الماتىدا جۇكتى ايەلدىڭ جۇرەگىنە كۇردەلى وتا جاسالدى

الماتى قالالىق دەنساۋلىق ساقتاۋ باسقارماسىنىڭ مالىمەتىنشە، وپەراتسيا كارديولوگيا ورتالىعى ۇيىمداستىرعان شەبەرلىك ساعاتى اياسىندا رەسەي فەدەراتسياسىنىڭ ۇزدىك اريتمولوگى سەرگەي ارتەمەنكونىڭ قاتىسۋىمەن وتكەن.

پاتسيەنت ورتالىققا اريتميانىڭ جوعارى جيىلىگىمەن اۋىر جاعدايدا، شامامەن مينۋتىنا 240 سوققىعا جەتەتىن جاعدايدا تۇسكەن. نەگىزگى نورما - 90 بولۋى كەرەك.

دارىگەرلەر جۇكتى ايەلگە ۆولف-پاركينسون-ۋايت سيندرومى، تاحيكارديا دياگنوزىن قويدى.

جوعارى تاۋەكەلگە قاراماستان، كونسيليۋمنىڭ شەشىمىمەن حيرۋرگيالىق وتا جاساۋ جونىندە شەشىم قابىلداندى.

اريتمولوگيا ءبولىمىنىڭ مەڭگەرۋشىسى بەكجان رىسمەنديەۆ رەسەيلىك ارىپتەسى سەرگەي ارتەمەنكومەن بىرگە جۇرەك ىرعاعىنىڭ بۇزىلۋىن ەمدەۋ ءۇشىن ەكى ساعاتتىق حيرۋرگيالىق وپەراتسيا - راديوجيىلىكتى كاتەتەرلىك ابلياتسيا جۇرگىزدى.

«بۇل شاعىن ينۆازيۆتى ءادىس، جەرگىلىكتى انەستەزيامەن جاسالدى. ەش كەسۋسىز ەكى پۋنكتسيا ارقىلى ءبىز پاتولوگيالىق وشاقتى «زەرگەرلىك» تۇردە جويا الدىق. وپەراتسيا ءساتتى ءوتتى. ايەلدىڭ جانە قۇرساعىنداعى بالانىڭ جاعدايى جاقسى. ءدال وسى ورتالىقتا مۇنداي وپەراتسيا العاش رەت جاسالدى جانە بۇل سوڭعى رەت ەمەس دەپ ۇمىتتەنەمىن. مۇنداعى جابدىق زاماناۋي ستاندارتتارعا سايكەس كەلەدى، ونىڭ كومەگىمەن جۇرەك ىرعاعىنىڭ بۇزىلۋىمەن بايلانىستى كەز كەلگەن وپەراتسيانى، سونىڭ ىشىندە جۇكتى ايەلدەردى دە جاساۋعا بولادى»، - دەپ اتاپ ءوتتى سەرگەي ارتەمەنكو.

بولاشاق انانىڭ سوزىنشە، دارىگەرلەر وعان جۇرەك ىرعاعىنىڭ بۇزىلۋى دياگنوزىن بىلتىر قويعان.

«وتكەن جىلى ماعان تۋابىتكەن جۇرەك ىرعاعىنىڭ بۇزىلۋى دياگنوزى قويىلدى. ءبىراق اۋرۋ مەنى مازالاعان ەمەس. ارينە، دياگنوزدى بىلگەننەن كەيىن ۋاقىتىندا وتا جاساۋ كەرەك ەدى، ءبىراق، وكىنىشكە قاراي، وسىلاي بولدى. بالا ءۇشىن قاتتى ۋايىمدادىم. قۇدايعا شۇكىر، دارىگەرلەر ءبارى جاقسى ءوتتى دەدى. مەنىڭ جانە بالامنىڭ ءومىرىن ساقتاپ قالعانى ءۇشىن دارىگەرلەرگە كوپ راحمەت. كەز كەلگەن وپەراتسيا تاۋەكەل ەكەنىن تۇسىنەمىن. ال جۇكتى بولعان كەزدە بۇل تاۋەكەل ەكى ەسە ارتادى»، - دەيدى جۇكتى ايەل.

قالالىق كارديوورتالىق ديرەكتورى روزا كۋنىشبەكوۆانىڭ ايتۋىنشا، بۇل - ەرەكشە تاجىريبە. مۇنداي اۋرۋ اۋىر جۇرەك پروبلەمالارىنا اكەلۋى مۇمكىن.

«اريتميانى دۇرىس دياگنوستيكالاۋ ناۋقاستىڭ بولجامىن تۇبەگەيلى وزگەرتەدى، ۋاقتىلى ەمدەۋ تاكتيكاسىمەن اۋرۋ ءقاۋىپتى بولمايدى. جۇرەكتىڭ اريتموگەندىك ايماقتارىنا جوعارى جيىلىكتى توكتىڭ نۇكتەلىك اسەرىنىڭ ناتيجەسىندە جۇرەك سوعىسى ناقتى قالىپقا كەلتىرىلەدى. بۇل پاتسيەنتكە قالىپتى ومىرگە ورالۋعا، جۇكتىلىكتى سوڭىنا دەيىن جەتكىزۋگە جانە انا بولۋعا مۇمكىندىك بەرەدى»، - دەپ اتاپ ءوتتى ول.

دارىگەردىڭ ايتۋىنشا، شەبەرلىك سااعى 7 كۇن وتەدى، 4 كۇندە 35 وپەراتسيا جاسالدى.

مۇنداي وپەراتسياعا تۋابىتكەن جانە جۇرە پايدا بولعان پاتولوگيالار الىندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى