش ەتەدى.
بۇگىن رەسپۋبليكا سارايىندا مەرەيلى كەشكە قىزۋ دايىندىق ءجۇرىپ جاتىر. جاۋاپتى ماماندار ساحنانىڭ تەحنيكالىق جابدىقتارىن رەتكە كەلتىرىپ جاتسا، بۇل ساحناعا شىعاتىن ارتىستەر ەرتەڭگى قويىلىمدارىنا ءبىر قايتارا دايىندالۋدا.
ەسكە سالايىق، 30 - قاراشادان باستاپ Jibek Joly تەلەارناسىنان اتى اڭىزعا اينالعان «تاماشا» تۋرالى سەريال كورسەتىلە باستادى.
سەريال قازاق حالقىنىڭ ەڭ تانىمال تەاترىنىڭ تاريحىندا بولعان بارلىق ماڭىزدى وقيعالاردى، تانىمال كەيىپكەرلەرمەن، ينتەرمەديالارمەن جانە مۋزىكامەن كورسەتەدى.
سونداي- اق Kazinform فوتوجۋرناليسى الماتىداعى «تاماشا» سەريالىنىڭ ءتۇسىرىلىم بارىسىنان فوتورەپورتاج جاساعان بولاتىن.
