الماتىدا ناۋرىز قالاي تويلانىپ جاتىر
الماتى. KAZINFORM - الماتىنىڭ 8 اۋدانىندا جانە اباي الاڭى مەن استانا الاڭىندا مەرەكەلىك ءىس- شارالار ۇيىمداستىرىلدى.
الماتى قالاسىندا ناۋرىز مەيرامى ەرەكشە ءسان- سالتاناتپەن تويلانىپ جاتىر.
تاڭ سارىدەن بەرى قالا تۇرعىندارى مەن قوناقتارى كيىز ۇيلەر تىگىلىپ، ۇلكەن ساحنادا ورناتىلعان استانا الاڭىنا كوكتەم مەرەكەسىن تويلاپ ءجۇر. بۇل الاڭداعى سالتاناتتى شاراعا الماتى اكىمى ەربولات دوسايەۆ، قازاقستاننىڭ ەڭبەك ەرى، حالىق ءارتيسى ءاسانالى ءاشىموۆ، حالىق قاھارمانى ءسات توقپاقبايەۆ، قازاقستاننىڭ ەڭبەك ەرى اياگۇل ميرازوۆا، قازاقستان جازۋشىلار وداعىنىڭ ءتوراعاسى مەرەكە قۇلكەنوۆ جانە كوپتەگەن زيالى قاۋىم وكىلدەرى قاتىستى.
كورەرمەندەرگە «الماتى - ناۋرىز قۇشاعىندا» اتتى اۋقىمدى كونتسەرت ۇسىنىلدى. وندا اڭىزعا اينالعان ونەر جۇلدىزدارى: «دوس- مۇقاسان» ءانسامبلى، مايرا مۇحامەد قىزى، جانار ايجانوۆا، ءومىرقۇل اينيازوۆ، «سازگەن سازى» فولكلورلىق- ەتنوگرافيالىق ءانسامبلى، جازيرا بايىربەكوۆا، يگور بلاگورودنىي، تولەگەن راحىمبايەۆ، «كەشyou» توبى، دينايا، AyaFunk جانە باسقا دا تانىمال ونەرپازدار ونەر كورسەتتى.
ەندى ساعات 18:00 دە وسى الاڭدا تانىمال انشىلەر قاتىساتىن Juldyzdy Almaty كەشكى فەستيۆالى وتەدى.
ودان بولەك اباي الاڭىندا مادەني مۇرا مەن زاماناۋي تەحنولوگيانى بىرىكتىرەتىن NauryzFest فەستيۆالى ۇيىمداستىرىلدى. رەسپۋبليكا سارايىنىڭ الدىندا ەرەكشە بەزەندىرىلگەن كيىز ۇيلەر تىگىلىپ، التىباقان ورناتىلدى. قازىر مۇندا مەرەكەلىك كونتسەرتتەن بىرگە ۇلتتىق ويىندار مەن ءتۇرلى جارىستار ءوتىپ جاتىر.
سونىمەن قاتار الماتى مەتروسىنىڭ ءار بەكەتىندە قازاق حالقىنىڭ مادەنيەتىن دارىپتەيتىن كورمەلەر اشىلدى. «بايقوڭىر» بەكەتىندە «سازگەن سازى» ءانسامبلى ۇلتتىق اسپاپتاردىڭ ۇنىمەن مۋزىكالىق شوۋ كورسەتتى.
ال الماتى حالىقارالىق اۋەجايىندا ناۋرىز مەرەكەسىنە وراي ەرەكشە «ءتاتتى كادە- سىي سىيلىققا» اكتسياسى ۇيىمداستىرىلدى. اكسيانىڭ نەگىزگى ماقساتى - قالاعا كەلگەن شەتەلدىك تۋريستەرگە مەرەكەلىك كوڭىل- كۇي سىيلاۋ جانە قازاق حالقىنىڭ قوناقجايلىعىن كورسەتۋ
اۋەجايدىڭ حالىقارالىق تەرمينالىنا كەلىپ قونعان تۋريستەرگە ۇلتتىق ويۋ- ورنەكتەرمەن بەزەندىرىلگەن جانە كوكتەمنىڭ سيمۆولدارىمەن ناقىشتالعان ءتاتتى كادە-سىي بەرىلىپ جاتىر. وسى شارا اياسىندا الماتىعا كەلگەن شامامەن 10 مىڭعا جۋىق شەتەلدىك جولاۋشىعا سىي- قۇرمەت كورسەتىلەدى. وعان قوسا اۋەجايدا ارنايى فوتوزونا ۇيىمداستىرىلىپ، ۇلتتىق ناقىشتاعى باننەرلەرمەن بەزەندىرىلدى.
