الماتىدا جەر سىلكىنىسىنە قاتىستى جالعان اقپارات تاراتقان كۇدىكتى ايەل ۇستالدى
الماتى. KAZINFORM - الماتى پوليتسياسى جەر سىلكىنىسى تۋرالى جالعان اقپارات تاراتقان كۇدىكتىنى انىقتاپ، ۇستادى.
الماتى قالالىق پوليتسيا دەپارتامەنتىنىڭ مالىمەتىنشە، كۇدىككە ىلىنگەن جاس كەلىنشەك مەسسەندجەرلەر ارقىلى جويقىن ءزىلزالا بولادى دەپ، ساعاتىنا دەيىن ايتىپ ەلدى ودان سايىن دۇرلىكتىرگەن. تەكسەرۋلەردىڭ ناتيجەسى بويىنشا ونىڭ ءىس-ارەكەتىنە قۇقتىق باعا بەرىلەتىن بولادى.
«سوندىقتان بارلىق ازاماتتارعا ايتاتىنىم، جالعان اقپارات تاراتپاڭىزدار، تاراتۋعا سەبەپكەر بولماڭىزدار. سودان سوڭ ءار اقپاراتتى ءجىتى زەردەلەپ، تەك رەسمي دەرەك كوزدەردەن الىنعان اقپاراتقا قانا سەنۋلەرىڭىزدى سۇرايمىن»، - دەدى الماتى قالاسى پوليتسيا دەپارتامەنتىنىڭ رەسمي وكىلى سالتانات ازىربەك.
29 جاستاعى ج. ەسىمدى ازاماتشانىڭ كىناسى دالەلدەنسە، ول ق ر قىلمىستىق كودەكسىنىڭ 274-بابىنا سايكەس، ءىرى مولشەردە ايىپپۇل تولەيدى نەمەسە ءۇش جىلعا دەيىن مەرزىمگە باس بوستاندىعىنان ايىرىلۋى مۇمكىن.
