الماتىدا قاي جەرلەرگە قۇرىلىس جۇرگىزۋگە تىيىم سالىنادى

— مەنىڭ اكىم رەتىندە جۇمىسىم نۇكتەلى قۇرىلىس ماسەلەسىنەن باستالدى. مەملەكەت باسشىسىنىڭ تاپسىرماسىمەن 19 نىسان انىقتالىپ، ولارمەن جۇمىس جۇرگىزىلدى، كەيبىرىن بۇزدىق، كەيبىرىن ساتىپ الدىق. بارلىق ماسەلە شەشىلدى. جاڭا قۇرىلىس ەرەجەلەرى مەن قالا قۇرىلىسى رەگلامەنتىندە ءبىز بۇل ماسەلەلەردى بەكىتتىك، — دەدى قالا اكىمى.

جالپى، 2022-جىلدىڭ باسىنان باستاپ الماتىدا قۇرىلىسقا باقىلاۋدى كۇشەيتۋ اياسىندا بارلىعى 69 قۇرىلىس نىسانى، ونىڭ ىشىندە 26 تۇرعىن ءۇي جانە 43 كوممەرتسيالىق نىسان، تولىق نەمەسە جارتىلاي بۇزىلدى.

نەگىزگى بۇزۋشىلىقتار — رۇقسات بەرۋ قۇجاتتارىنىڭ تولىق بولماۋى جانە كەلىسىلگەن جوبالىق ەسكيزدەردەن اۋىتقۋلار. مۇنداي نىسانداردى بۇزۋ سوت شەشىمىمەن جۇرگىزىلەدى.

- ءبىز ۇلكەن جۇمىس اتقاردىق. جاڭا قۇرىلىس ەرەجەلەرى مەن قالا قۇرىلىسى رەگلامەنتىن ازىرلەدىك، ولار قالادا قۇرىلىسقا قاتال شەكتەۋلەر ەنگىزەدى، ياعني نۇكتەلى قۇرىلىس، تاۋ بوكتەرلەرىن، جاسىل ايماقتاردى جانە اۋلا اۋماقتارىن سالۋدى مۇمكىندىگىنشە بولدىرمايدى، — دەدى ەربولات دوسايەۆ.

مىسالى، اباي داڭعىلى مەن ءال- فارابي داڭعىلى اراسىنداعى اۋماقتا 9 قاباتتان جوعارى تۇرعىن ۇيلەر سالۋعا تىيىم سالىنادى، تەك ەرەكشە نىساندارعا رۇقسات بەرىلەدى.

قۇرىلىس تەك قوعامدىق ماڭىزى بار، تۇراقتىلىق پەن ەكولوگيالىق شەشىمدەردىڭ ساقتالۋىن قامتاماسىز ەتەتىن، ەنەرگيا ءتيىمدى جانە رەسۋرستى ۇنەمدەيتىن تەحنولوگيالاردى قولداناتىن جوبالىق نەگىزدەمە بولعان جاعدايدا عانا جۇزەگە اسىرىلادى.

شىعىس اينالما اۆتوموبيل جولىنىڭ وڭتۇستىك بولىگىندە، ءال-فارابي داڭعىلى، ساين جانە جاندوسوۆ كوشەلەرىنىڭ بويىندا، 15 گرادۋس جانە ودان جوعارى ەڭىستەگى تاۋ بەتكەيلەرىندە قۇرىلىسقا تىيىم سالىنادى. رەكونسترۋكتسيا كەزىندە تەرراسالار مەن تەحنيكالىق قاباتتاردى قايتا قۇرىلىمداۋعا دا رۇقسات جوق.

— قالادا III كلاسستان تومەن تۇرعىن ءۇي سالىنبايدى. بارلىق تۇرعىن ۇيلەردىڭ نۇكتەلى ورنالاستىرىلۋى مەن اۋلا اۋماقتارىنداعى قۇرىلىس توقتاتىلادى.

بۇعان قوسا، جاڭا ەرەجەلەر مەملەكەتتىك ورگانداردىڭ كوپقاباتتى تۇرعىن ۇيلەردى قابىلداۋ جانە پايدالانۋ جونىندەگى باقىلاۋ فۋنكتسيالارىن كۇشەيتەدى، سونداي-اق، ساۋلەت-قۇرىلىس باقىلاۋ ورگاندارىنىڭ وكىلەتتىكتەرىن كەڭەيتەدى، — دەپ اتاپ ءوتتى اكىم.

قازىر قۇرىلىس ەرەجەلەرى مەن قالا قۇرىلىسى رەگلامەنتى اشىق تۇردە تالقىلاۋعا ۇسىنىلدى. جىل سوڭىنا دەيىن ولار ءماسليحات دەپۋتاتتارىنا ۇسىنىلاتىن بولادى. ەگەر ماقۇلدانسا، 2025-جىلدىڭ باسىنان باستاپ كۇشىنە ەنەدى.

— ەگەر ءماسليحات جاڭا قۇرىلىس ەرەجەلەرىن ماقۇلداسا، ءبىز قالادا جۇمىس ىستەيتىن نەگىزگى شارتتاردى تۇبەگەيلى بەكىتەمىز جانە جەكە تۇلعالاردىڭ ماسەلەسىن شەشەمىز. ولار بۇگىنگى كۇنى رەتتەۋ ايماعىنان تىسقارى قالىپ، تاۋ بوكتەرىن كەسىپ، جاڭا ۇيلەر سالىپ جاتىر. بۇل ەڭ الدىمەن ولاردىڭ قاۋىپسىزدىگى ءۇشىن ماڭىزدى، — دەدى ەربولات دوسايەۆ.

ايتا كەتەيىك، بۇعان دەيىن دوسايەۆ الماتى مەتروسىنىڭ قۇرىلىسىن جالعاستىرۋ ءۇشىن قارجى كەرەك ەكەنىن ايتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى