الماتىدا جەر سىلكىنەتىنى دەر كەزىندە ەسكەرتىلمەۋىنە ەكس-پرەزيدەنتتىڭ جيەنىنىڭ قاتىسى بار ما - انتيكور جاۋابى
استانا. KAZINFORM - الماتىداعى جەر سىلكىنىستەرىن الدىن الا ەسكەرتۋ جۇيەسىن ورناتۋعا جاۋاپتى بولعان مەردىگەردىڭ نۇرالى اليەۆپەن قانداي قاتىسى بار؟ سىبايلاس جەمقورلىققا قارسى ءىس-قيمىل اگەنتتىگىنىڭ كەزەكتى بريفينگىندە ۆەدومستۆونىڭ رەسمي وكىلى ارمان تىلەۋكەنوۆكە وسىنداي سۇراق قويىلدى.
«ءبىز ول اقپاراتتان حاباردارمىز. سونداي- اق، ارىپتەسىمىز، قوعامدىق كەڭەس مۇشەسى ديدار سماعۇلوۆتىڭ الەۋمەتتىك جەلىدەگى جازباسىن وقىدىق. بۇل فاكتى بويىنشا «ادىلدىك جولى» قوعامدىق بىرلەستىگىنىڭ ارىزىن سىبايلاس جەمقورلىققا قارسى ءىس-قيمىل اگەنتتىگىنىڭ الماتى قالاسى بويىنشا دەپارتامەنتى تىركەدى»، - دەدى ارمان تىلەۋكەنوۆ.
سونداي- اق، ول «ادىلدىك جولى» جولداعان حات بويىنشا تەكسەرۋ جۇرگىزىلەتىنىن اتاپ ءوتتى.
«ماتەريالدار وكىلەتتى ورگانعا تەكسەرۋ جۇرگىزۋ ءۇشىن جولداندى. سول تەكسەرۋدىڭ قورىتىندىسى بويىنشا ءتيىستى پروتسەسسۋالدىق شەشىم قابىلدانىپ، ب ا ق پەن قوعامعا حابارلانادى»، - دەدى اگەنتتىكتىڭ رەسمي وكىلى.
ەسكە سالايىق، «ادىلدىك جول» قوعامدىق بىرلەستىگىنىڭ جەتەكشىسى ديدار سماعۇلوۆ الەۋمەتتىك جەلىدە الماتىداعى جەر سىلكىنىستەرىن الدىن الا قۇلاقتاندىراتىن جۇيەنى ورناتۋ ءۇشىن 1,1 ميلليارد تەڭگە جۇمساعان مەردىگەر كومپانيانىڭ ارتىندا ەكس- پرەزيدەنتتىڭ جيەنى نۇرالى اليەۆ تۇرعانىن جازعان ەدى.
اۆتور
ەسىمجان ناقتىباي
