الماتىدا جۋرناليستەرگە شابۋىل جاساعان 5 ادامعا سوت ۇكىمى شىقتى
الماتىدا جۋرناليستەرگە شابۋىل ۇيىمداستىرعان بىرنەشە تۇرعىنعا قاتىستى سوت ۇكىمى شىقتى، دەپ حابارلايدى Kazinform.
الماتى قالاسىنىڭ يۋۆەنالدى سوتىندا جۋرناليستەرگە شابۋىل ۇيىمداستىردى دەگەن ايىپ بويىنشا توكاريەۆكە قاتىستى قىلمىستىق ءىس قارالدى.
وعان جۋرناليستەردىڭ زاڭدى كاسىبي قىزمەتىنە كەدەرگى كەلتىردى، جەكە ومىرگە جانە دەربەس دەرەكتەرگە قول سۇعىلماۋشىلىقتى بۇزدى، كامەلەتكە تولماعانداردى قىلمىستىق قۇقىق بۇزۋشىلىقتار جاساۋعا تارتتى، قورقىتتى، بۇزاقىلىق جاسادى، اقپاراتتىق جۇيەنىڭ جۇمىسىن بۇزدى جانە بوتەننىڭ مۇلكىنە قاساقانا زاقىم كەلتىردى دەگەن ءبىرقاتار ايىپ تاعىلدى.
سونداي-اق بۇزاقىلىق جاساۋ جانە بوتەننىڭ مۇلكىن قاساقانا جويۋ دەرەكتەرى بويىنشا كامەلەتكە تولماعان ك. ، ت. ، س. جانە ا. -عا قاتىستى ءىس قارالدى.
«سۋديا توكاريەۆتى شارتتى تۇردە 4,5 جىلعا، ال كامەلەتكە تولماعان قالعان ءتورت قاتىسۋشىنى 1 جىلعا جانە 4 ايعا شارتتى تۇردە جازالاۋعا ۇكىم شىعاردى»، - دەپ حابارلادى سوتتان.
سوت ۇكىمى زاڭدى كۇشىنە ەنگەن جوق.
بۇعان دەيىن، جۋرناليستەردىڭ كاسىبي قىزمەتىنە كەدەرگى كەلتىرگەن اركادي كلەبانوۆ (مانيەۆيچ) سوت ۇكىمىمەن تۇرمەگە ەمەس، پسيحياتريالىق كلينيكاعا ەمدەلۋگە جىبەرىلگەنى تۋرالى جازعان بولاتىنبىز.
