الماتىدا ەسكى اۆتوكولىكتەردىڭ قوزعالىسى شەكتەلۋى مۇمكىن

جيىنعا قاتىسۋشىلاردىڭ ايتۋىنشا، مەگاپوليستەگى نەگىزگى لاستاۋشى فاكتور - ەكولوگيالىق تالاپتارعا ساي كەلمەيتىن ەسكى كولىكتەر. وسىعان بايلانىستى Euro 0 مەن 4 كە دەيىنگى ساناتتاعى تەمىر تۇلپارلاردى ەندى جۇرگىزبەۋ ۇسىنىلدى. ەكولوگيالىق تازا ايماقتارعا كىرەتىن اۆتوموبيلدەر ءۇشىن ارنايى تولەم ەنگىزۋ ماسەلەسى دە قاراستىرىلدى. مۇنداي شارالار الەمنىڭ كوپتەگەن ءىرى قالالارىندا قولدانىلىپ، اۋا ساپاسىن جاقسارتۋعا وڭ اسەرىن تيگىزگەن.

«مەنىڭ ۇسىنىسىم - اۆتوبۋستاردا تەگىن ءجۇرۋ. ياعني، شاھارداعى جولاۋشىلار اعىنىن، قانداي جانە قانشا اۆتوبۋس پاركتەرى بارىن ناقتى انىقتاپ، قالا بيۋدجەتىنەن تولەۋ قاجەت. بۇل شىعىندى كولىك تۇراقتارى اقتاپ الادى. مۇنى دۇرىس ءتۇسىنۋ كەرەك. قالاعا كىرەبەرىس جەرلەردە كولىك جۇرگىزۋشىلەرىنە ارنالعان تۇراق سالىنىپ، سول جەرگە كولىكتەر قويىلادى. ال قالا ورتالىعىنا قاراي اۆتوبۋسپەن تەگىن كەلەدى. سول كەزدە قالانىڭ اۋاسى دا تازارادى»، - دەدى قازاقستان حالىق پارتياسىنىڭ الماتى قالالىق فيليالى ءتوراعاسىنىڭ ورىنباسارى تەمىرلان سۇلتانعاليەۆ.

قوعامدىق كەڭەستىڭ وتىرىسىندا 2024 -جىلعى زەرتتەۋ ناتيجەلەرى دە سارالاندى. ماسەلەن جىلىنا 189 مىڭ توننا لاستاۋشى زاتتاردىڭ 112 مىڭ تونناسى كولىكتەرگە، 52 مىڭ تونناسى ونەركاسىپتىك كاسىپورىندارعا تيەسىلى ەكەن. وسىعان وراي لاستانۋدى ازايتۋ ءۇشىن قاتتى وتىنمەن جۇمىس ىستەيتىن قوعامدىق تاماقتانۋ ورىندارىنا سۇزگىلەر ورناتۋ ۇسىنىلدى. سونىمەن قاتار جەكە ۇيلەر مەن مونشالاردى تولىق گازداندىرۋ جوسپارى قارالدى.

«تازا اۋاعا بايلانىستى كوميسسيا قۇرۋدى ۇسىنىپ وتىرمىز. قۇرامىندا تەك قالالىق بيلىك پەن مەملەكەتتىك ورگاندار عانا ەمەس، سونىمەن قاتار بەلسەندى ازاماتتار، قوعامدىق ۇيىمدار مەن بيزنەس وكىلدەرى دە بولادى. ولار ەكولوگيالىق احۋالدى جاقسارتۋ ءۇشىن جاعدايدى ۇنەمى باقىلاپ وتىرادى. اۋا ساپاسىنا، جالپى ەكولوگياعا بايلانىستى وزگەرىستەر بايقاساق، شارا قابىلدايمىز»، - دەدى قوعامدىق كەڭەستىڭ مۇشەسى اسەت ناۋرىزبايەۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى