الماتىدا سوتتى بولعان 49 بالا مەرەكەنى كولونيادا اتاپ ءوتتى
استانا. KAZINFORM - الماتىدا 49 كامەلەتكە تولماعان بالا مەرەكەنى كولونيادا اتاپ ءوتتى. بۇل تۋرالى Polisia.kz سايتى جازدى.
كامەلەت جاسىنا تولماي سوتتالعاندار وتىراتىن رەسپۋبليكا بويىنشا جالعىز كولونيا الماتى قالاسىندا ورنالاسقان. بۇل الماتى قالاسى، الماتى وبلىسى جانە جەتىسۋ وبلىسى بويىنشا ق ا ج دەپارتامەنتىنىڭ №11-مەكەمەسى، قازىرگى ۋاقىتتا وندا 49 كامەلەتكە تولماعان ۇل بالا ءوز جازاسىن وتەپ جاتىر.
ودان باسقا 4 كامەلەتكە تولماعان قىز بالا الماتى وبلىسى جاۋعاشتى كەنتىندەگى №10 مەكەمە اۋماعىنداعى تاربيە كولونياسىندا جازاسىن وتەيدى.
- جازاسىن وتەپ جاتقان كامەلەتكە تولماعانداردىڭ ىشىنەن 34 جاس ءوسپىرىم اسا اۋىر قىلمىس جاساعان. ەڭ جاس جازا وتەۋشى 15 جاستا. وسىعان قاراماستان، ولار بالا بولىپ قالادى سونداي-اق 1-ماۋسىمدا وزگە بالالارى سياقتى كۇتەدى، - دەپ اتاپ ءوتتى ق ا ج د باستىعى قايرات دالبەكوۆ.
ءداستۇر بويىنشا جىل سايىن كولونيادا بالالار مەرەكەسىن تۋعان-تۋىستارىمەن سالتاناتتى ءىس-شارا ۇيىمداستىرىپ اتاپ وتەدى. 1-ماۋسىمدا جاسوسپىرىمدەردىڭ تۋعان-تۋىستارى مەن جاقىندارى ءۇشىن اشىق ەسىك كۇنى وتكىزىلەدى. سونىمەن قاتار ەسترادا جۇلدىزدارىنىڭ قاتىسۋىمەن كونتسەرتتىك باعدارلاما قويىلادى. بۇل كۇنى سوتتالعانداردىڭ اس ءمازىرى تاتتىلەرگە تولى بولادى.
كولونيا قىزمەتكەرلەرىنىڭ ايتۋىنشا، بالالاردىڭ بارلىعى اتا- انالىق سۇيىسپەنشىلىك پەن كوڭىل بولىنۋگە مۇقتاج، ولاردىڭ كوپشىلىگى تولىق ەمەس جانە قولايسىز وتباسىلاردا وسكەن. كولونيادا جاسوسپىرىمدەر ءۇشىن بارلىق ءومىر ءسۇرۋ جاعدايلارى جاسالىپ، سونداي-اق مەرەكە جانە دەمالىس كۇندەرىن قىزىقتى ۇيىمداستىرۋىنا كوپ كوڭىل بولىنەدى.
جاسوسپىرىمدەرمەن مەكەمە ىشىندە ارنايى پسيحولوگ، تەولوگتار ماماندار جۇمىس ىستەيدى. ق ا ج قىزمەتكەرلەرى بارىنشا بالالاردىڭ بوس ۋاقىتىن ءماندى قىلىپ وتكىزۋگە تىرىسادى. ۇكىمەتتىك ەمەس جانە قوعامدىق ۇيىمدار جازاسىن وتەپ جاتقاندارعا گۋمانيتارلىق كومەك كورسەتەدى.
- ولار قانداي جاعداي بولسا دا بالا بولىپ قالادى. ءبىز ولاردىڭ ءارقايسىسى ءوز قاتەلىگىن ءتۇسىنىپ، تەمىر تورعا قايتا ورالماۋى ءۇشىن بار كۇشىمىزدى سالامىز، - دەپ قوستى ق ا ج د باستىعى.
اۆتور
باقىتگۇل اباي قىزى
