الماتىدا جەر سىلكىنىسى كەزىندە ءۇش ادام كوپقاباتتى ءۇيدىڭ تەرەزەسىنەن سەكىردى
الماتى. KAZINFORM - الماتىدا جەر سىلكىنىسى ناتيجەسىندە 8 ادام زارداپ شەكتى، ءبىر تۇرعىنىڭ جاعدايى اۋىر.
الماتى قالالىق دەنساۋلىق ساقتاۋ باسقارماسىنىڭ مالىمەتىنشە، تۇنگى ساعات 03:00-تەگى جاعداي بويىنشا 8 ادام زارداپ شەكتى. ولار بىردەن قالالىق اۋرۋحاناعا جەتكىزىلدى.
«جاراقات العان ءۇش ادام تۇرعىن ۇيلەردىڭ 2-شى جانە 3-قاباتىنان سەكىرگەن. مەديتسينالىق تەكسەرىستەن كەيىن ەكەۋى امبۋلاتوريالىق ەمدەلۋگە جىبەرىلدى. ءۇشىنشى ناۋقاستىڭ جاعدايى اۋىر، قازىر ول اۋرۋحانادا جاتىر»، - دەپ حابارلادى باسقارمادان.
سونداي-اق، ۇيدەن جۇگىرىپ شىققان بەس ادام جاراقات الدى. بارلىق قاجەتتى مەديتسينالىق كومەك كورسەتىلگەننەن كەيىن ولار دا امبۋلاتوريالىق ەمدەۋگە جىبەرىلەدى.
بۇعان دەيىن باسقارما وكىلدەرى ەمدەۋ مەكەمەلەرىنە تۇرعىنداردىڭ جۇگىنبەگەنىن جەتكىزگەن ەدى.
اۆتور
الما مۇقانوۆا
