الماتىدا ۇ ق ش ۇ قورعانىس مينيسترلەرى ءبىرقاتار قۇجاتقا قول قويدى
الماتى. KAZINFORM - الماتىدا ۇ ق ش ۇ-عا مۇشە ەلدەر قورعانىس مينيسترلەرى كەڭەسىنىڭ وتىرىسى ءوتتى. ونىڭ بارىسىندا اسكەرلەردى وزىق قارۋ-جاراقپەن جاراقتاندىرۋ جونىندەگى قۇجاتتارعا قول قويىلدى.
وتىرىسقا ۇ ق ش ۇ-عا مۇشە مەملەكەتتەر قورعانىس ۆەدومستۆولارىنىڭ باسشىلارى، ۇيىمنىڭ باس حاتشىسى جانە بىرىككەن شتاب باستىعى قاتىستى.
وتىرىستىڭ شاعىن قۇرامىندا ۇ ق ش ۇ ۇجىمدىق قاۋىپسىزدىك ايماقتارىنداعى اسكەري قاۋىپسىزدىككە قاتىستى سىن-تەگەۋرىندەر مەن قاۋىپ-قاتەر تۋرالى ۇيىمنىڭ باس حاتشىسى يمانعالي تاسماعامبەتوۆ بايانداما جاسادى.
تاراپتار اسكەري قاۋىپسىزدىك سالاسىنداعى ىنتىماقتاستىقتى دامىتۋدىڭ باسىم باعىتتارى تۋرالى پىكىر الماسىپ، ءوز كوزقاراسىن ءبىلدىردى.
كەڭەستىڭ پلەنارلىق وتىرىسىندا تاراپتار ءبىرقاتار قۇجاتتار قابىلدادى.
ولار ۇ ق ش ۇ-نىڭ ۇجىمدىق كۇشتەرىن بىرلەسىپ دايارلاۋدى جوسپارلاۋ، زاماناۋي قارۋ-جاراق ۇلگىلەرىمەن، اسكەري جانە ارنايى تەحنيكامەن جابدىقتاۋ توڭىرەگىندە بولدى.
كەزدەسۋ سوڭىندا قازاقستاننىڭ قورعانىس ءمينيسترى وتىرىسقا قاتىسۋشىلارعا جەمىستى جانە ناتيجەلى جۇمىسى ءۇشىن ريزاشىلىعىن ءبىلدىردى.
«بۇگىنگى وتىرىس بارىسىندا ءبىز ۇجىمدىق قاۋىپسىزدىك تۋرالى شارت ۇيىمىنىڭ ۇجىمدىق قاۋىپسىزدىك ايماقتارىنداعى سىن-تەگەۋرىندەر مەن قاۋىپ-قاتەرگە جان- جاقتى تالداۋ جۇرگىزدىك. ۇيىمعا مۇشە مەملەكەتتەر قورعانىس ۆەدومستۆولارىنىڭ ءوزارا ءىس-ارەكەتىن ودان ءارى تەرەڭدەتۋگە جانە ونىڭ اسكەري قۇرامداس بولىگىن دامىتۋعا باعىتتالعان قۇجاتتار قارالىپ، قول قويىلدى»، - دەپ تۇيىندەدى گەنەرال- پولكوۆنيك رۋسلان جاقسىلىقوۆ.
