الماتىدا «جاسىل اۋلا» ناۋقانى باستالدى

باسقارمانىڭ مالىمەتىنشە، 30-ناۋرىزدان باستاپ قالا تۇرعىندارىنان كوپقاباتتى ۇيلەردىڭ اۋلاسى مەن قوعامدىق كەڭىستىكتەردى كوگالداندىرۋ ءۇشىن جاپىراقتى كوشەتتەردى الۋعا وتىنىمدەر قابىلدانادى. كوشەتتەر تەگىن بەرىلەدى.

«ناۋقان اياسىندا ءبىر ادامعا 20-عا دەيىن كوشەت بولىنەدى، بۇل رەتتە ءوتىنىش بەرۋشى وتىرعىزىلعان اعاشتاردى الداعى ءۇش جىل بويى كۇتىپ-باپتاۋ تۋرالى كەپىلدى مىندەتتەمەگە قول قويۋى ءتيىس. وتىنىمدەر 8-ساۋىرگە دەيىن قابىلدانادى. وسىدان كەيىن جولدانعان وتىنىشتەر قابىلدانبايدى»، - دەپ حابارلادى قالالىق ەكولوگيا جانە قورشاعان ورتا باسقارماسى.

«جاسىل اۋلا» ناۋقانىنا قاتىسۋ ءۇشىن Jasyl.aula.almaty@gmail.com ەلەكتروندى پوشتاسىنا كەلەسى مالىمەتتەردى جولداۋ قاجەت:

1. قاتىسۋشىنىڭ اتى- ءجونى مەن تەلەفون ءنومىرى، اعاش وتىرعىزىلاتىن ورىننىڭ ناقتى مەكەنجايى؛

2. اعاش وتىرعىزىلاتىن ورىننىڭ فوتوسى (ماماندارعا ورىندى تولىقتاي باعالاۋعا مۇمكىندىك بولۋى ءۇشىن پانورامالىق فورماتتا بولعانى ءجون)؛

3. سۇرالىپ وتىرعان كوشەت سانى.

كوشەتتەر 13، 14-ءساۋىر كۇندەرى الماتى قالاسى، اۋەزوۆ اۋدانى، يۋري كيم كوشەسى، 9 مەكەنجايىندا تاراتىلادى. وتىرعىزىلعان كوشەتتەردىڭ سۋرەتىن جىبەرۋ قاجەت.

قوسىمشا اقپارات الۋ ءۇشىن ەكولوگيا جانە قورشاعان ورتا باسقارماسىنىڭ جاسىل قوردى باسقارۋ جانە مونيتورينگ ءبولىمىنىڭ 77273904117 بايلانىس نومىرلەرىنە حابارلاسۋعا بولادى.

اۆتور

دۋمان ارعىنگەلدى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى