الماتىدا ەرلى-زايىپتى قارت كىسىلەردى 56 جاستاعى تانىسى ءولتىرىپ كەتكەن
الماتى. KAZINFORM - الماتىدا جەر ۇيلەردىڭ بىرىنەن ەگدە جاستاعى ەرلى-زايىپتىلاردىڭ ءمايىتى تابىلدى. جەلىدەگى مالىمەتكە سايكەس، ەر ادام 87 جاستا، ال ايەل 89 جاستا بولعان.
الماتى قالاسىنىڭ پوليتسيا دەپارتامەنتى كىسى ءولتىردى دەگەن كۇدىك بويىنشا 56 جاستاعى ايەل ۇستالعانىن حابارلادى. پوليتسيا مالىمەتىنشە، ول قارت كىسىلەردىڭ تانىسى بولعان.
- تۇركسىب اۋداندىق پوليتسيا باسقارماسى كىسى ءولتىرۋ دەرەگى بويىنشا قىلمىستىق ءىس قوزعادى. كۇدىكتى ۇستالىپ، قاماۋعا الىندى. الدىن-الا مالىمەت بويىنشا، 56 جاستاعى ايەل جانجال كەزىندە ءوزىنىڭ تانىستارىن ولتىرگەن. وقيعانىڭ باسقا دا ءمان-جايلارى انىقتالىپ جاتىر، - دەپ حابارلادى قالالىق پ د باسپا ءسوز قىزمەتى.
ەسكە سالايىق، بۇعان دەيىن الماتىدا كولىككە وق اتقاندار ىزدەستىرىلىپ جاتقانىن جازعانبىز.
اۆتور
دوسبول اتاجان
