الماتىدا جىل باسىنان بەرى جول اپاتتارىنان 84 ادام قازا تاپتى
الماتىدا وسى جىلدىڭ 10 ايىندا 2991 جول كولىك اپاتى تىركەلىپ، 84 ادام قازا تاپتى. بۇل تۋرالى وڭىرلىك كوممۋنيكاتسيالار قىزمەتىنىڭ الاڭىندا قالالىق پوليتسيا دەپارتامەنتىنىڭ رەسمي وكىلى سالتانات ازىربەك ءمالىم ەتتى، دەپ حابارلايدى Kazinform.
سپيكەردىڭ سوزىنشە، جىل باسىنان بەرى 1582980 جول قوزعالىسى ەرەجەلەرى بۇزىلعانى انىقتالدى. كولىك قۇرالىن ماس كۇيىندە باسقارعانى ءۇشىن 1718 ادام ۇستالدى. سوت 2443 جۇرگىزۋشىنى كولىك قۇرالىن باسقارۋ قۇقىعىنان ايىردى.
«وسى جىلدىڭ 10 ايىندا الماتىدا 2991 كولىك اپاتى تىركەلىپ، سونىڭ سالدارىنان 3211 ادام ءتۇرلى دەنە جاراقاتىن الدى. 84 ادام كوز جۇمدى. ءبىزدىڭ قالامىزدا «قورعاۋ - قاۋىپتى جۇرگىزۋشى» اۆتوماتتاندىرىلعان جۇيەسى جۇمىس ىستەيدى، ول قوزعالىستىڭ قارسى جولاعىنا شىعاتىنداردى، جالعان نومىرلىك بەلگىلەردى پايدالاناتىن جول قوزعالىسى ەرەجەلەرىن بۇزۋشىلاردى، كولىك قۇرالىن باسقارۋ قۇقىعىنان ايىرىلعان، ءبىراق سوعان قاراماي، كولىك جۇرگىزەتىندەردى انىقتاۋعا مۇمكىندىك بەرەدى»، - دەدى سالتانات ازىربەك.
پوليتسيا دەپارتامەنتىنىڭ رەسمي وكىلى جول ەرەجەسىن كوبىنە جاستار بۇزاتىنىن ايتتى.
«جاڭادان كولىك ايداپ جۇرگەندەر وتە ساق، ءبىراق ولاردىڭ تاجىريبەسى از. وكىنىشكە وراي، ولار جاعىمسىز جاعدايلارعا تاپ بولادى، اپات جاسايدى، ارينە، اۋىر زارداپتارمەن ەمەس. ايتا كەتۋ كەرەك، ەڭ جاقسى ءقاۋىپسىز جۇرگىزۋشى - تارتىپكە باعىنعان، كاسىبي، جول قوزعالىسى ەرەجەلەرىن قاتاڭ ساقتايتىن، جول قوزعالىسىنىڭ باسقا قاتىسۋشىلارىنا قۇرمەتپەن قارايتىن ادام»، - دەدى سپيكەر.
اۆتور
الما مۇقانوۆا
