الماتىدا 300 گە جۋىق جاس سارباز اسكەري انت قابىلدادى

قورعانىس مينيسترلىگىنىڭ حابارلاۋىنشا، اتالعان ءىس-شاراعا استانا، شىمكەنت جانە قازاقستاننىڭ باسقا دا قالالارىنان شاقىرىلعان ساربازداردىڭ اتا-انالارى مەن جاقىندارى جينالعان.

اسكەرگە شاقىرىلعان جاستار ءبىر ايلىق جاس جاۋىنگەر كۋرسىنان ءوتتى. وسى ۋاقىت ىشىندە ولار ساپتىق دايىندىق ەلەمەنتتەرىنە ماشىقتاندى. قويان-قولتىق ۇرىس تەحنيكاسىن ۇيرەندى. كوزدەرىن بايلاپ قارۋدى بولشەكتەۋ مەن قۇراستىرۋعا جاتتىقتى. مۇنىڭ ءبارى سالتاناتتى راسىمگە كەلگەن قوناقتارعا كورسەتىلدى.

شىمكەنتتەن شاقىرىلعان قاتارداعى جاۋىنگەر قانات ءومىرزاقوۆ - جوعارى ءبىلىمدى قۇرىلىسشى. اسكەرگە دەيىن مەديتسينالىق جابدىقتاردى قوندىرۋ ينجەنەرى بولىپ جۇمىس ىستەگەن. اسكەرگە بارا جاتىپ، ۇشقىش بولسام دەگەن كوپتەن بەرگى ارمانىن جۇزەگە اسىرۋعا شەشىم قابىلداپتى.

- جەرگىلىكتى اسكەري باسقارۋ ورگانىندا بولعاندا مەرزىمدى قىزمەتتى وتكەرگەن سوڭ ەلىمىزدەگى جوعارى وقۋ ورىنداردىڭ بىرىنە گرانتقا ۇمىتكەر بولا الاتىنىمدى ءبىلدىم. الدا ازاماتتىق اۆياتسيا اكادەمياسىنا وقۋعا ءتۇسۋ ءۇشىن لايىقتى قىزمەت ەتۋگە نيەتتىمىن، - دەدى قانات.

61993 اسكەري ءبولىمىنىڭ كومانديرى پودپولكوۆنيك دانيار كارمانوۆ اتا-انالارمەن جۇزدەسىپ، ۇلدارىنىڭ بولاشاق قىزمەتتەرى تۋرالى ايتتى.

ءىس-شارا سوڭىندا جاس ساربازدار جاقىندارىمەن بىرگە العاشقى سەيىلگە شىقتى.

اسكەري انت بەرۋ ءىس-شارالارى دەسانتتىق-شابۋىلداۋ اسكەرلەرىنىڭ الماتى، جەتىسۋ جانە قونايەۆ گارنيزوندارىندا ورنالاسقان اسكەري بولىمدەرىندە ءبىر مەزگىلدە ءوتتى. وندا بيىلعى كوكتەمدە شاقىرىلعان 1500 دەن استام جاس سارباز وتانعا ادال بولۋعا انت بەردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى