الماتىدا جانارماي قۇيۋ بەكەتىندە پىشاقپەن جۇرگەن ايەل ۇستالدى
الماتىدا تۇنگى ۋاقىتتا جانارماي قۇيۋ بەكەتىندە پىشاق ۇستاپ جۇرگەن ايەل ۆيدەوعا ءتۇسىپ قالدى، دەپ حابارلايدى Kazinform.
پىشاق ۇستاعان ايەلدىڭ ۆيدەوسى الەۋمەتتىك جەلىگە شىقتى.
«حالىق ارەنانىڭ جانىنداعى جانارماي قۇيۋ بەكەتىندە پىشاق ۇستاعان ايەل ءجۇر، وقيعانىڭ ءمان-جايى انىقتالۋدا»، - دەلىنەدى ۆيدەوداعى جازبادا.
الماتى قالالىق پوليتسيا دەپارتامەنتى پىشاق ۇستاعان ايەلدىڭ ۇستالعانىن حابارلادى.
«ايەل ۇستالدى جانە پاترۋلدىك پوليتسيا ەكيپاجىمەن مەدەۋ اۋداندىق پوليتسيا باسقارماسى جانىنداعى بولىمگە جەتكىزىلدى. ول ءوزىن دۇرىس ۇستاعان جوق. ايەل بىلىكتى كومەك الۋ ءۇشىن پسيحولوگيالىق بەيىندەگى دارىگەرلەرگە جىبەرىلدى»، - دەپ حابارلادى قالالىق پوليتسيا دەپارتامەنتىنىڭ باسپا ءسوز قىزمەتى.
