الماتىدا ەر ادامنىڭ كوز الماسىنا تەمىر كىرىپ كەتتى
الماتى. KAZINFORM - الماتىلىق كوز دارىگەرلەرى جاس جىگىتتىڭ كوزىنە كىرگەن مەتالل سىنىعىن الىپ تاستاپ، كوزدىڭ كورۋ قابىلەتىن ساقتاپ قالدى.
ورتالىق قالالىق كلينيكالىق اۋرۋحانانىڭ قابىلداۋ بولىمىنە كوز الماسىنىڭ جاراقاتىمەن تۇسكەن ناۋقاستىڭ ايتۋىنشا، جيھازعا ارنالعان قۇرىلعىنىڭ تەمىرى كوزىنە ءۇي جاعدايىندا كىرىپ كەتكەن.
وفتولمولوگيا بولىمشەسىنىڭ مەڭگەرۋشىسى گۇلزات ابدرايموۆا، مۇنداي جاراقات كوز الماسىنىڭ جىرتىلۋىنا، كوز لينزاسىنىڭ ىعىسۋىنا، كاتاراكتا، گلاۋكوما، كوزدىڭ شىنى تارىزدەس قاباتىنا قان جينالۋى نەمەسە توردىڭ زاقىمدالۋىنا اكەلۋى مۇمكىن.
دارىگەرلەر كوزدىڭ ىشىندەگى بوگدە زاتتى شىعارىپ الۋ ءۇشىن وپەراتسيا جاسادى.
«وتا ءساتتى ءوتتى، وتادان كەيىن ناۋقاستىڭ كورۋ قابىلەتى تولىقتاي ساقتالدى. كوزگە كىرگەن ارتىق زاتتى الىپ تاستاعان سوڭ، ءبىز ناۋقاس كوزىنىڭ تورلى قاباتىنا لازەرلىك كواگۋلياتسيا جاسادىق. سەبەبى، وتادان كەيىن ناۋقاستا كوزدىڭ كورۋ قابىلەتى تومەندەپ كەتۋ قاۋپى بولدى»،-دەيدى دارىگەر.
ورتالىق قالالىق كلينيكالىق اۋرۋحانادا مۇنداي وتانى جاساۋ ءۇشىن زاماناۋي قۇرىلعىلار بار، ولار ءتۇرلى دارەجەدەگى كوز اۋرۋىن ەمدەۋدە وزىق ناتيجەلەرگە جەتۋگە مۇمكىندىك بەرەدى.
«كوپ جاعدايدا الىپ تاستاۋدى قاجەت ەتەتىن زاتتار كوزگە اۋىل شارۋاشىلىعى، قۇرىلىس جۇمىستارى، اعاشپەن جۇمىس ىستەۋ كەزىندە كىرەدى. سول سەبەپتەن دە مەن جۇمىس ىستەۋ بارىسىندا قاۋىپسىزدىك ەرەجەلەرىن ساقتاپ، قورعانىش كوزىلدىرىگىن كيۋدى ۇسىنامىن»،- دەدى وفتولمولوگ.
