الماتىدا بىرنەشە عىلىمي قىزمەتكەردى جۇمىستان شىعارىپ جاتىر - مينيسترلىك جاۋاپ بەردى

بيىل 3-ناۋرىزدا ۆ. گ. فەسەنكوۆ اتىنداعى استروفيزيكا ينستيتۋتىندا عىلىمي قىزمەتتىڭ تيىمدىلىگىن ارتتىرۋ جانە كادرلىق الەۋەتتى دامىتۋ ماقساتىندا كادر قۇرامىن جاڭارتۋ جانە عىلىمي قۇرىلىمدارداعى ساباقتاستىقتى كۇشەيتۋگە قاتىستى ۇسىنىمداردى كوزدەيتىن بۇيرىق شىقتى. قۇجاتقا سايكەس، زەينەت جاسىنا جەتكەن زەرتحانا باسشىلارىنا زەرتحانانى باسقارۋعا ۇمىتكەر عالىمدار تۋرالى ۇسىنىس بەرۋ تاپسىرىلدى. سونداي-اق، عىلىمي سەمينارلار وتكىزۋ، عىلىمي-ۇيىمداستىرۋشىلىق ءىس-شارالارعا قاتىسۋ جانە ەڭبەك ءتارتىبىن ساقتاۋ قاجەتتىلىگى اتاپ ءوتىلدى.

اتالعان بۇيرىق اياسىندا اي مەن پلانەتالار فيزيكاسى زەرتحاناسىنىڭ قىزمەتكەرلەرىمەن ينستيتۋتىشىلىك كەزدەسۋ ۇيىمداستىرىلدى. بۇل زەرتحانانى 1974 -جىلدان بەرى باسقارعان ۆيكتور گەرمانوۆيچ تەيفەل قازىر 92 جاستا. ەڭ جاس عىلىمي قىزمەتكەردىڭ جاسى - 76. تەيفەل ۆ. گ. دەنساۋلىعىنىڭ ناشارلاۋىنا بايلانىستى كورۋ قابىلەتىنەن ايىرىلىپ، وزدىگىنەن ءجۇرىپ-تۇرا المايتىن جاعدايعا جەتكەن.

- وكىنىشكە قاراي، زەرتحانا قۇرامىندا جاستاردىڭ بولماۋى سوڭعى 20 جىلدا جالعاسىپ كەلە جاتقان تۇيتكىلگە اينالدى. بۇل - زەرتحانادا عىلىمي ساباقتاستىق مۇلدەم جوعالعانىن كورسەتەدى. ينستيتۋتتىڭ وزگە زەرتحانالارىندا، مىسالى جۇلدىزدىق استرونوميا، سپەكتروسكوپيا جانە راديواسترونوميا باعىتتارىندا جاس ماماندار مەن ماگيسترانتتار ەسەبىنەن كادرلىق قۇرام جۇيەلى تۇردە جاڭارتىلىپ جاتقاندا، تەيفەل زەرتحاناسىندا مۇنداي ۇدەرىس مۇلدەم بايقالمايدى، - دەلىنگەن ۆەدومستۆو مالىمەتىندە.

زەرتحانا باسشىلارىنا قازاقستان رەسپۋبليكاسىنىڭ «عىلىم تۋرالى» زاڭىنا سايكەس عىلىمي جوبالار مەن گرانتتار ارقىلى قارجىلاندىرۋ تەك عىلىمي جەتەكشىنىڭ باستاماسى مەن باسقارۋىمەن جۇزەگە اسىرىلاتىنى ەسكە سالىندى. 2020 -جىلدان بەرى اي مەن پلانەتالار فيزيكاسى زەرتحاناسىنان نەبارى 3 گرانتتىق ءوتىنىم بەرىلگەن، وكىنىشكە قاراي، بارلىعى ءساتسىز بولدى. ال 2023 -جىلدان بەرى مۇلدە جوبا ۇسىنىلماعان. سول ۋاقىت ارالىعىندا ينستيتۋتتىڭ وزگە زەرتحانالارى 40 تان استام ءوتىنىم بەرىپ، ءوز قىزمەتتەرىن قاجەتتى قۇرال-جابدىقتارمەن جانە جالاقىمەن قامتاماسىز ەتىپ وتىر.

