الماتىدا ءبىر قوعامدىق كولىكتەن ەكىنشىسىنە اۋىسىپ وتىرۋ قاشان تەگىن بولادى
الماتى. KAZINFORM - الماتىدا وسى جىلدىڭ سوڭىنا دەيىن ءبىر قوعامدىق كولىكتەن ەكىنشىسىنە تەگىن اۋىسىپ وتىرۋعا مۇمكىندىك بەرەتىن جاڭا تاريفتىك باعا ەنگىزىلمەك.
«بۇگىنگى كۇنى ءبىز تاريفتىك مازىر ازىرلەپ جاتىرمىز. كەيىن كولىك قۇرىلىمىن دامىتۋ جونىندەگى شەبەرلىك-جوسپارىنا سۇيەنە وتىرىپ، ءبىز بۇكىل مارشرۋتتىق جەلىنى وڭتايلاندىرعىمىز كەلەدى. بيىل «Bus كيلومەترىنە» اۋىسقىمىز كەلەدى. جالپى، ءبىز تاريفتىك ساياساتتىڭ ءوزىن قايتا قاراستىرعىمىز كەلەدى»، - دەدى قالالىق موبيلدىلىك باسقارماسىنىڭ باسشىسى ساعىندىق تەلىبايەۆ.
سپيكەر جوبانىڭ ماڭىزدى مىندەتتەرىنىڭ ءبىرى قوعامدىق كولىكتەردىڭ تارتىمدىلىعىن ارتتىرۋ ەكەنىن اتاپ ءوتتى.
«ماڭىزدى مىندەتتەردىڭ ءبىرى - ادامداردىڭ بەلگىلى ءبىر ۋاقىت ىشىندە باسقا باعىتقا تەگىن اۋىسىپ وتىرۋى. قازىر بۇل ماسەلەمەن اينالىسىپ جاتىرمىز. ءبىز ءبارىن جاقسى بىلەمىز. بۇعان قول جەتكىزە الماساق، ادامداردى قوعامدىق كولىككە وتىرعىزۋ قيىنعا سوعادى»، - دەپ قوستى ول.
ساعىندىق تەلىبايەۆ جاڭا جوبانى جۇزەگە اسىرۋ مەرزىمىنە دە توقتالدى.
«ءبىز جوبانى ءۇشىنشى توقساندا الامىز دەپ ويلايمىن. ال 2024-جىلدىڭ سوڭىندا جۇزەگە اسىرۋدى باستايمىز»، - دەپ جاۋاپ بەردى ول جۋرناليستىڭ سۇراعىنا.
وتكەن جىلى الماتى اكىمى ەربولات دوسايەۆ جاڭا تاريفتىك باعانى ەنگىزۋ جوسپارى تۋرالى ايتقان ەدى.
