الماتىدا 2025-جىلى كىمدەرگە پاتەر بەرىلەدى

- 3050 پاتەردىڭ 2 مىڭى حالىقتىڭ الەۋمەتتىك وسال توپتارىنان كەزەكتە تۇرعاندارعا (ءا ق ق) جانە 1050 ءى جۇمىس ىستەيتىن جاستارعا بولىنەدى، - دەپ جاۋاپ بەردى kazinform تىلشىسىنە الماتى قالالىق كوممۋنالدىق ينفراقۇرىلىمدى دامىتۋ باسقارماسىنىڭ ءبولىم باسشىسى نۇرتاس راقىمبەرگەن.

2024-جىلى الماتىدا كوممۋنالدىق تۇرعىن ءۇي قورىنان كەزەكتە تۇرعان 2 مىڭ ادام باسپانالى بولدى. دەگەنمەن، ماسەلە وزەكتى كۇيىندە قالىپ وتىر.

قازىر قالادا 43688 ادام ۇيگە كەزەكتە تۇر. كوپبالالى انالاردان 7822 ادام، جەتىم بالالاردان – 2334، الەۋمەتتىك وسال توپتاردان – 18450، بيۋجەتتىك ۇيىم قىزمەتكەرلەرىنەن 15082 ادام بار.

«الماتى الەۋمەتتىك-كاسىپكەرلىك كورپوراتسياسى» ۇلتتىق كومپانياسىنىڭ مالىمەتىنشە، جىل باسىنان بەرى مەگاپوليستە توزىعى جەتكەن ءۇيدىڭ 400 تۇرعىنى جاڭا ۇيگە كوشىرىلدى. بۇل «2021-2025-جىلدارعا ارنالعان تۇرعىن ءۇي قورىن جاڭارتۋ باعدارلاماسى» اياسىندا جۇزەگە استى. ونىڭ ىشىندە 280 پاتەردى «الماتى قالاسى اكىمدىگىنىڭ كۇردەلى قۇرىلىس كاسىپورنى» ج ش س، 120 پاتەردى جەكە ينۆەستورلار كوشىردى.

جاڭارتۋ باعدارلاماسى اياسىندا ادامداردىڭ ومىرىنە قاۋىپ توندىرەتىن جارامسىز ءارى مەرزىمى وتكەن توزىعى جەتكەن ۇيلەر بۇزىلادى. باعدارلاماعا 1930-جىلدان 1980-جىلعا دەيىن سالىنعان ەكى قاباتتى كوپپاتەرلى ۇيلەر، سونداي-اق جەكە تۇرعىن ۇيلەر، وندىرىستىك، ساۋدا جانە قوعامدىق نىساندار كىردى.

باعدارلامانىڭ شارتىنا سايكەس، ەسكى تۇرعىن ءۇي يەلەرى جاڭا ۇيدەن بىردەي پاتەر الادى. سونىمەن قاتار، جاڭا پاتەر ورتا ەسەپپەن 10 شارشى مەترگە كەڭ. جاڭا پاتەر يەلەرىنە قوسىمشا شارشى مەتر ءۇشىن قوسىمشا اقى تولەۋدىڭ قاجەتى جوق. پاتەرلەر تازا ارلەۋمەن بەرىلەدى. ۇيلەرگە ينتەرنەت تارتىلدى، ورتكە قارسى دابىل ورناتىلدى، سانتەحنيكا مەن فايانس، گاز نەمەسە ەلەكتر پليتاسى قاراستىرىلعان.

قۇرىلىس كەزىندە تۇرعىندارعا تەگىن ۋاقىتشا تۇرعىن ءۇي بەرىلەدى. سونداي-اق، تۇرعىنداردىڭ كۇردەلى قۇرىلىس كاسىپورنىنىڭ تۇرعىن ءۇي قورىنان دايىن ۇيگە تۇراقتى تۇرۋعا كوشۋ مۇمكىندىگى بار.

- بۇگىن 2030-جىلعا دەيىنگى جاڭعىرتۋ باعدارلاماسىنىڭ جوباسى ازىرلەندى. ول توزىعى جەتكەن ۇيلەردىڭ يەلەرى، ينۆەستورلار مەن ۋاكىلەتتى ۇيىمدار اراسىنداعى قارىم- قاتىناستى رەتتەۋ، ەسكى پاتەردى بەرۋ ءتارتىبىن ناقتىلاۋ جانە 2023-جىلى قابىلدانعان قالانىڭ جاڭا باس جوسپارىن ەسكەرە وتىرىپ، جاڭا تەتىكتەردى قاراستىرادى، - دەپ اتاپ ءوتتى الماتى الەۋمەتتىك-كاسىپكەرلىك كورپوراتسياسىنان.

جالپى، 2030-جىلعا قاراي كەمىندە 676 اپاتتى ءۇيدى بۇزۋ جوسپاردا. بۇل 7500 گە جۋىق ءۇي يەسىن زاماناۋي، جايلى پاتەرلەرگە كوشىرۋگە مۇمكىندىك بەرەدى.

وسىعان دەيىن «الماتى جاستارىنا» ءوتىنىم بەرگەن 2 مىڭعا جۋىق جاس باسپانالى بولعانى تۋرالى جازعان ەدىك.

ەسكە سالايىق، نەسيەنىڭ ەڭ جوعارى سوماسى - 18 ميلليون تەڭگەگە دەيىن. سىياقى مولشەرلەمەسى – 5، باستاپقى جارناسى - 10 پايىز.

قاتىسۋشىنىڭ جاڭا سالىنعان نەمەسە قولدانىستاعى تۇرعىن ءۇي نارىعىنان ءۇي تاڭداۋ مۇمكىندىگى بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى