الماتىدا مادەنيەت جانە ونەر قىزمەتكەرلەرىنە پرەزيدەنت ستيپەندياسى تابىس ەتىلدى
الماتى. KAZINFORM - مادەنيەت جانە اقپارات ءمينيسترى ايدا بالايەۆا ادەبيەت جانە ونەر قايراتكەرلەرىنە مەملەكەت باسشىسىنىڭ وكىمىمەن تاعايىندالعان 2023-جىلعى مادەنيەت سالاسىنداعى مەملەكەتتىك ستيپەنديانى تابىس ەتتى.
سالتاناتتى ءىس-شارا الماتىنىڭ «دوستىق ۇيىندە» ءوتتى. مادەنيەت جانە اقپارات ءمينيسترى ايدا بالايەۆا اقىن-جازۋشىلار مەن ادەبيەتتانۋشىلارعا، دراماتۋرگتەر مەن پۋبليتسيستەرگە، تەاتر، كينو جانە بالەت اكتەرلەرىنە، قولونەرشىلەر مەن وزگە دە مادەنيەت مايتالماندارىنا ستيپەنديا تابىس ەتتى. مەملەكەتتىك ستيپەنديا قازاقستاننىڭ 75 ادەبيەت پەن ونەر قايراتكەرىنە بەرىلدى.
«جىل سايىن تاعايىندالاتىن مەملەكەتتىك ستيپەنديا - مەملەكەتتىڭ مادەنيەت پەن ونەر قايراتكەرلەرىنە، شىعارماشىلىق قىزمەتكەرلەرىنە جانە جاس دارىندارعا جاساعان قولداۋى مەن قامقورلىعىنىڭ ايعاعى، سونداي-اق، ولاردىڭ قازاقستاننىڭ مادەنيەتىن وركەندەتىپ، الەمگە تانىتۋعا قوسقان ۇلەستەرىنە كورسەتىلگەن قۇرمەت»، - دەدى مينيستر.
مادەنيەت سالاسىنداعى ستيپەنديا ءاسانالى ءاشىموۆ، مىرزاتاي جولداسبەكوۆ، بيبىگۇل تولەگەنوۆا، ولجاس سۇلەيمەنوۆ يرانبەك ورازبايەۆ، نۇرعالي ءنۇسىپجان، تۇڭعىشباي جامانقۇلوۆ، مەرۋەرت وتەكەشوۆا، اماندوس اقانايەۆ، دۋلات يسابەكوۆ، تولەن ابدىك، اكىم تارازي، گۋلۆەر رازيەۆا جانە باسقا دا قازاق ادەبيەتى مەن ونەرىنىڭ مايتالماندارىنا تابىستالدى.
سونىمەن قاتار كانن حالىقارالىق فەستيۆالىنىڭ لاۋرەاتى سامال ەسلاموۆا، سكريپكاشى ەركەبۇلان ساپاربايەۆ، سۋرەتشى رەنات ەلۋبايەۆ، انشىلەر اندرەي ترەگۋبەنكو، نازىم ساعىنتاي، اكتەر ماكسيم ياشەنكو سەكىلدى جانە وزگە دە جاس دارىندارعا مەملەكەتتىك قولداۋ كورسەتىلدى.