2018 -جىلدان بەرى تەيفەل زەرتحاناسىنىڭ قىزمەتكەرلەرى Scopus ،Web of Science حالىقارالىق دەرەكقورلارىنا كىرەتىن رەيتينگتىك جۋرنالداردا عىلىمي ماقالا جاريالاماعان. زەرتحانا ينستيتۋت ىشىلىك سەمينار وتكىزبەگەن، ەل ىشىندەگى نەمەسە شەتەلدىك كونفەرەنتسيالارعا قاتىسپاعان. سوڭعى 30 جىل ىشىندە بىردە-ءبىر اسپيرانت نە PhD دوكتورانتتى دايىنداماعان.

سونىمەن قاتار زەرتحانا قىزمەتكەرلەرى ينستيتۋتتىڭ عىلىمي جانە قوعامدىق ومىرىنە ارالاسپايدى. ولار عىلىمي- تەحنيكالىق كەڭەستىڭ وتىرىستارىنا جۇيەلى تۇردە قاتىسپاعان، سونداي-اق ينستيتۋت ءۇشىن ستراتەگيالىق ماڭىزى بار بيىك تاۋلى وبسەرۆاتوريالاردا جۇمىس ىستەمەگەن.

2025 -جىلعى 4-ناۋرىزدا افيف ديرەكتورىنىڭ اتىنا نابليۋداتورلىق استروفيزيكا ءبولىمىنىڭ جەتەكشىسى ا. ۆ. سەرەبريانسكيدەن (اتالعان زەرتحانا وسى بولىمگە قارايدى) قىزمەتتىك جازبا كەلىپ ءتۇستى. وندا جوعارىدا اتالعان ماسەلەلەر ناقتى كورسەتىلگەن (قۇجات قوسا بەرىلەدى).

كەزدەسۋ بارىسىندا ينستيتۋت ديرەكتورى تەيفەل ۆ. گ.-عا زەرتحانانى قىسقارتىپ، نابليۋداتورلىق استروفيزيكا ءبولىمى قۇرامىندا جۇمىسىن جالعاستىرۋدى، سونداي-اق جەكە جۇمىس ورنى ۇسىنىلاتىنىن ايتتى. الايدا ۆ. گ. تەيفەل جانە ونىڭ ەكى ارىپتەسى - حاريتونوۆا گ. ا. (88 جاستا) جانە فيليپپوۆ ۆ. ا. (76 جاستا) بۇل ۇسىنىستان باس تارتتى.

وسىعان بايلانىستى ەڭبەك كودەكسىنىڭ 52-بابى 1-تارماعى 24-تارماقشاسىنا سايكەس، اتالعان قىزمەتكەرلەرگە ەڭبەك شارتىنىڭ بۇزىلاتىنى تۋرالى حابارلامالار تابىستالدى. ولار بۇل حابارلامالارمەن تانىسىپ، قول قويدى.

جوعارىدا ايتىلعانداردى ەسكەرە وتىرىپ، اي مەن پلانەتالار فيزيكاسى زەرتحاناسىنىڭ قازىرگى جەتەكشىسى ۆ. گ. تەيفەلدىڭ باسقارۋىنداعى قىزمەتى جۇيەسىز، عىلىمي ءونىمسىز جانە ينستيتۋت ومىرىنە ارالاسپايتىنىن كورسەتەدى.

ايتا كەتسەك، 10-ساۋىردە پرەزيدەنت عىلىم كۇنى قارساڭىندا عالىمدارمەن كەزدەسىپ، كاسىبي مەرەكەسىمەن قۇتتىقتادى. كەزدەسۋ بارىسىندا مەملەكەت باسشىسى مەملەكەت عىلىمدى دامىتۋ ءۇشىن ناقتى شارالار قابىلداپ جاتقانىن باسا ايتتى.

اۆتور

داۋلەت ىزتىلەۋ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى