«الماتىدا 100 دەن استام ءۇي بۇزىلۋى مۇمكىن»: اكىمدىك تىلەنديەۆ كوشەسىن ۇزارتۋعا قاتىستى تۇسىنىك بەردى
الماتى. KAZINFORM - الماتىدا رىسقۇلوۆ داڭعىلىنان قالا شەكاراسىنا دەيىن ۇزىندىعى 10,8 شاقىرىم بولاتىن تىلەنديەۆ كوشەسىن ۇزارتۋ جوسپاردا.
جوبا بويىنشا 140 تان استام جەر تەلىمى ساتىپ الىنۋى ءتيىس، ءبىراق ناقتى سانى كەيىن بەلگىلى بولادى. بۇل تۋرالى قالا اكىمدىگى ءمالىم ەتتى.
بۇعان دەيىن بۇقارالىق اقپارات قۇرالدارىندا الماتىداعى وجەت شاعىن اۋدانىنىڭ تۇرعىندارى جالپى قالالىق ماڭىزى بار تىلەنديەۆ كوشەسىنىڭ ۇزارتىلۋىنا نارازىلىق بىلدىرگەنى تۋرالى اقپارات پايدا بولدى. باسپانالى بۇزىلادى دەگەندى ەستىگەن جۇرت اكىمدىكتەن جوبانى قايتا قاراۋدى سۇرادى.
قالا اكىمدىگى الماتىنى دامىتۋدىڭ قاجەتتى قۇرامداس بولىگى - ماگيسترالدى جولداردى ۇزارتۋ ەكەنىن اتاپ ءوتتى.
«بىلتىر ۇكىمەت الماتى قالاسىنىڭ 2040 -جىلعا دەيىنگى باس جوسپارىن بەكىتتى. جۇرتشىلىقپەن جانە ساراپشىلارمەن كەڭىنەن تالقىلانعان باس جوسپاردا بارلىق قاجەتتى تۇرعىن ءۇي، الەۋمەتتىك، ينجەنەرلىك، كولىك جانە باسقا ينفراقۇرىلىم قاراستىرىلعان. كەز كەلگەن قالانى دامىتۋدىڭ اجىراماس بولىگى كوشە-جول جەلىسىن جەتىلدىرۋ. ماسەلەن، الماتى جانە الماتى اگلومەراتسياسىنىڭ تۇرعىندارى ءۇشىن ىڭعايلى كولىك جۇيەسىن قۇرۋ ءۇشىن باس جوسپاردا كوشەلەردى جەكە سەكتور ارقىلى ۇزارتۋدى قوسا العاندا، كەشەندى شارالار كەشەنى كوزدەلگەن. مىسالى، تولە بي كوشەسىن ۇزارتۋ ءۇشىن 270 ۋچاسكە سۇرىلەدى»، - دەپ اتاپ ءوتتى اكىمدىكتەن.
جالپى قالالىق ماڭىزى بار ماڭىزدى ماگيسترالدى كوشەلەردىڭ ءبىرى - تىلەنديەۆ كوشەسى. باس جوسپارعا جانە ەگجەي- تەگجەيلى جوسپارلاۋ جوبالارىنا (ە ت ج) سايكەس بۇل كوشەنى رىسقۇلوۆ داڭعىلىنان قالا شەكاراسىنا دەيىن، ۇزىندىعى 10,8 ك م ۇزارتۋ جوسپاردا.
«ۇزارتۋ جوباسى 2 كەزەڭگە بولىنگەن. ءبىرىنشىسى - رىسقۇلوۆ داڭعىلىنان دارحان ش/ا ساباتايەۆ كوشەسىنە دەيىن، ۇزىندىعى - 5,8 ك م. جوبا بويىنشا 149 جەر ۋچاسكەسى ساتىپ الىنادى. قازىرگى ۋاقىتتا جۇمىس جوباسى ساراپتامادان ءوتىپ جاتىر. ەكىنشىسى - ساباتايەۆ كوشەسىنەن قالا شەكاراسىنا دەيىن، ۇزىندىعى - 4,9 ك م. قازىرگى ۋاقىتتا جوبا ازىرلەنۋدە. ساتىپ الىناتىن جەر ۋچاسكەلەرىنىڭ سانى جەرگە ورنالاستىرۋ جوباسى ازىرلەنگەننەن كەيىن ايقىندالاتىن بولادى»، - دەپ حابارلادى قالالىق اكىمدىكتەن.
اكىمدىكتەن اتاپ وتكەندەي، تىلەنديەۆ كوشەسىنىڭ تراسسيروۆكاسىن وزگەرتۋ مۇمكىن ەمەس. سەبەبى باتىس جاعىندا جول سالۋعا بولمايتىن ۇلكەن ساي بار. جولدىڭ قىزىل سىزىقتارىنىڭ شىعىسقا قاراي جىلجۋى ساتىپ الىناتىن جەر ۋچاسكەلەرىنىڭ ودان دا كوپ بولۋىنا اكەلەدى.
«مەملەكەت مۇقتاجى ءۇشىن جەر ۋچاسكەلەرىن ساتىپ الۋ ۋچاسكە قۇقىقتارىنىڭ تۋىنداۋ نەگىزدەرىنە قاراماستان نارىقتىق قۇنى بويىنشا جۇرگىزىلەدى»، - دەپ ءتۇسىندىردى اكىمدىكتەگىلەر.
