الماتىدا قاڭتار كەزىندە كىسى ولتىرگەن اسكەري 7 جىلعا سوتتالدى
الماتى. KAZINFORM - الماتى گارنيزونى اسكەري سوتىنىڭ جابىق سوت وتىرىسىندا اۋىر زارداپتارعا اكەپ سوقتىرعان قارۋدى قولدانا وتىرىپ، بيلىكتى اسىرا پايدالانۋ ايىبى تاعىلعان ايتجان اۋباكىروۆكە قاتىستى قىلمىستىق ءىس قارالدى.
سوت مالىمەتىنە سايكەس، ايىپتالۋشى بيلىكتىڭ وكىلى بولا وتىرىپ، ءوزىنىڭ قۇقىقتارى مەن وكىلەتتىكتەرىنەن تىس ارەكەتتەر جاساعان. اۋباكىروۆ ءىس-ارەكەتىنىڭ ناتيجەسى ەكى جابىرلەنۋشىنىڭ ولىمىنە الىپ كەلگەن.
سوت بارىسىندا مەملەكەتتىك ايىپتاۋشى سوتتالۋشىنى 7 جىلعا باس بوستاندىعىنان ايىرۋدى سۇرادى. سوتتالۋشى كىناسىن مويىندامادى.
- سوتتالۋشىنىڭ كىناسى ساراپتامالاردىڭ قورىتىندىلارىمەن، كۋاگەرلەردىڭ، ساراپشىلاردىڭ ايعاقتارىمەن، وقيعا بولعان جەردى قاراپ-تەكسەرۋ حاتتامالارىمەن جانە زاتتاي دالەلدەمەلەرمەن دالەلدەندى. سوتتالۋشى 7 جىلعا باس بوستاندىعىنان ايىرىلدى. ول اسكەري اتاعىنان ايىرىلدى جانە جابىرلەنۋشىنىڭ پايداسىنا 20 ميلليون تەڭگە مورالدىق زالال ءوندىرىلدى، - دەپ حابارلادى سوتتان.
سوت ۇكىمى زاڭدى كۇشىنە ەنگەن جوق.
ەسكە سالايىق، بۇعان دەيىن قاڭتاردا 4-جاسار ايكوركەمدى اتتى دەپ ايىپتالعان اسكەري 7 جىلعا سوتتالعانىن جازعانبىز.
