الماتىدا تاعى دا اۆتوبۋس اپاتقا ۇشىرادى: زارداپ شەككەندەر بار
الماتى. KAZINFORM - الماتىدا جانگەلدين مەن تۇلكىباس كوشەلەرىنىڭ قيىلىسىندا قوعامدىق كولىك پەن شاعىن اۆتوبۋس سوقتىعىستى.
ونىڭ ۆيدەوسى الەۋمەتتىك جەلىدە تارادى.
پوليتسيا دەپارتامەنتىنىڭ مالىمەتىنشە، Toyota كولىگىنىڭ جۇرگىزۋشىسى جانگەلدين كوشەسىمەن وڭتۇستىك باعىتتا كەلە جاتىپ، تۇلكىباس كوشەسىنە سولعا بۇرىلا بەرگەندە، سولتۇستىك باعىتتا كەلە جاتقان اۆتوبۋسپەن سوقتىعىستى.
«الدىن الا مالىمەتكە سايكەس، اپات سالدارىنان التى ادام مەديتسينالىق كومەككە جۇگىنگەن. جەتىسۋ اۋداندىق پوليتسيا باسقارماسى قىزمەتكەرلەرى جول-كولىك اپاتىنىڭ ءمان-جايىن انىقتاۋعا كىرىستى»، - دەپ حابارلادى الماتى پوليتسيا دەپارتامەنتىنىڭ باسپا ءسوز قىزمەتى.
ەسكە سالايىق، 26-ماۋسىم كۇنى الماتىدا اۆتوبۋس اپاتقا ۇشىراپ، ءبىر ادام قازا تاپقان بولاتىن.
جول-كولىك وقيعاسىنا «5:32» سەريالىنىڭ پروديۋسەرى سەبەپكەر بولعان.
كەيىن كۇدىكتى دەپ تانىلعان جەڭىل كولىك جۇرگىزۋشىسى انەل سارتايەۆا تەرگەۋ ۋاقىتىندا ءۇي قاماعىندا بولاتىنى تۋرالى جازعان ەدىك.
