الماتىدا 2025 -جىلى اباي جانە ساين كوشەلەرىن ۇزارتۋ جۇمىستارى تولىق اياقتالادى
الماتى. KAZINFORM - الماتىدا كەلەسى جىلى ءبىرقاتار جولايرىقتار اشىلىپ، ۇزارتىلعان كوشەلەر قولدانىسقا بەرىلمەك. بۇل تۋرالى قالالىق ءماسليحاتتىڭ باسپا ءسوز قىزمەتى حابارلادى.
ماسەلەن، 2025 -جىلى سەيفۋللين داڭعىلى - جانسۇگىروۆ كوشەسىنىڭ قيىلىسىندا جانە رىسقۇلوۆ داڭعىلىنان اقىن سارا كوشەسىنە دەيىنگى ساين كوشەسىنىڭ، سونداي-اق اباي داڭعىلىنىڭ قالا شەكاراسىنا دەيىنگى قيىلىسىنىڭ قۇرىلىسىن اياقتاۋ جوسپارلانعان.
كەلەسى جىلدىڭ شىلدە ايىندا ساين كوشەسى رىسقۇلوۆ داڭعىلىنان اقىن سارا كوشەسىنە دەيىن جالپى ۇزىندىعى 3,2 شاقىرىمعا ۇزارتىلادى، سونىڭ ارقاسىندا مومىش ۇلى كوشەسىنەن كولىك جۇكتەمەسىنىڭ %40- عا تومەندەۋى كۇتىلىپ وتىر.
سونداي-اق مامىر ايىندا اباي داڭعىلىنىڭ ب. مومىش ۇلى كوشەسىنەن قالا شەكاراسىنا دەيىنگى ارالىعى پايدالانۋعا بەرىلەدى. ۇزارتىلعان كوشەنىڭ جالپى ۇزىندىعى - 5,3 ك م. جولدىڭ ەكى جاعىندا التى جولاقتى بولادى جانە ۆەلوجولدار مەن تروتۋارلار بار.
ماۋسىم ايىندا جانسۇگىروۆ كوشەسى مەن سەيفۋللين داڭعىلىنىڭ قيىلىسىنداعى جولايرىقتىڭ ىرگەلەس اۋماعىن اباتتاندىرىپ، قۇرىلىستى تولىق اياقتاۋ جوسپارلانعان.
- جوبا سەيفۋللين داڭعىلىندا كولىكتىڭ ۇزدىكسىز قوزعالىسىن قامتاماسىز ەتۋ ءۇشىن جالپى ۇزىندىعى 690 مەتر بولاتىن 2 توننەل سالۋدى كوزدەيدى. كولىك قۇرالدارى جانسۇگىروۆ كوشەسى بويىنشا وتەتىن بولادى. سونداي-اق 4 جەرءۇستى جاياۋ جۇرگىنشىلەر وتكەلىن سالۋ، تروتۋارلار جانە كوگالداندىرۋ جۇمىستارى قاراستىرىلعان، - دەپ حابارلادى ءماسليحاتتان.
ەسكە سالايىق، بۇعان دەيىن الماتىدا جاڭا ۇلگىدەگى كولىك تۇراقتارى پايدا بولاتىنىن جازعانبىز.
اۆتور
دوسبول اتاجان
